फाइल फोटो
काठमाडौं- राष्ट्रिय स्वतन्त्र पार्टीको बैठकमा सभापति रवि लामिछानेले पछिल्लो राजनीतिक घटनाक्रमका बारेमा ब्रिफिङ गरेका छन्।
बैठकमा सहभागी एक पदाधिकारीका अनुसार लामिछानेले सत्ता गठबन्धन परिवर्तन हुने बताएका थिए।
'गठबन्धन परिवर्तन हुने जस्तो देखियो। तर अन्तिम निष्कर्ष निस्किएको छ। थप छलफलहरू जारी छ', ती नेताले भने।
उनका अनुसार, नयाँ गठबन्धन निर्माणका लागि भइरहेको प्रारम्भिक छलफलमा सभापति लामिछानेलाई उपप्रधान तथा गृह मन्त्रालय दिने भनिएको छ।
अघिल्लो वर्ष पुस १० मा एमाले, माओवादी केन्द्र, रास्वपा लगायतका दलहरूको गठबन्धन बनेको थियो। सोही गठबन्धनबाट लामिछाने उपप्रधान तथा गृहमन्त्री भएका थिए। यद्यपि, नागरिकता विवादमा परेपछि उनी पदमुक्त भएका थिए।
केहीबेरअघि सकिएको रास्वापको सचिवालय बैठकले समसामयिक राजनीतिक विषयमा तत्काल निर्णय लिनुपर्ने भएमा लिनसक्ने अधिकार सभापति रवि लामिछानेलाई दिएको सहप्रवक्ता प्रतिभा रावलले जानकारी दिइन्।
एमालेको सचिवालय बैठकले प्रधानमन्त्री प्रचण्डले अहिलेको गठबन्धन टुटाउन तयार भएको अवस्थामा आफूहरू उनीसँग सहकार्यको लागि तयार भएको निष्कर्ष निकालेको छ।
बैठकपछि उपमहासचिव प्रदीप ज्ञवालीले नयाँ गठबन्धन बन्न लागेकोतर्फ संकेत गर्दै नयाँ घटनाक्रम विकास हुन सक्ने अवस्था देखिएको बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
