काठमाडौं– गत पुसमा प्रदर्शनका क्रममा प्रहरीको गोली लागेर मृत्यु भएका सर्लाहीका जयशंकर साहको परिवारलाई सरकारले १० लाख रुपैयाँ सहयोग दिने भएको छ।
सोमबार बसेको मन्त्रिपरिषद्को बैठकले उक्त सहयोग दिने निर्णय गरेको सरकारकी प्रवक्ता एवं सञ्चारमन्त्री रेखा शर्माले जानकारी दिइन्। सर्लाहीको बरहथवा नगरपालिका–६ का साहको परिवारलाई आर्थिक सहायता स्वरुप उक्त रकम दिने निर्णय भएको मन्त्री शर्माले बताइन्।
गत पुसमा बरहथवामा प्राथमिक स्वास्थ्य चौकी स्तरोन्नतिको विषयमा भएको प्रदर्शनका क्रममा प्रहरीले गोली चलाउँदा साहको मृत्यु भएको थियो। घटनाको छानबिन गर्न गृह मन्त्रालयले सहसचिव थानेश्वर गौतमको संयोजकत्वमा प्रहरी नायब महानिरीक्षक सुरेन्द्र मैनाली र राष्ट्रिय अनुसन्धान विभागका अनुसन्धान निर्देशक भीमबहादुर बुढाथोकी सदस्य रहेको समितिसमेत गठन गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
