काठमाडौं– नेपाली राष्ट्रिय क्रिकेट टोलीका ओपनर कुशल भुर्तेलले योजनाअनुरूप प्रदर्शन भएको उल्लेख गर्दै विश्वकप खेलेर आएको द नेदरल्यान्ड्समाथि राम्रो जित निकाल्दै धेरै खुसी लागेको बताएका छन्।
नेपालले द नेदरल्याण्ड्समाथि ९ विकेटको जित निकाल्दा कुशलले अलराण्डर प्रदर्शन गरेका थिए। जितपछिको पत्रकार सम्मेलनमा कुशलले सबैले ओभरल राम्रो प्रदर्शन गरेको उल्लेख गर्दै नेदरल्याण्ड्स जस्तो बलियो टोलीविरुद्ध जित निकाल्दा खुशी लागेको बताए।
उनले बलिङमा चार विकेट लिँदा ब्याटिङमा पनि २८ रनको योगदान दिए। त्यो प्रदर्शनबाट उनी 'म्यान अफ दी म्याच' पनि भए। पछिल्लो दुई वर्षदेखि बलिङ गरिरहेको र आज टोलीको योजनाअनुरूप नै आफूले बलिङ गरेको उनको भनाइ छ।
पिचले पनि स्पिनरलाई मद्दत दिएकाले सफलता मिलेको कुशलले धारणाा राखे। कुशलले ब्याटिङतर्फ पावरप्लेमा विपक्षीविरुद्ध दबाब बनाउने योजना रहेको र सोहीअनुरूप सुरुदेखि नै आफ्नो सर्ट खेलेको बताए।
जुनसुकै फरम्याटमा पनि आफ्नै शैलीमा ब्याटिङ गर्ने रणनीतिमा रहने कुशलको भनाइ थियो। पछिल्लो खेलको खराब प्रदर्शन बिर्सेर खेलेको उनी बताउँछन्। डच टोलीविरुद्धको जितमा ओपनर आसिफ सेख र अनिल साहले अर्धशतक बनाए। यी दुईले दोस्रो विकेटका लागि अविजित १०५ रनको साझेदारी गरेका थिए।
आसिफले पनि लक्ष्य ठूलो नभएकाले पावरप्लेमा राम्रोसँग रन बटुल्ने रणनीति रहेको पनि खुलासा गरे। टियुको बिहान ब्याटिङ गर्न चुनौती रहने भए पनि दोस्रो इनिङमा केही सहज हुने बुझाइअनुरूप ब्याटिङ गरेको आसिफले रणनीति सुनाए।
यद्यपि आसिफले टियुमा पहिले ब्याटिङका लागि पनि आफ्नो टोली तयार रहने बताए। उनले शीर्ष अर्डरमा अनिल साहसँग कुनै प्रतिष्पर्धा नरहेको स्पष्ट पार्दै जसले खेले पनि नेपालले जित्नु मुख्य पक्ष रहेको धारणा राखे।
आसिफले कुशलको पहिलो बलदेखि सट खेल्ने शैली र आफ्नो जिम्मेवारी लामो इनिङसम्म लैजाने रहेको बताए। डच टोलीका कप्तान स्कट एडवार्डले नेपालविरुद्ध १३८ रनको लक्ष्य पर्याप्त नरहेको उल्लेख गर्दै टस गुमाउनु हारको कारण भने नरहेको स्पष्ट पारे।
पावरप्लेमा खासै ठूलो क्षति नभएको उल्लेख गर्दै स्पिनसँग खेल्न नसकिएको धारणा राखे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1767836232.jpg){kind=logo}
-1768787902.png)
-1764146706.png)
