काठमाडौं– एसिसी वुमन्स प्रिमियर कप क्रिकेटअन्तर्गत समूह चरणको अन्तिम खेलमा नेपालले माल्दिभ्सलाई २२८ रनको लक्ष्य दिएको छ। मलेसियाको क्वालालाम्पुरस्थित वाइएसडी युकेएम ओभलमा टस जितेर पहिले ब्याटिङ गरेको नेपालले निर्धारित २० ओभरमा ४ विकेट गुमाउँदै २२७ रन बनायो।
नेपालका लागि रुबिना क्षेत्री र पूजा महतोले उत्कृष्ट साझेदारी गर्दै माल्दिभ्सविरुद्ध बिशाल रनको योगफल खडा गरे। रुबिना र पूजाले १६६ रनको साझेदारी गरे।
शतकीय पारी खेलेकी रुबिनाले ११८ रन प्रहार गरिन्। ५९ बलको सामना गरेकी उनले १० चौका र ५ छक्का प्रहार गरिन्।
पूजाले ३३ बलमा अर्धशतक पूरा गरिन्। ३६ बलको सामना गरेकी उनले ५९ रन बनाइन्। जसक्रममा पूजाले ५ चौका र एक छक्का बनाइन्।
नेपालले सुरुवाती ५ ओभरमै ३ विकेट गुमाएको थियो। नेपालका ओपनर कविता कुँवर १३ र सीता रानामागर १५ रन बनाएर आउट भएकी थिइन्। यस्तै, कप्तान इन्दु बर्मा शून्य रनमा आउट भइन्। डली भट्ट ६ रन बनाएर चौथो विकेटमा रुपमा आउट भइन्।
समूह ‘डी’ को खेलमा नेपालले लगातार दोस्रो जित निकाल्दै ४ अंकका साथ क्वार्टरफाइनलमा स्थान बनाइसकेको छ। नेपालले पहिलो खेलमा हङकङ र दोस्रो खेलमा भुटानलाई समान ८ विकेटले पराजित गरेको थियो।
माल्दिभ्स भने लगातार दोस्रो हार बेहोर्दै प्रतियोगिताबाट बाहिरिसकेको छ। माल्दिस पहिलो खेलमा भुटान र दोस्रो खेलमा हङकङसँग पराजित भएको थियो।
प्रतियोगितामा १६ सहभागी टोली ४ समूहमा छन्। हरेक समूहका शीर्ष २ टोली क्वाटरफाइनलमा पुग्नेछन्। सेमिफाइनल हुँदै फाइनलमा पुग्ने २ टोलीले यसै वर्ष हुने वुमन्स एसिया कप खेल्न पाउनेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
