काठमाडौं- क्यानडासँगको ३ दिने एकदिवसीय क्रिकेट सिरिज नेपालले क्लीन स्वीप गर्यो। त्रिवि क्रिकेट मैदानमा क्यानडाले दिएको २३३ रनको लक्ष्य नेपालले मात्र १ विकेट गुमाएर ३३ बल बाँकी छँदै पूरा गर्यो।
नेपालको जितमा दुई ब्याट्म्यानले सतक प्रहार गरे। १२९ बलमा १०१ रन बनाउँदै भीम सार्की नटआउट रहे भने १२४ बलमा अनिल साह ११२ रन प्रहार गर्दै अविजित रहे।
नेपालको जितका नायकमध्येका एक अनिल साहले ११२ रन जोड्ने क्रममा १२ चौका र २ छक्का प्रहार गरे।
यसअघि क्यानडा विरुद्धको दोस्रो खेलमा पनि अनिलले आक्रामक सुरुवात गर्दै राष्ट्रिय रेकर्ड समेत आफ्नो नाममा राखेका थिए। उनले १९ बलमै अर्धसतक पूरा गरेका थिए।
क्यानडा विरुद्ध पहिलो खेलमा उनी मैदान उत्रिएका थिएनन् । अन्तिम तथा तेस्रो खेलमा फेरि मैदानमा उत्रिएका उनै ओपनर अनिलले आफूलाई पूर्ण प्रमाणित गर्दै अविश्मरणीय पारी खेले।
राष्ट्रिय टिमबाट खेलिसकेर फेरि विभिन्न उतारचढाव हुँदै टिम बाहिर रहेका उनै अनिल अहिले फेरि राष्ट्रिय टिमको महत्वपूर्ण सदस्य बनेका छन्। राष्ट्रिय टिममा कमब्याक हुन अनिलको मिहिनेत भने चानचुने छैन।
आरोहअवरोहकाबीच उनले आफूलाई पुनः निखार्दै राष्ट्रिय टिममा ल्याएका छन्।
अहिले २५ वर्षको उमेरमा राष्ट्रिय टिमका तहल्का मच्चाएका अनिलले उमेर समूहको यू–१९ र घरेलु क्रिकेटमा सानदार प्रदर्शन गरेका थिए। त्यही प्रदर्शनको आधारमा उनी सन् २०१८ को फ्रेबुअरीमा डिभिजन टुमा केन्या विरुद्धको लागि डेब्यू गर्ने अवसर पाए।
सन् २०१८ कै अगस्टमा ओडीआईमा नेदरल्याण्ड्स विरुद्ध डेब्यू गर्दा अनिल नेपालको प्लेइङ ११ मा समेटिएका थिए।
त्यसपछि भने अनिल चार वर्षसम्म राष्ट्रिय टिमबाट बाहिर रहे।
पुनः राष्ट्रिय टिममा मौका पाउन अनिलले सन् २०२२ सम्म कुर्नु परेको थियो। सन् २०२२ मा पपुवा न्यु गिनीसँगको सिजिरमा अनिलले मौका पाएका थिए। तर पपुवा न्यु गिनीसँगको दुई खेलको सिरिजले अनिललाई प्रमाणित गर्न सकेन।
त्यसको दुई वर्ष अर्थात् अहिले फेरि राष्ट्रिय टिममा पर्दै अनिलले आफूलाई प्रमाणित गरेका छन्। त्यसका लागि अनिलले धेरै मिहिनेत गरेका छन्। अनिल साह विभागीय एपीएफ हुँदै टोली पुलिस क्लबमा आबद्ध थिए। तर सन् २०२१ मा अनिलले पुलिस छाड्ने निर्णय गरे। आफ्नै प्रदेश मधेस फर्कने निर्णय गरेका थिए।
बारा घर भएका अनिल विभागीय टोली छाडेर मधेस फर्कनुमा स्वतन्त्रता मुख्य कारण रहेको बताउँथे। विभागीय टोलीमा भन्दा प्रदेशमा जोडिएपछि स्वतन्त्र भएर खेल्न सकिने उनको बुझाइ थियो। सन् २०२१ मा मधेस झरेका अनिलले २०२२ मा पीएम कप खेल्दै मधेसलाई सेमिफाइनलसम्म पुर्याएका थिए।
यसै सिजनमा भएको केपी ओली कप र पीएम कपमा अनिलले उत्कृष्ट प्रदर्शन गरे। घरेलु प्रतियोगितामा उत्कृष्ट प्रदर्शन गर्दै राष्ट्रिय टिममा पर्नका लागि भने अनिलले निकै पापड पेलेका छन्। राष्ट्रिय टिममा कमब्याक हुनकै लागि उनले दिल्ली पुगेर समेत क्रिकेट निखारेका थिए।
यस वर्षको दशैं-तिहार मनाउन अरु घर फर्कंदा अनिल भने दिल्लीको क्रिकेट एकेडेमीमा आफूलाई निखार्दै थिए। त्यही मिहिनेतले अहिले राष्ट्रिय टिममा अनिललाई कमब्याक गराएको छ।
दशैं-तिहारको बीचमा अनिलले दिल्लीको एमबी (मनविन्दर बिस्ला क्रिकेट एकेडेमी) मा बिताएका थिए। त्यहाँ रहँदा निकै कडा मिहिनेत अनिलले गरेका थिए।
अघिल्लो दशैं-तिहारमा समेत उनले दिल्लीमा गएर क्रिकेट निखारेका थिए। अघिल्लो वर्ष भने उनले दिल्लीको स्पोर्ट्स क्यू एकेडेमीमा क्रिकेट निखारेका थिए। आफ्नै खर्चमा दिल्लीको एकेडेमीसम्म पुगेर क्रिकेट निखारेका उनी आजको खेलमा म्यान अफ द म्याच समेत घोषित भएका छन्। सायद यो प्रदर्शनले अनिलले एउटा सपना पूरा भएको हुनुपर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
