काठमाडौँ- राष्ट्रिय सभाका सांसदहरुले नेपाली नागरिक विदेश पलायन हुनबाट रोक्न देश भित्रै पर्याप्त रोजगारीको सिर्जना गर्न सरकारको ध्यानाकर्षण गराएका छन्। राष्ट्रिय सभाको सोमबारको बैठकमा विशेष समयमा बोल्दै सांसदहरुले देशमा सुशासन र समृद्धिका लागि एकजुट भएर काम गर्नुपर्नेमा जोड दिएका छन्।
बैठकको विशेष समयमा सांसद कुमार दसौदीले जनतालाई आशा र विश्वास जगाउने कार्यक्रमका लागि सरकारलाई सुझाव दिए। उनले भने, ‘राजनीतिक व्यवस्था परिवर्तनपछि समृद्धिले गति लिन सक्नुपर्छ। कहाँकहाँ केके समस्या छन्, त्यो खोज्नु पर्छ। जनताको आशा जगाउने काम गर्नुपर्छ। जनता विदेश गएका गयै छन्, जनता निराश छन्।’ सांसद दसौदीले जनताका मुद्दा उठान गर्दा सरकारले कार्यान्वयन नगरेको गुनासो गरे।
सांसद जीतेन्द्रनारायण देवले देशको परिस्थितिप्रति सचेत हुन सरकारको ध्यानाकर्षण गराए। ‘राष्ट्रिय परिस्थिति चुनौतीपूर्ण, गम्भीर र सङ्कटपूर्ण छ। सङ्घीय लोकतान्त्रिक गणतन्त्रको राजनीतिक ढाँचा खडा गरेका छौं, समाजवादतर् फउन्मुख हुने प्रतिबद्धता गरेका छौँ। ती सबै कुरा राजनीतिक शक्तिका लागि चुनौती बनेका छन्,’ उनले भने।
सांसद नरबहादुर विष्टले थुप्रै काम गर्दागर्दै पनि भ्रष्टाचार र गरिबीले आक्रान्त भइरहेकोप्रति सरकारलाई सचेत गराए। उनले चुनौतीबीच सरकार सार्वजनिक सेवाप्रवाह सहज बनाउन सक्षम भएको दाबी गरे।
‘जनताले लाइन बसेर गर्नुपर्ने काम सहज भएको छ। राहदानी विभाग, वैदेशिक रोजगार विभाग, मालपोत कार्यालय जस्ता ठाउँमा लाइन बस्नुपर्दैन,’ उनले भने, ‘सुधारका थुप्रै काम हुँदाहुँदै चुनौती छन्।’ सांसद विष्टले सरकारी जग्गा हड्पने क्रम रोक्न ध्यानाकर्षण गराए।
सांसद राजेन्द्रलक्ष्मी गैरेले शान्ति प्रक्रियाको काम चाँडो टुङ्ग्याउन माग गरिन्। उनले युवा र महिलालाई सरकारको काममा प्रत्यक्ष रुपमा जोड्न नसकेको उल्लेख गर्दै आउने अधिवेशनमा लैङ्गिक उत्तरदायी बजेट ल्याउनुपर्नेमा जोड दिइन्। राष्ट्रिय गौरवका आयोजना निर्माण गर्न व्यवसायीलाई बाँकी भुक्तान समयमै गर्नका लागि उनले सरकारको ध्यानार्कषण गराइन्।
सांसद नारायणप्रसाद दाहालले राष्ट्रिय सभाको मर्यादा र गरिमा बढाउनका लागि सरकासँगै स्वयं सांसदहरुले ध्यान दिनुपर्ने बताए। जनताका मुद्दा र राष्ट्रको समृद्धि केन्द्रमा राखेर काम गरे मात्र जनप्रतिनिधि पनि स्थापित हुनसक्ने उनको भनाइ थियो।
यस्तै सांसद दिलकुमारी रावल थापाले भ्रष्टाचारको अनुसन्धान तथा कारबाहीका लागि प्रभाव र दबाबमा नपर्न सरकारको ध्यानाकर्षण गराइन्। ‘सरकार जनताको अभिभावक हो। सरकारको भूमिका कार्यकारी हो। सरकारलाई जनताका सवाल, राष्ट्र र राष्ट्रियताको सवाल, जनजीविकाको सवालमा संसद्प्रति जवाफदेही तथा उत्तरदायी बनाउने कर्तव्य सांसदहरुकै हो,’ उनले भनिन्, ‘सरकार जवाफदेही बनोस्, सरकारले भ्रष्टाचारका फाइल खोल्दा अनुहार नहेरियोस्, प्रभाव र दबाबमा नपरियोस् भन्ने प्रतिपक्षको मान्यता हो।’
सांसद राधेश्याम पासवानले संविधानअनुसार तत्काल आवश्यक ४० कानुन निर्माणका लागि ढिलाइ गर्न नहुने बताए। सरकारको आलोचना मात्र नगरेर सुशासन र समृद्धिका लागि एकसाथ काम गर्नुपर्ने उनको भनाइ थियो।
–रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
