काठमाडौं– एएफसी एसियन कप (फुटबल)को उपाधि कतारले जितेको छ। शनिबार राति भएको फाइनल खेलमा जोर्डमाथि ३–१ को जित निकाल्दै आयोजिक राष्ट्र कतारले उपाधि रक्षा गरेको हो।
कतारले यसपालि समेत गरी दोस्रोपटक एसियन कपको उपाधि जितेको हो। कतारले २०१९ मा जापानविरुद्ध ३-१ को जित निकाल्दै पहिलोपटक एसियन कपको उपाधि जितेको थियो।
यसपटकको फाइनलमा कतारको जितका लागि अक्रम अफिफ नायक बने। जोर्डनविरुद्धको फाइनलमा सबै गोल पेनाल्टीमार्फत गर्दै उनले ह्याट्रिक पूरा गरे। प्रतियोगिताभर ८ गोल गर्दै उनी सर्वाधिक गोलकर्ता समेत बने।
खेलको २२औं मिनेटमा नै अफिफले पेनाल्टीमार्फत् गोल गर्दै कतारलाई अग्रता दिलाएका थिए। जोर्डनका खेलाडीले अफिफमाथि नै फाउल गरेपछि कतारले पेनाल्टीको अवसर पाएको थियो।
खेलको ६७औं मिनेटमा जोर्डनले बराबरी गोल गर्यो। यजान अल–नैमातले गोल गर्दै खेल बराबरीमा ल्याएका थिए। तर कतारले त्यसपछि दुई गोल थप्दै नतिजा आफ्नो पक्षमा पार्यो।
खेलको ७२औं मिनेटमा कतारले दोस्रो पेनाल्टी पायो। अफिफले उक्त अवसरलाई गोल परिणत गरे। तेस्रो गोल भने इन्ज्युरी समयको पाँचौं मिनेटमा भयो। अफिफमाथि नै फाउल भएपछि कतारले पेनाल्टीको अवसर पाएको थियो। पेनाल्टीको अवसरलाई गोलमा परिणत गर्दै अफिफले कतारलाई ३–१ को जित दिलाए।
एसियन कपको आयोजक राष्ट्र रहेको कतारले समूह चरणमा लेबनान, ताजिकिस्तान र चीनलाई हराएको थियो। अन्तिम १६ मा प्यालेस्टाइनविरुद्ध २-१ को जित निकालेको कतारले क्वाटरफाइनलमा उज्बेकिस्तानलाई टाइबेकरमा पराजित गरेको थियो। सेमिफाइनलमा इरानलाई पराजित गर्दै कतारले फाइनलको यात्रा तय गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
