काठमाडौं– प्रधानमन्त्री पुष्पकमल दाहाल प्रचण्डले पञ्चेश्वर बहुउद्देश्यीय परियोजनाको ब्रेक थ्रु केही दिनमै हुने दाबी गरेका छन्। संघीय संसद्को कानुन, न्याय तथा मानव अधिकार समितिको बुधबार बसेको बैठकमा बोल्दै उनले यस्तो दाबी गरेका हुन्।
प्रधानमन्त्री प्रचण्डले पञ्चेश्वर परियोजनाको विस्तृत परियोजना प्रतिवेदन (डीपीआर) फाइनल गर्ने काम अन्तिम चरणमा पुगेको दाबी गरे। ‘मलाई विश्वास छ, आउने केही दिनभित्र पञ्चेश्वरको ब्रेक थ्रु हुन्छ। त्यसले नेपालको अर्थतन्त्रमा दीर्घकालीन सकारात्मक असर पर्छ,’ प्रधानमन्त्री प्रचण्डले भने।
प्रधानमन्त्री प्रचण्डले आफ्नो भारत भ्रमण र केही दिनअघि भारतीय विदेशमन्त्री एस जयशंकरको नेपाल भ्रमणले दुई देशको सम्बन्धलाई मजबुत बनाउनका साथै १० हजार मेगावाट विद्युत् भारतले किन्ने सम्झौता लागु भएको बताए।
बैठकमा प्रधानमन्त्रीको भनाइ थियो– ‘मेरो भारत भ्रमण र अहिले भारतीय विदेशमन्त्रीको भ्रमणले दुई देशको सम्बन्धलाई मजबुत बनाउने आधार त तय गरेको नै छ। एउटा त १० हजार मेगावाटको यही (सम्झौता) लागु भयो। अर्को पञ्चेश्वर अन्तिम चरणमा पुगेको छ, डीपीआर फाइनल गर्ने कुरा। हामी सबैलाई थाहा छ, त्यो दुवै देशको राष्ट्र हितमा छ। त्यसलाई अन्तिममा मेरो भारत भ्रमणका क्रममा जो वातावरण बन्यो, त्यो कारणले पञ्चेश्वर अघि बढ्दैछ। मलाई विश्वास छ, आउने केही दिनभित्र पञ्चेश्वरको ब्रेक थ्रु हुन्छ। त्यसले नेपालको अर्थतन्त्रमा दीर्घकालीन सकारात्मक असर पर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
