काठमाडौं– एपिएफले सोमबार कोशी प्रदेशमाथि आठ विकेटको जित निकाल्दै प्रधानमन्त्री कप महिला राष्ट्रिय क्रिकेट प्रतियोगितामा अपराजित यात्रा कायमै राखेको छ।
एपिएफले मुलपानीमा कोशीमाथि जित निकाल्दै आफ्नो अपराजित यात्रा चार खेलसम्म पुर्याएको हो। पहिलोपटक राउण्ड रोबिनका आधारमा भएको प्रतियोगितामा कोशीको भने चौथो खेलमा अपराजित यात्रा रोकिएको छ।
कोशीले दिएको ८५ रनको सामान्य लक्ष्य एपिएफले मात्र दुई विकेट गुमाएर १७.३ ओभरमा पूरा गर्यो। यससँगै एपिएफका चार खेलबाट चार जितसहित ८ अंकसहित शीर्ष स्थानमा यथावत छ।
एपिएफको जितमा इन्दु बर्माले सर्वाधिक ३६ रनको अविजित इनिङ खेलिन्। उनले ३४ बलमा समान दुई चौका र छक्का हिर्काइन्। रोमा थापा १० रनमा अविजित रहिन्।
कप्तान सीता रानामगरले १८ रन र ज्योति पाण्डले २४ रनको योगदान दिइन्। कोशीका बलरले कसिलो बलिङ गर्ने प्रयास गरे पनि जित निकाल्न सकेनन्। कोशीकी बलर सबनम राईले चार ओभरमा दुई मेडनसहित ९ रन मात्र खर्चे पनि विकेटविहीन रहिन्।
निशा साह र एलिसा खडियाले समान एक विकेट निकाले। त्यसअघि कोशीले २० ओभरमा दुई विकेट मात्र गुमाए पनि सुस्त ब्याटिङ गर्यो। कप्तान रुविना क्षेत्रीले ५८ बलमा ६ चौकासहित ४१ रन जोडिन्। काजोल श्रेष्ठले ४६ बलमा २५ रन र अप्सरी बेगमले १५ बलमा १३ रन जोडे।
सोमबार नै भएको अर्को खेलमा सुदूरपश्चिम प्रदेशले बागमती प्रदेशमाथि ६ विकेटको जित निकाल्यो। चार खेलबाट सुदूरपश्चिमको यो तेस्रो जित हो। सुदूरपश्चिमले पनि एपिएफसँग हार व्यहोरेको थियो। बागमतीले दिएको ८८ रनको सामान्य लक्ष्य सुदूरपश्चिमले मात्र चार विकेटको क्षतिमा १९औं ओभरमा पूरा गर्यो।
बिन्दु रावलले २८ रन र कविता जोशीले अविजित २७ रनको इनिङ खेल्दै जित दिलाए। बागमतीका अस्मिना कर्मचार्य र सोनी पाख्रिनले समान एक विकेट लिँदा सुदूरपश्चिमले दुई विकेट रनआउटका रूपमा गुमाउन पुग्यो।
त्यसअघि बागमतीले २० ओभर नै ब्याटिङ गरे पनि आठ विकेटको क्षतिमा ८७ रनको योगफल बनायो कन्चन श्रेष्ठले सर्वाधिक १९ रन जोड्दा हेलिशा गुरुङ १६ रन र सोनीले १३ रनको योगदान दिइन्। त्यसअघि मधेशले गण्डकी र लुम्बिनीले कर्णाली प्रदेशलाई हराए।
पूजा महतोको अलराउण्डर प्रदर्शनमा मधेशले गण्डकीलाई २७ रनले स्तब्ध बनाउँदै चार खेलबाट दुई अंक जोड्यो। तेस्रो हार व्यहोरेको गण्डकीको पनि समान खेलबाट दुई अंक नै छ। मुलपानी क्रिकेट मैदानमा एक सय १३ रनको लक्ष्य पछ्याएको गण्डकी १९.४ ओभरमा ८५ रनमै समेटियो।
गण्डकीका लागि सुमन खतिवडाले ४२ र शृष्टि जैसीले १५ रनबाहेक अन्यले दोहोरो अंकमा रन जोड्न सकेनन्। मधेशका लागि पूजा महतोले तीन तथा सरस्वतीकुमारी चौधरी, कप्तान कविता गौलमा र साक्षी यादवले समान एक विकेट लिए।
त्यसअघि टस हारेर ब्याटिङको निम्तो पाएको मधेशले निर्धारित २० ओभरमा सात विकेट गुमाउँदै एक सय १२ रनको योगफल बनाएको थियो। पूजाले ३८, सरस्वतीकुमारी चौधरीले अविजित २६ र प्रतिमा शाहले १० रन बनाए।
गण्डकीका लागि सुमन खतिवडाले तीन तथा कुशुम गोदार र शृष्टि जैसीले समान एक विकेट लिए। कीर्तिपुरस्थित त्रिवि क्रिकेट मैदानमा लुम्बिनीले कर्णालीमाथि ३० रनको जितसँगै चार खेलबाट चार अंक जोड्यो।
कर्णाली भने चार खेलमा अंकविहीन छ। लुम्बिनीले प्रस्तुत गरेको एक सय ३४ रनको लक्ष्य पछ्याएको कर्णालीले २० ओभरमा सात विकेट गुमाउँदै एक सय ३ रन मात्र बनाउन सक्यो। कर्णालीका लागि गौरी बोहराले २२, यमुना थारुले २१, अञ्जु गुरुङले अविजित १३ र रश्मि खड्काले अविजित ११ रन बनाए ।लुम्बिनीका लागि सरस्वती पुन र कृतिका मरासिनीले समान दुई तथा चमेली चौधरी र सर्मिला रोक्काले समान एक विकेट लिए।
त्यसअघि टस हारेर ब्याटिङ गरेको लुम्बिनीले निर्धारित २० ओभरमा पाँच विकेट गुमाउँदै एक सय ३३ रनको योगलफल बनायो। लुम्बिनीका कप्तान सरस्वती घर्तीमगरले ६२ बलमा सात चौकाको मद्दतले अविजित ५३ रनको योगदान गरिन्। आस्मा पुलामी मगरले २५ र चमेली चौधरीले १८ रन बनाए। कर्णालीका लागि यमुना थारु, रश्मि खड्का र तिर्सना विश्वकर्माले समान एक विकेट लिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
