पूर्व–पश्चिम राजमार्ग मर्मत

पूर्वाधार

नेपाल लाइभ बिहीबार, पुस ५, २०८० ०८:०८

फाइल तस्बिर

कञ्चनपुर– पूर्व–पश्चिम राजमार्गअन्तर्ग कञ्चनपुर र कैलालीमा पर्ने सडक मर्मतको काम सुरु गरिएको छ। सडकमा परेका खाल्डाखुल्डी मर्मत (पुर्न)का लागि ठेक्कामार्फत् काम अगाडि बढाइएको हो।

राजमार्गको कैलाली र कञ्चनपुरमा सडकलाई २ खण्डमा विभाजन गरी कार्य अगाडि बढाइएको सडक डिभिजन कार्यालय महेन्द्रनगरका सूचना अधिकारीका तारानाथ सिग्देलले बताए। उनका अनुसार पटके मर्मतका लागि लम्कीबाट अत्तरिया र कान्ला पुलबाट गड्डाचौकीसम्म ठेक्कामार्फत काम भइरहेको छ।

राजमार्गको कैलाली खण्डमा ८० किलोमिटर र कञ्चनपुर क्षेत्रमा १२ किलोमिटर क्षेत्रमा मर्मत भइरहेको उनले बताए। ‘सडक मर्मतका लागि ३ महिनाभित्र काम सक्नेगरी १ करोड रुपैयाँमा ठेक्का आह्वान गरिएको हो’, उनले भने, ‘पुस मसान्तसम्म अन्तिम म्याद रहेको छ।’ पटके मर्मतका लागि वर्षमा २ पटक ठेक्का आह्वान गरी काम अगाडि बढाउने कार्य हुँदै आएको छ।

यसैगरी चिसापानीबाट लम्कीसम्मको १० किलोमिटर सडकमा अस्पाल्ट ओभरले (कालोपत्रमाथि कालोपत्रको लेयर थप्ने) कार्यका लागि ७ करोडमा ठेक्का सम्झौता गरिएको उनले बताए। ‘सडक बिग्रिएको थियो, सुधारका लागि कालोपत्रको लेयर थप्ने कार्य थालिएको छ’, उनले भने, ‘ठेक्का सम्झौताअनुसार कार्य मङ्सिर महिनाभित्रै सक्नुपर्ने थियो, सकिएको छैन।’

निर्माण सामग्री अभावमा व्यवसायीले काम नसकेकाले म्याद थपका लागि निवेदन दिएको उनले जानकारी दिए। ‘अब मात्र ५–१० दिनमा सकिने काम छ, त्यसका लागि निर्माण व्यवसायीलाई काम गर्नका लागि म्याद थप गर्नेबारे प्रक्रिया अगाडि बढाइएको छ,’ सूचना अधिकारी सिग्देलले भने।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

निस्सासिएर मजदुरको ज्यान गयो

जापानको औसत तापक्रम उच्च हुने सम्भावना

अन्तर्राष्ट्रिय खुला कराते च्याम्पियनसिपको उपाधि नेपाललाई