भरतपुर– चितवन जिल्लाका दुग्ध उत्पादक किसानले दुध बिक्रीबापतको २२ करोड रुपैयाँ रकम पाउन सकेका छैनन्। यहाँ रहेका ११५ दुग्ध उत्पादक सहकारीले सो रकम भुक्तानी पाउन नसक्दा किसानले समेत दुधको मूल्य पाउन नसकेका हुन्।
असोजदेखिको भुक्तानी रकम नपाउँदा किसान चिन्तित बनेको जिल्ला दुग्ध उत्पादक सहकारी सङ्घका अध्यक्ष किशोर वगालेले बताए। उनले भने, ‘दुग्ध विकास संस्था र निजी दुग्ध उत्पादक कम्पनीले दुध लगेबापतका रकम अहिलेसम्म नदिँदा किसानलाई समस्या भएको छ।’ हरेक १५–१५ दिनमा दुधको भुक्तानी पाउनुपर्ने भए पनि लामो समयसम्म दुधको भुक्तानी नपाउँदा दुग्ध उत्पादक किसानले पशुलाई आहार खुवाउनसमेत कठिन बन्दै गएको उनको भनाइ छ।
दुग्ध विकास बोर्डबाट यहाँका किसानले ११ करोड, पोखरामा रहेको सुजल डेरी उद्योगबाट २ करोड र अन्य निजी डेरी कम्पनीको गरेर २२ करोड रकम भुक्तानी पाउन बाँकी रहेको छ। यहाँ दैनिक ३ लाख ५० हजार लिटर दुध उत्पादन हुँदै आएको बगालेले बताए। उनले भने, ‘अहिले दुध खपत हुन कठिन भएको छ, तर जेनतेन गइरहेको छ।’
यहाँ उत्पादित दुधमध्ये १ लाख ५० हजार लिटर जिल्ला बाहिर जाने गरेको छ। अन्य दुध जिल्लामै खपत हुने गरेको वगालले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789375192.jpeg)
-1786602170.png)
