काठमाडौं– शंखरापुर नगरपालिका–९ खुलालटारमा पैदलयात्रीलाई ठक्कर दिएको ‘हिट एण्ड रन’ घटनामा संलग्न कार र कारका चालकलाई पहिचान गरी प्रहरीले पक्राउ गरेको छ।
मंसिर १८ गते साँझ करिब पौन ७ बजेतिर खुलालटारस्थित सडकखण्डमा नम्बर प्लेट नखुलेको कारले पैदलयात्रीलाई ठक्कर दिइ फरार भएको थियो। इन्द्रायणीबाट साँखुतर्फ जाँदै गरेको सेतो रंगको कारले ठक्कर दिँदा ओखलढुंगाको चम्पादेवी गाउँपालिका–३ ताप्के डाँडा घर भइ खुलालटार बस्दै आएका अन्दाजी ४० वर्षीय रेतबहादुर तामाङ गम्भीर घाइते भएका थिए।
घाइते तामाङको उपचारका लागि वीर अस्पताल पठाइएकोमा उपचारका क्रममा उनको राति ८ बजेर २० मिनेटमा मृत्यु भएको थियो।
उक्त हिट एण्ड रन घटनाको अनुसन्धानका क्रममा प्रहरीले चालकलाई पक्राउ गर्नुका साथै कारलाई पनि नियन्त्रणमा लिएको छ।
प्रहरी वृत्त बौद्धबाट खटिएको टोलीले चाबहिलबाट बागमती प्रदेश–०१–०२६ च ६४०८ नम्बरको कार र त्यसका चालक शंखरापुर–६ सुनटोलका ४५ वर्षीय जयनारायण श्रेष्ठलाई पक्राउ गरेको छ। बुधबार दिउँसो पक्राउ परेका श्रेष्ठविरुद्ध सवारी ज्यानको कसुरमा म्याद लिएर अनुसन्धान कार्य अघि बढाइने प्रहरीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
