काठमाडौं– बालुवाटारस्थित जियोल्याण्ड ट्राभल्स एण्ड टुर्स प्रालिसँग करिब २ करोड रुपैयाँ भुक्तानी माग्दै जजिरा एयरवेज र एअर अरेबियाले मेल गर्यो। एकाएक जजिरा र एअर अरेबियाले २ करोड रुपैयाँ माग गरेपछि जियोल्याण्डका सञ्चालक सीता गैरे छक्क परिन्।
२ वटा हवाई कम्पनी जजिरा र एअर अरेबियाले जिओल्याण्डबाट ३३७ वटा टिकट काटेर उाडन गरेको भन्दै भुक्तानी माग गरेका थिए। यतिधेरै टिकट नकाटेको अवस्थामा यी २ एयरलाइन्सबाट मेल आएपछि जिओल्याण्डका सञ्चालक छक्क परेका थिए।
यात्रुको समेत विवरण पठाएर रकम भुक्तानी माग गरेपछि जियोल्याण्ड प्रहरीको केन्द्रीय अनुसन्धान ब्यूरो ‘सीआईबी’मा पुगेको थियो। सीआईबीका डीएसपी मदनजित महराको कमाण्डमा यो २ करोढ ठगी प्रकरणको अनुसन्धान सुरु भएको थियो।
३३७ जना यात्रुको १ करोड ९९ लाख ८२ हजार ९८४ रुपैयाँ भुक्तानी मागिएपछि अनुसन्धानमा जुटेको सीआईबीले पत्ता लगायो– जियोल्याण्डको युजर आईडी ह्याक गरेर अन्य व्यक्तिले टिकट काटेका रहेछन्।
त्यसपछि पक्राउ परे स्याङ्जाको वालिङ नगरपालिका–४ घर भइ हाल काठमाडौंको टोखा–६ सामाखुसी बस्ने नारायण सुवेदी। सुवेदी मर्स्याङ्दी ट्राभल्स कम्पनीका म्यानेजर समेत रहेको खुल्यो।
सीआईबीका अनुसार उनले कात्तिक १८ गतेदेखि मंसिर २ गतेसम्म बालुवाटारमा रहेको जियोल्याण्ड ट्राभल्स एण्ड टुर्स प्रालिको यूजर आइडी ह्याक गरी करिब २ करोड रुपैयाँ ठगी गरेका थिए।
नोभेम्बर ४ देखि नोभेम्बर १८ तारेखसम्म युजर आईडी ह्याक गरेर ३३७ जनाको टिकट काटेर बेचिएको अनुसन्धानबाट खुलेको छ। नारायण पक्राउ परेपछि यसका अर्का अभियुक्त मर्स्याङ्दी ट्राभल्सकै सञ्चालक हरि प्रसाद सुवेदी पनि पक्राउ परे।
अहिले यी २ जनालाई हिरासतमा राखेर सीआईबीले अनुसन्धान अघि बढाइरहेको छ। पक्राउ परेका दुबै जनाले यो सिस्टम ह्याकको डिजाइनर आफूहरु नभएको दाबी गर्दै प्रहरीमा बयान दिएका छन्। विजय कुमार भनिने भारतीय नागरिकको योजनामा आफूहरुले काम गरेको उनीहरुले प्रहरीसमक्ष बयान दिएका छन्। प्रहरीको प्रारम्भिक अनुसन्धानको क्रममा पनि भारतीय नागरिकको संलग्नता खुलेको छ।
तर ती व्यक्तिको पूरा पहिचान हुन नसकेको सीआईबीले जनाएको छ। सुरुमा पक्राउ परेका सुवेदीद्वयले युजर आईडी ह्याक गरेर आफूले ४ वटा मात्रै टिकट काटेको बताएका थिए। प्रहरी अनुसन्धानको क्रममा युजर आईडी ह्याक गरेर उनीहरुले ३८ वटा टिकट काटेको खुलिसकेको छ। बाँकीको हकमा पनि अनुसन्धान भइरहेको सीआईबीले जनाएको छ।
जिओल्याण्डको युजर आईडीबाट ३३७ वटा टिकट काटिएको भन्दै जजिरा र एअर अरेबियाले भने जिओल्याण्डको ५ करोड धरौटी रकमबाट काटेर तत्काल आफूहरुलाई रकम उपलब्ध गराउन भनेर दबाब दिइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
