काठमाडौं– राष्ट्रिय मानव अधिकार आयोगको रिक्त सचिव पदका लागि भएको सिफारिस विवादमा परेको छ। आयोगका एक सदस्यले सचिवका लागि सिफारिस भएका व्यक्ति सचिवका लागि योग्य नभएको भन्दै सार्वजनिक रुपमा असहमति राखेका छन्।
आयोगका सदस्य मिहिर ठाकुरले सामाजिक सञ्जालमार्फत् नै मुरारी खरेलले यौन दुर्व्यवहारको आरोप लागेका व्यक्तिलाई संरक्षण गर्ने लगायत कार्य गरेकाले उनी अयोग्य भएको भन्दै विज्ञप्ति नै जारी गरेका छन्।
आयोगको केही दिन अघिको बैठकले आयोगको रिक्त सचिवका लागि कामु सचिवको जिम्मेबारी सम्हाल्दै आएका मुरारी खरेललाई सिफारिस गरेको थियो। तर सदस्य ठाकुरले तत्काल सो पदबाट उनलाई हटाउनुपर्ने र उक्त प्रस्तावको औचित्य र कारण सार्वजनिक गरेको भन्दै उनलाई बढुवा नर्गन मन्त्रिपरिषद्लाई आग्रह गरेका छन्।
‘लेखा अधिकृत जीतेन्द्र कार्कीले आयोगकै एक कार्यालय सहयोगीलाई यौन दुर्व्यवहार गरेको लिखित आरोप लाग्यो! तर कामु खरेलले कुनै कारबाही गरेनन्! उल्टै लेखा अधिकृत कार्कीलाई आयोगका कर्मचारीहरुले आफ्नो क्लबको अध्यक्ष बनाएर आयोगको गरिमा नै बढाइ दिए,’ सदस्य मिहिरको दाबी छ, ‘आयोगका कनिष्ठ कर्मचारीहरुलाई मेराविरुद्ध उचाल्ने तथा भौतिक आक्रमण समेत हुन सक्ने कुरा सुन्दैछु! यसबाट आफू अलिकति पनि विचलित नभई अरु दृढताका साथ आयोगको शुद्धीकरण तथा प्रभावकारिता निम्ति ढटेर काम गर्ने प्रण गर्दछु! मेरो सचिवालयका कर्मचारीहरुलाई मेरो निर्देशनको पालना नगर्न बाध्य बनाइँदै छ!’
सिफारिस भएका खरेलले भने आफूले व्यक्तिगत टिकाटिप्पणी नगर्ने बताए। अध्यक्षसहित ५ जनाको सिफारिसमा एक जनाले विवाद गरेको र आफू विवादित भए सिफारिस नै हुनु नपर्ने पक्षमा रहेको पनि उनको भनाइ छ।
‘मैले कुनै गल्ती गरेको भए अध्यक्षसहित ४ जनाले सर्वसम्मत सिफारिस नै गर्दैन थिए होलान्। कुनै १ जना सदस्यलाई के लागेको हो, व्यक्तिगत रुपमा आलोचना गरिरहनुभएको छ,’ खरेलले भने, ‘यो समग्र आयोगको समेत छविको कुरा हो।’
आफूले कुनै गल्ती गरेको भए अनुसन्धान गरेर कारबाहीको लागि सधै तयार रहेको खरेलको भनाइ छ। तर व्यक्तिगत रुपमा सुरु गरिएको गाली र आारोपबारे भने केही प्रतिक्रिया नभएको उनले बताए।
सदस्य मिहिर भने खरेल अयोग्य भएको र आफूले पटक–पटक यही कुरा उठाएको दाबी गर्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788274741.jpg)
-1787821305.jpg)
-1786602170.png)
-1786513116.png)
