काठमाडौँ– नेपाली फिल्म 'अन्जिला'को छायाङ्कन ३४औँ दिनमा सकिएको छ। शनिबार काठमाडौंको तीनकुने क्षेत्रमा कथाकी पात्र एन्जिला तुम्बापो सुब्बाको अन्तिम सट लिइयो।
महिला राष्ट्रिय फुटबल टिमकी नम्बर एक गोलरक्षक एन्जिला तुम्बापो सुब्बाको जीवनबाट प्रभावित रहेको यो फिल्मलाई मिलन चाम्सले निर्देशन गरेका छन्। एन्जिलाकै जन्मथलो इलामको आइतबारे बजारमा शुभमुहुर्त गरी छायाङ्कन सुरु भएको थियो। इलाम, झापा र काठमाडौंमा यस फिल्मको छायाङ्कन भएको छ।
यो फिल्ममा एन्जिला स्वयंको मुख्य भूमिका रहेको छ। उनीसँगै यसमा दयाहाङ राई, मिरुना मगर, सिर्जना सुब्बा, माओत्से गुरुङ, बुद्धि तामाङ, विजय बराल, हरि खड्का, मन्जु श्रेष्ठ, वेदना राई, सिध्दार्थ सिंह, सुरज तमु, सुमिन गुरुङ, बिष्णु मोक्तान लगायतको पनि अभिनय रहनेछ।
फिल्मका निर्माता प्रेम कुमार श्रेष्ठको पनि यस फिल्ममा प्रमुख भूमिका छ।
झन्डै दुई वर्ष अघि घोषणा गरी अहिले छायाङ्कन भएको यो फिल्मकी कथा पात्र एन्जिला तुम्बापोको खेल जीवनको व्यस्त तालिकाका कारण निकै ढिलो छायाङ्कन गरिएको हो। 'ईन्ड क्ल्याप'सँगै निर्देशक चाम्सले उपयुक्त मिति हेरी रिलिज गरिने बताए।
छायाङ्कन सकिएपछि एन्जिलालाई लिगमा विजयीको शुभकामना सहित म्याजिक फूटवेयर र फिल्मका सह-निर्माता विनोद अग्रवालले स्कूटर उपहार प्रदान गरेका छन्। म्याजिक फूटवेयर यस फिल्मका अर्का सह-निर्माता राजेश बगडियाको हो। दुवै सह-निर्माताले एन्जिलाले फिल्ममा गरेको काम र उनको खेल जीवनबाट प्रभावित भएर उपहार प्रदान गरेको बताए।
म्याजिक फूटवेयरले एन्जिलाको नाम अङ्कित गरी जुत्ता बनाएको छ। यसरी नेपाली खेलाडीको नाम अङ्कित गरी पहिलो पटक टी-शर्ट र जुत्ता (म्याजिक) बनेका हुन्। साथै, एन्जिला चर्चित क्लोथिङ ब्रान्ड ली-निङको नेपालको पहिलो र विश्वको पाँचौँ ब्रान्ड एम्बासडर हुन्।
साथै, उनी गोर्खा वाच र हन्ड्रेड स्पोर्टसको पनि पहिलो ब्रान्ड एम्बासडर हुन्।
एन्जिलाको बालापनदेखि खेल जीवनसम्मको कथामा उनले फुटबलर बन्नका लागि गरेको सङ्घर्ष र सफलताको कथालाई फिल्ममा जोड दिएको निर्देशक चाम्सले जानकारी दिए।
२०५३ मा पाँचथर जिल्लाको फाक्तेपमा जन्मिएकी एन्जिलाले १३ वर्षको उमेरदेखि नै फुटबल खेल्न सुरु गरेकी थिइन्। सन् २०१४ मा श्रीलङ्कामा सम्पन्न एएफसी यु–१४ गर्ल्स रिजनल ट्रफीबाट अन्तर्राष्ट्रिय प्रतियोगितामा डेब्यू गरेकी उनी २०१४ बाट राष्ट्रिय टिममा परेकी थिइन्।
तर, उनी २ वर्ष बेन्चमै सीमित भइन्। त्यसयता भने उनी महिला राष्ट्रिय फुटबल टिमको भरपर्दो गोलरक्षक बनेकी छन्। एन्जिला 'पल्सर स्पोर्टस् अवार्ड २०७७' को पिपुल च्वाइस अवार्डको मनोनयनमा समेत परेकी थिइन्। यो विधामा मनोनयनमा पर्ने एन्जिला फुटबलकी एक मात्र खेलाडी हुन्।
सुदीप बरालको डिओपी रहने यस फिल्मका सम्पादक मिलन श्रेष्ठ हुन्। मुन लभ इन्टरटेन्मेन्टको ब्यानरमा बन्न लागेको फिल्मका निर्माता प्रेम कुमार श्रेष्ठ हुन् भने विनोद अग्रवाल र राजेश बगडिया सह-निर्माता हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
