काठमाडौं– ‘बुलबुल’का निर्देशक विनोद पौडेलले नयाँ फिल्म घोषणा गरेका छन्। नेपालीमा ‘भूठान’ र अंग्रेजीमा ‘द वर्ल्ड्स् ह्याप्पिएस्ट म्यान’ नाम रहेको यो फिल्मको मुख्य भूमिकामा कलाकार हरिवंश आचार्य र दयाहाङ राई रहनेछन्।
साथै जोयस पाण्डेय,अनुराधा मजुमदार, पूजा चन्दलामा, रिचा घिमिरे, अदिती प्याकुरेल, टम क्रेन, विमल सुवेदी तथा कौशिला खनाल कर्माचार्य लगायतका कलाकार अनुबन्धित भएका छन्।
सन् २०१९ मा ‘बुलबुल’ निर्देशन गरेर सर्वोत्कृष्ट निर्देशकको राष्ट्रिय चलचित्र पुरस्कार पाएका विनोद पौडेलले अभिनेत्री स्वस्तिमा खड्कालाई भिन्न चरित्रमा उभ्याएका थिए। पौडेलको दोस्रो फिल्म पनि दर्शकको लागि प्रतिक्षित छ।
यो फिल्ममा हलिउड कलाकारलाई पनि अनुवन्ध गर्न लागिएको छ। तर हलिउडमा चलिरहेको फिल्मकर्मीहरूको आन्दोलन भर्खरै मात्र सकिएकोले केही समयमा टुंगो लाग्ने कुरा निर्माता मध्येका एक राजेन्द्र ठकुराठीले बताए। राजेन्द्र ठकुराठी हलिउड सिनेमाका एक प्रख्यात नाम हुन्। उनले ५० भन्दा बढी हलिउडका चलचित्रमा सहकार्य गरिसकेका छन्।
भुटानदेखि भारत,नेपाल हुँदै अहिले अमेरिकामा बसोवास गरिरहेका भुटानीहरूको देशप्रेम र जीवनयात्राको कथा समेटेर बन्न लागेको यस फिल्म चलचित्र भूठान (द वल्र्डस् ह्यापिएस्ट म्यान्) सन् २०१९ मा बुसान फिल्म फेस्टिभलको स्कृप्ट पिचिङमा समेत छानिएको थिया ।
फिल्ममा सन् २०१७ मा अस्कर अवार्ड जितेका निर्माता स्टार झाउ पनि एसोसियट निर्माताकोे रुपमा जोडिएका छन्। यस फिल्मको प्रमुख निर्मातामा राजेन्द्र ठकुराठी, अमिताभ जोशी र ‘बुलबुल’कै निर्माता अविरल थापा रहनेछन्। साथै कार्यकारी निर्मातामा एलएन अधिकारी र कौशिला खनाल कर्माचार्य छन् भने शैलेश मैनाली, दिपक दस्नामी, मनोरथ खनाल, रविन पोख्रेल, प्रदीप शर्मा (बडाईं) ,राजु पौडेल, संजीवभार श्रेष्ठ, नवराज पराजुलीको सह निर्माण रहनेछ।
चलचित्रको सम्पूर्ण छायांकन अमेरिकाको ओहायो राज्यमा हुनेछ भने यस चलचित्र नेपाली एवं अंग्रेजी भाषामा निर्माण हुनेछ। फिल्मको छायांकन सन् २०२४ को अन्तसम्म सकेर सन् २०२५ मा प्रदर्शनमा आइसक्नेछ।
चलचित्रमा सुसन प्रजापतिको छायांकन,अन्जय खड्काको सम्पादन, डिकेश खडगी शाहीको ध्वनि, सूर्य शाहीको कास्टिङ्ग, उज्वल श्रेष्ठको पब्लिसिटी डिजाइन, विमल सुवेदीको प्रोडक्सन डिजाइन, बलिउडका प्रख्यात कला निर्देशक अन्जन गजुरेलको कला निर्देशन रहनेछ। किर्तना बाँस्कोटा, एलि वोहोरा, विशाल डोटेल, समुन्द्र राज घिमिरेले निर्देशनमा सहयोग गर्नेछन्।
यस चलचित्रलाई अमेरिकाको म्याड मंकी फिल्मसले निर्माण गर्ने छ । साथै अमेरिकाकै डग इयर्ड फिक्चर्स र नेपालको अवेकन प्रोडक्सनले सहकार्य गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
