काठमाडौं- नक्कली भुटानी शरणार्थी प्रकरणमा उच्च अदालत पाटनले अन्तत: टुङ्गोमा पुर्याउँदै आदेश गरेको छ। उच्च अदालतका न्यायाधीशद्वय जनक पाण्डे र प्रकाश खरेलको इजलासले गत मंगलबारदेखि सुरु गरेको सुनुवाइमा शुक्रबार आदेश गरेका छन्।
उनीहरुको आदेशले ९ जना प्रतिवादी थुनामा गएका छन् भने केही प्रतिवादी धरौटीमा र केही साधारण तारेखमा छुटेका छन्। तीमध्ये चर्चामा रहेका पूर्वमन्त्रीद्वय टोपबहादुर रायमाझी र बालकृष्ण खाण दुवै तत्काल रिहा नहुने भएका छन्। रायमाझीको हकमा पुर्पक्षका लागि थुनामै पठाउने आदेश गरेको छ भने खाणको हकमा राय बाझिएपछि उनी थुनामै रहे।
जिल्ला अदालतले दुवैलाई पुर्पक्षका लागि थुनामा पठाएको थियो। त्यस विरुद्ध उच्च अदालत पुगेका खाणको हकमा न्यायाधीश प्रकाश खरेल धरौटी माग गर्न सहमत नहुँदा उनको मुद्दा पुन: सुनुवाइ गर्नुपर्ने भएको हो।
खाणको हकमा न्यायाधीश पाण्डे धरौटीमा रिहा गर्न सहमत भएका थिए। उनले ३० लाख धरौटी माग गर्ने आदेश गरेका थिए तर न्यायाधीश खरेलले फरक राय राखेपछि उनको रिहा हुने आशा तत्कालका लागि सकियो।
खाणको मुद्दा अब तेस्रो न्यायाधीशको इजलासमा पेस हुनेछ। उच्च अदालत पाटनमा रजिष्ट्रार ठगेन्द्र कट्टेलका अनुसार खाणको मुद्दा अब एक न्यायाधीशको इजलासमा पेस हुनेछ। अदालतले पेसीमा एक जना न्यायाधीशको इजलासमा खाणको मुद्दा पेस गर्नेछ। उक्त दिन न्यायाधीश पाण्डे वा खरेल कसको रायमा सहमत हुने भनी बहस हुनेछ। उक्त बहसपछि न्यायाधीशले निर्णय दिनेछन्। न्यायाधीशले पाण्डेको रायमा सहमत जनाएमा खाण धरौटीमा रिहा हुनेछन् भने खरेलको रायमा सहमत भएमा उनी पनि थुनामै रहनेछन्।
उनको मुद्दा अब कहिले सुनुवाइ हुन्छ भन्ने प्रश्नमा रजिष्ट्रार कट्टेलले अहिले निश्चित नभएको बताए। न्यायाधीशहरुसँग सल्लाहपछि पेसी तोकिने उनले बताए। अहिले सुनुवाइ गरेका भन्दा फरक न्यायाधीशको इजलासमा खाणको मुद्दा पेसी तोक्नुपर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
