रवि लामिछानेको प्रतिवेदन- अहिलेको प्रदेश संरचनाको विकल्प सोच्न एकछिन पनि ढिला गर्नुहुन्न

राजनीति

नेपाल लाइभ बिहीबार, मंसिर १४, २०८० ०७:३५

काठमाडौं- राष्ट्रिय स्वतन्त्र पार्टी (रास्वपा) का सभापति रवि लामिछानेले अहिलेको प्रदेश संरचनाको विकल्प खोज्न एकछिन पनि ढिला गर्न नहुने बताएका छन्।

महोत्तरीको जलेश्वरमा सम्पन्न पार्टी केन्द्रीय समिति र संसदीय दलको संयुक्त बैठकमा रास्वपाका संसदीय दलका नेता समेत रहेका लामिछानेले प्रस्तुत गरेको राजनीतिक प्रतिवेदनमा अहिलेको प्रदेश संरचनाले कहीँ पनि नपुर्‍याउने भन्दै छिटोभन्दा छिटो विकल्प खोज्नुपर्ने उल्लेख गरिएको छ।

प्रतिवेदनमा भनिएको छ, ‘प्रदेश संरचना भ्रष्टाचारको केन्द्र र कार्यकर्ता भर्ती केन्द्र बनेको छ। यसको विकल्प सोच्न एकछिन पनि ढिला गर्नु हुन्न।’

राजनीतिक अगुवाको मूल ध्येय सत्ता, दल र नेता केन्द्रित हुँदा मुलुक क्रमशः अनिश्चयतर्फ र नागरिक निराशातर्फ धकेलिएको लामिछानेको दाबी छ।

विगत आठ दशकमा निरंकुश राणा शासन, सक्रिय राजतन्त्र सहितको निर्दलीय पञ्चायत, संवैधानिक राजतन्त्रात्मक बहुदलीय प्रजातन्त्र र पछिल्लो पन्ध्र वर्षयता संघीय लोकतान्त्रिक शासन व्यवस्था अँगालेको तर जनताका लागि केही काम गर्न नसकेको उनको भनाइ छ। ‘अब द्रुत विकासका मोडलहरु ल्याएर रोजगारी सिर्जना गरी आर्थिक उन्नतिको बेग मार्नुको विकल्प छैन। जति भोक लागे पनि थाल खान सकिँदैन, गाँस नै खाने हो।’

अहिले व्यवस्थामा पनि नागरिकको जीवनस्तरमा सुधार गर्न नसकेको भन्दै उनले भनेका छन्, ‘हामीले नागरिकको जीवनस्तरमा पर्याप्त सुधार गर्न सकेनौं। विकास र समृद्धिमा आशातीत फड्को मार्न सकेनौं। अर्थात्, व्यवस्था परिवर्तनले देश र नागरिकको अवस्था खासै परिवर्तन गर्न सकेन।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

रविलाई हिरासत पठाइयो, प्रहरी कार्यालयबाहिर समर्थकको नाराबाजी

चितवनमा रविको बयान सकियो, थुनछेक बहस आजैबाट

महिला टी-२०आई शृंखला : पाँच खेल खेल्दा पनि जितविहीन नेपाल, पाँचौं खेलमा नेदरल्याण्ड्ससँग १० विकेटले पराजित