काठमाडौं– भारतमा आयोजित आईसीसी एक दिवसीय विश्वकप क्रिकेटको उपाधि अस्ट्रेलियाले जितेको छ।
फाइनलमा भारतलाई ६ विकेटले हराउँदै अस्ट्रेलियाले १३औं संस्करणको उपाधि चुमेको हो।
विश्वकप क्रिकेटमा अस्ट्रेलिया योसहित छैटौं पटक विश्व च्याम्पियन बनेको छ। आयोजक घरेलु टोली यसअघिका सबै खेलमा अविजित रहे पनि फाइनलमा अस्ट्रेलियासँग पराजित हुँदै उपाधि चुम्नबाट चुक्यो।
भारतले दिएको २४१ रनको लक्ष्य अस्ट्रेलियाले ४३ ओभरमा चार विकेट गुमाउँदै पूरा गर्यो।
अहमदावादस्थित नरेन्द्र मोदी क्रिकेट स्टेडियमा भएको खेलमा टस हार्दै भारतले पहिले ब्याटिङको निम्तो पाएको थियो।
उत्कृष्ट सुरुवात गरे पनि मध्यक्रम चल्न नसक्दा भारतले ४९ दशमलव ५ ओभरमा अलआउट हुँदै २४० रनको मध्यम स्कोर बनाएको थियो।
भारतका लागि केएल राहुलले सर्वाधिक ६६, विराट कोहली ५४ र कप्तान रोहित शर्माले ४७ रन बनाउनुबाहेक अन्य ब्याटरले सम्झन लायक ब्याटिङ गर्न सकेनन्।
भारतलाई मध्यम स्कोरमा समेट्ने क्रममा अस्ट्रेलियाका लागि मिचेल स्टार्क तीन विकेट लिँदै भारतलाई धराशयी बनाए। यसैगरी प्याट कमिन्स २,जोश हेजलवुड २, ग्लेन म्याक्सवेल र एडम जाम्पाले एक-एक विकेट लिए।
यता अस्ट्रेलियाको ब्याटिङतर्फ ट्राभिस हेडले सर्वाधिक १३७ रनको पारी खेले। मारनुस लबुसाइङ्गेले ५८ तथा मिचेल मार्सले १५ रन बनाए। डेभिड वार्नर र स्टिभ स्मिथ भने क्रमश:७ र ४ रन बनाउँदै आउट भएका थिए।
भारतका जसप्रित बुमराहले २, महम्मद शमी र मोहम्मद सिराजले १ विकेट लिए। हरेक चार वर्षमा आयोजना हुने एक दिवसीय विश्वकप अष्ट्रेलियाले यसअघि सन् १९८७, १९९९, २००३, २००७ र २०१५ मा जितेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
