काठमाडौं– भारतीय क्रिकेट टिम एकसेएक स्टार खेलाडीले भरिएको छ। विराट कोहोली, रोहित शर्मा, केएल राहुल, मोहम्मद शामी, जसप्रित बुमराहजस्ता खेलाडीले भरिएको भारतीय टिममा यो विश्वकपले नयाँ स्टार पाएको छ।
कुनै समय भारतीय क्रिकेट टोलीमा चौथो नम्बरको ब्याट्सम्यानलाई लिएर विश्वभरमा बलरहरु तर्सिन्थे। सचिन तेन्दुलकर, राहुल द्रविड र युवराज सिंह जस्ता खेलाडीहरु चौथो नम्बरमा ब्याटिङ गर्न क्रिजमा ओर्लिन्थे। टिमलाई संकटबाट जोगाउँदै विजेतासम्म बनाउने खुवी एक्लै राख्ने भएकाले उनीहरुको चर्चा र विपक्षी टिमको चिन्ता हुने गर्दथ्यो। उनीहरुको अवकाशपछि भारतीय टिममा चौथो नम्बरमा अस्थिरता आएको थियो। तर, यसपटकको विश्वकपले भारतका लागि त्यो रिक्तता पूर्ति गर्ने संकेत गरेको क्रिकेटका विश्लेषकहरुको दाबी छ।
भारतीय टिममा यो विश्वकपबाट आफूलाई नयाँ स्टारको रुपमा उभ्याउन सफल भएका खेलाडी हुन श्रेयस अय्यर। स्टार खेलाडीले भरिएको भारतीय टिममा उनी आफ्नो अलग्गै पहिचान बनाउन सफल भएका देखिन्छ।
सेमिफाइलनको खेलमा अय्यरले आफ्ना प्रशिक्षक राहुद द्रविडको रेकर्ड समेत तोडे। विश्वकपमा लगातार शतक प्रहार गर्ने द्रविडको रेकर्ड तोड्दै बुधबार न्यूजिल्याण्डलाई पराजित गर्दा भारतका लागि महत्त्वपूर्ण योगदान दिए।
विश्वकपमा अय्यरले गरिरहेको ब्याटिङको भारतीय टिमका प्रशिक्षक द्रविड, अस्ट्रेलियाका पूर्व कप्तान रिकी पोन्टिङ र पाकिस्तानमा वसिम अकरमले पनि प्रशंसा गरेका छन्। उनले सेमिफाइलनको अन्तिम छनौटमा नेदरल्याण्ड्सविरुद्ध अविजित १२८ रनको पारी खेलेका थिए भने सेमिफाइलनको खेलमा न्यूजिल्याण्डविरुद्ध ७० बलमा १०५ रनको आक्रामक पारी खेले। अय्यर विश्वकपमा चौथो नम्बरमा ब्याटिङ गरेर शतक प्रहार गर्ने सचिन तेन्दुलकर र युवराज सिंहपछि तेस्रो ब्याट्सम्यान बनेका छन्।
क्रिकेट जगत्मा उनको चर्चा रनले मात्र भइरहेको छैन। जुन परिपक्वताका साथ उनले खेल पस्केका छन् त्यसको पनि चर्चा भइरहेको छ। उनको खेल्ने परिपक्वताले उनलाई भविष्यसम्म खेल्न सक्ने स्टारमा रुपमा हेरिएको छ।
उनी अहिले भारतीय क्रिकेटका सबैभन्दा रोमाञ्चक ब्याट्सम्यानको रुपमा अघि आएका छन्। रणजी ट्रफी र आईपीएलमा शानदार प्रर्दशनपछि उनले राष्ट्रिय टिममा डेब्यू गरेका थिए। २०१७ मा अन्तर्राष्ट्रिय क्रिकेटमा डेब्यू गरेका उनले यसबीचमा चोटका कारण धेरै अप्ठेरो स्थितिको सामना गर्नुपर्यो। यसबीचमा पनि धेरै असफलताहरु झेले, तर हिम्मत हारेनन्। उनी मेहनत गर्दै पुन: टोलीमा फर्के।
अय्यरले २०१७ डिसेम्बररमा श्रीलंकाविरुद्ध खेल्दै एकदिवसीय अन्तर्राष्ट्रियमा डेब्यू गरेका थिए। दोस्रो खेलमै अर्धशतक प्रहार गरे। र नियमित टिमको सदस्य बन्न सफल भ । त्यसको केही महिनापछि उनले टी–२० आईमा डेब्यु गर्ने मौका पाए। २०१९ को विश्वकप क्रिकेट खेल्ने भारतको टिममा छनौट भए। तर काँधमा चोट लागेका कारण विश्वकपवाट बाहिर भए ।
उनले २०२० मा न्यूजिल्याण्डविरुद्ध आफ्नो पहिलो अन्तर्राष्ट्रिय शतक प्रहार गरेका थिए। त्यसपछि उनी २०२१ मा न्यूजिल्याण्ड विरुद्धकै खेलकै लागि टेस्टमा पनि डेब्यू गरे। डेब्यु खेलमै उनले १ शतक र १ अर्धशतक प्रहार गरेर आफूलाई प्रमाणित गरेर देखाए।
यही प्रर्दशन निरन्तर राख्दा २०२३को विश्वकपमा भारतका सबैभन्दा सफल ब्याट्सम्यानको रुपमा उनी देखिएका छन्। उनी यो विश्वकपमा सवैभन्दा धेरै रन बनाउने पाँचौं खेलाडीमा रहेका छन्। उनले १० खेलमा ५२६ रन बनाएका छन्। जसमा २ शतक र ३ अर्धशतक रहेको छ।
कमेन्टेटर हर्षा भोगले अय्यरका पछिल्ला पारीहरु करिअरकै बेस्ट रहेको टिप्पणी गर्छन्। ‘जो आफ्नो ब्याटिङ शैली अलग रुपमा देखाइरहेको छ। सर्कलमा ५ फिल्डर हुदाँ पनि १ रन लिन सफल हुन्छ। साथै हावामा खेलेर बाउन्ड्री पनि निकाल्न सक्दछ,’ अय्यरको प्रशंसा गर्दै भोगले भन्छन्।
सञ्जय माजरेकरले पनि उनको प्रशंसा गरे। सञ्जय अय्यरलाई क्लासिकल खेलका साथै चौका र छक्का समेत आवश्यक समयमा प्रहार गर्नसक्ने क्षमता भएको खेलाडीको रुपमा लिन्छन्।
भारतीय प्रशिक्षक राहुद द्रविड अय्यरलाई विशेष खेलाडीको रुपमा लिन्छन्, जो दबाबमा अझै धेरै राम्रो खेल्न सक्दछ । राहुल अययरको डेब्यू खेलदेखि नै उनको खेलशैली र स्वभावको फ्यान भएका छन्।
द्रविण मान्दछन् कि अय्यर एक समझदार क्रिकेटर हुन्, जसको खेलमा राम्रो पकड छ अनि असहज परिस्थितिमा पनि सहज रुपमा खेल आफ्नो पक्षमा ढाल्नसक्ने गरी खेल्दछन्।
यसरी उनको प्रशंसा भइरहँदा केही पूर्व क्रिकेटहरु उनको विपक्षमा छन्। सर्ट पिच बल खेल्न नसक्नु उनको कमजोरी रहेको उनीहरुको टिप्पणी छ। विश्वकपको ४ खेलपछि सुनील गावस्करले आलोचना गदै भनेका थिए, ‘उनले (अय्यरले) १०० रन कसरी बनाउने सिक्न जरुरी छ। किनकि उनी खराब बलमा खेलेर पटक पटक राम्रो स्कोर बनाउनबाट चुकिरहेका छन्।’
पाकिस्तानका पूर्व कप्तान मिसवाह उल हक पनि अय्यरको फूटवर्कको आलोचक हुन्। अय्यरले त्यसमा सुधार गर्नुपर्ने उनको सुझाव छ।
यसरी आलोचना र सर्मथन भइरहँदा श्रेयस अय्यर भारतीय क्रिकेटमा केही वर्षदेखि चल्दै आएको चौथो नम्बरको ब्याट्सम्यानको समस्याको विकल्प भने देखिएका खेल विज्ञहरुको भनाइ छ। खासगरी युवराज सिंहको अवकासपछि ४ नम्बरमा ब्याटिङ गर्ने राम्रो खेलाडी लामो समयदेखि भारतले पाउन सकेको थिएन। भारतले अनेक विकल्पहरुको प्रयोग गरे पनि स्थिर हुन सकेको थिएन।
भारतमा नम्बर ४ महान ब्याट्सम्यानहरुको स्थान हो। सचिन तेन्दुलकर, राहुद द्रविड, मोहम्मद अजहरुद्दिन र युवराज सिहको स्थान हो। युवराज रिटायर भएपछि उक्त स्थानमा सुरेश रैना, महिन्द्रसिंह धोनी, विजय शंकर, मनीष पाण्डे, केएल राहुल, केदार जाधव, अजिंक्य रहाने, सूर्यकुमार यादवजस्ता धेरै खेलाडीहरुलाई परीक्षण गरियो, अय्यर झैं सफल नदेखिएको खेल विश्लेषकहरुको दाबी छ।
नम्बर चारको स्थानका लागि भारतीय टिम लगभग १० वर्षदेखि समस्या झेलिरहेको छ। अहिले आएर उक्त स्थानमा अय्यरलाई मौका दिइएको छ।
अय्यर उक्त रोलमा सफल नै देखिएका छन्। उनले चौथो नम्बरमा ब्याटिङ गर्दै हालसम्म ३२ खेलमा ५२ रनको औषतमा १ हजार ३९३ रन बनाएका छन् जसमा ४ शतक र ८ अर्धशतक रहेका छन्। यो विश्वकपमा पनि उनी सफल देखिएका छन्। यसरी हेर्दा उनी भारतीय क्रिकेट टोलीमा नयाँ स्टारको रुपमा उदाइरहेको युवाको रुपमा अघि आएका छन्। –एजेन्सीहरुको सहयोगमा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787382958.png)
-1786602170.png)
-1786513116.png)
