काठमाडौं– आइसीसी एक दिवसीय विश्वकपको लिग चरणको खेल सकिएको छ। लिग चरणको खेल सकिँदा सेमिफाइलनको समीकरण पनि तय भएको छ।
कूल ४५ खेलपछि निर्माण भएको समीकरणमा भारत, दक्षिण अफ्रिका, अष्ट्रेलिया र न्यूजिल्याण्ड सेमिफाइलनमा पुगेका छन्। उनीहरुले आ–आफ्ना प्रतिस्पर्धी पनि पाएका छन्। भारतमा जारी १३औं आईसीसी एक दिवसीय विश्वकपको प्रारम्भिक चरणको खेल सकिँदा दुई देश विश्वविजेता सेमिफाइनलमा पुगेका छन् दुई देश पहिलो पटक जितेर रेकर्ड राख्ने दौडमा छन्।
छनोट भएकामध्ये सबैभन्दा धेरै विश्वकप जित्ने अष्ट्रेलिया हो भने भारतले पनि जितेको छ। यसरी हेर्दा सेमिफाइनलमा पुग्ने चारमध्ये दुई राष्ट्र अस्ट्रेलिया र भारत विश्वकपका पूर्वविजेता हुन्। दक्षिण अफ्रिका र न्यूजिल्याण्डले भने हालसम्म विश्वकपको उपाधि जित्न सकेका छैनन्। उनीहरु यो तथ्यलाई उल्टाउदै भारतबाट उपाधि जितेर जाने लक्ष्य र रणनीतिसहित मैदानमा उत्रिँदैछन्।
आइसीसीको रेकर्ड अनुसार अस्ट्रेलिया सर्वाधिक पाँच पटकको विश्वकप विजेता हो। अस्ट्रेलियाले सन् १९८७, सन् १९९९, सन् २००३, सन् २००७ र सन् २०१५ मा एक दिवसीय विश्वकपको उपाधि जितेको थियो। २०१५ पछि उपाधिविहीन भएको अष्ट्रेलिया यस पटक लैजाने दाबीसहित मैदानमा उत्रिँदै छ।
भारतले पनि हालसम्म दुई पटक एक दिवसीय विश्वकपको उपाधि जितेको छ। भारतले सन् १९८३ र सन् २०११ मा विश्वकप जितेको थियो। भारत आफ्नो घरेलु मैदानमा र सर्मथकसहित विश्वकप जितेर ह्याट्रिक गर्न चाहन्छ। यसका लागि भारत लयमा पनि देखिन्छ।
समूह चरणको शतप्रतिशत खेल जितेको भारत ब्याटिङ र बलिङ दुवैमा उत्कृष्ट खेल पस्कँदै आएको छ।
अभागी न्यूजिल्याण्ड र दक्षिण अफ्रिकालाई बदल्ने अवसर
विश्वकमा सहभागी हुन थालेको न्यूजिल्याण्डको धेरै वर्ष भयो तर उपाधिको स्वाद अहिलेसम्म चाख्न पाएको छैन। पहिलो संस्करणदेखि नै सहभागिता जनाउँदै आए पनि एक दिवसीय विश्वकपमा न्यूजिल्यान्ड सबैभन्दा अभागी राष्ट्र भएको छ। यसपटक उसलाई त्यो बदल्ने अवसर छ।
न्यूजिल्याण्डको ब्याटिङ र बलिङ दुवै सन्तुलित रहेको छ। यही कारण उसलाई इतिहास बनाउने मौका रहेको छ। लिग चरणमा उत्कृष्ट सुरुवात गरेको न्यूजिल्याण्ड बीचका केही खेलहरुमा कमजोर देखिएको थियो। तर उसले फेरि पुनरावगमन गर्दै सेमिफाइलनको यात्रा तय गर्यो। जसका कारण उच्च हौसलासहित मैदानमा उत्रिने तयारीमा न्यूजिल्याण्डका खेलाडी छन्।
हालसम्म दुई पटक फाइनल र ६ पटक सेमिफाइनलमा पुगेर पनि न्यूजिल्यान्डले विश्वकपको उपाधि हासिल गर्न सकेको छैन। न्यूजिल्याण्ड सन् २०१५ र सन् २०१९ को विश्वकपमा फाइनलमा पुगेर उप–विजेतामा चित्त बुझाउन बाध्य भएको थियो।
न्यूजिल्याण्डजस्तै अर्को अभागी देश हो दक्षिण अफ्रिका। सन् १९९२ देखि एक दिवसीय विश्वकप खेल्न थालेको दक्षिण अफ्रिका फाइनलमा पनि पुग्न सकेको इतिहास थिएन। उक्त इतिहास यस पटक बनाउँदै उपाधि नै उचाल्ने रणनीतिमा रहेको छ। दक्षिण अफ्रिका हालसम्म चार पटक सेमिफाइनलमा पुग्ने अनि बाहिरिने हुँदै आएको छ।
सन् १९९२ मा पहिलो सहभागितामै सेमिफाइनलसम्म पुगेको दक्षिण अफ्रिकाले त्यसपछि सन् १९९९, सन् २००७ र सन् २०१५ मा सेमिफाइनल खेलेको थियो।
अब सेमिफाइलनमा भारत र न्यूजिल्याण्ड खेल्ने छन् भने दक्षिण अफ्रिका र अष्ट्रेलिया खेल्ने छन् जसबाट विजेता हुनेहरुले फाइलन खेल खेल्ने छन्। सेमिफाइलन १५ र १६ तारिखमा वानखेडे र इडनगार्डेन्समा हुने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
