काठमाडौं– अन्तिम ओभरको अन्तिम बलमा एक छक्का हान्न नसक्दा उप–विजेता हुदै सेमिफाइनमा प्रवेश गरेको नेपालका लागि महत्त्वपूर्ण खेलमा दीपेन्द्रसिंह ऐरीलाई फर्काउने प्रयास भइरहेको प्रशिक्षक मोन्टी देसाईले बताएका छन्।
शुक्रबार नेपालले बलियो प्रतिद्वन्द्वी यूएईसँग मुलपानी क्रिकेट मैदानमा फाइनल प्रवेशका लागि खेल खेल्दै छ। नेपालका लागि फाइनल भन्दा पनि विश्वकप छनोटमा पुग्नका लागि सेमिफाइनल खेल जित्न महत्त्वपूर्ण छ। सेमिफाइनल जिते मात्र नेपाल आगामी वर्ष अमेरिका र वेस्टइन्डिजमा हुने टी–२० विश्वकपमा छनोट हुनेछ।
-1698918398.png?timestamp=1698918415410)
सोही कारण पनि महत्त्वपूर्ण खेलमा भरपर्दा दीपेन्द्रलाई सेमिफाइनलका लागि फर्काउने प्रयास भइरहेको छ। नेपाली राष्ट्रिय क्रिकेट टिमका प्रशिक्षक मोन्टी देसाईले नेपालका अलराउन्डर ऐरीलाई मैदान फर्काउने प्रयास भइरहेको जानकारी दिएका हुन्।
बिहीबार आइसिसी टी–२० विश्वकप छनोटअन्तर्गत ओमानसँगको खेलेपछि मोन्टीले दीपेन्द्रलाई मैदान फर्काउन सबै काम गरिरहेको प्रतिक्रिया दिएका हुन्। ओमानसँग बिहीबार पराजित भएको नेपालले भोलि हुने सेमिफाइनलमा ऐरीलाई फर्काउन सके उच्च मनोबलका साथ मैदान उत्रने छ।
यूएईलाई हराए नेपाल आगामी वर्ष अमेरिका र वेस्ट इन्डिजमा हुने टी–२० विश्वकपमा छनोट हुने लक्ष्य लिएको छ। ‘दीपेन्द्र हाम्रा लागि महत्त्वपूर्ण खेलाडी हुन्। उनको उपचारमा हामीले सक्ने जति सबै काम गरिरहेका छौं,’ देसाईले भने, ‘यो प्रतियोगिता नेपालका लागि मात्र नभएर उनका लागि पनि महत्त्वपूर्ण छ।’
ऐरी सिंगापुरविरुद्धको खेलअघि अभ्यासका क्रममा चोटग्रस्त भएका थिए। उनको गोलीगाँठोमा चोट लागेको थियो। दीपेन्द्र घाइते भएपछि विवेक यादवले नेपाली टिमबाट मौका पाएका थिए। यसअघिको खेलमा ब्याटिङको मौका नपाएका उनले आजको खेलमा नेपाललाई फर्काउने प्रयास अन्तिम ओभरसम्म गरेका थिए।
विवेकले बिहीबार अन्तिम ओभरमा लगातार तीन छक्का प्रहार गर्दै खेललाई रोमाञ्चक मोडमा पुर्याएका थिए। दीपेन्द्रले आज कीर्तिपुरस्थित त्रिवि मैदानको नेटमा अभ्याससमेत गरेकाले केही आसा प्रशिक्षक देसाईले देखाएका छन्। ऐरी आजको खेल मैदानमा पुगेर अभ्याससँगै हेरेको देखिएको थियो। उनी ब्याटिङ र बलिङ दुवैका लागि नेपालको भरपर्दा र अनुभवी खेलाडी हुन्।
मध्यक्रममा उनी सम्हालिएर बिग हिट प्रहार गर्दै खेल फिनिसिङ गर्न सक्ने क्षमता राख्ने खेलाडी भएकाले नेपालका लागि महत्त्वपूर्ण छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
