काठमाडौं- आईसीसी टि-२० विश्वकप एसिया क्षेत्र फाइनल छनोटमा बहराइनले हङकङलाई २० रनले पराजित गरेको छ। यो हारसँगै हङकङको सेमिफाइनल यात्रा संकटमा परेको छ।
जितको लागि १ सय ४७ रनको विजयी लक्ष्य पछ्याएको हङकङ १९.१ ओभरमा १ सय २६ रनमा अल आउट भएपछि स्तब्ध भयो। हङकङका अंशुमन रथले सर्वाधिक २८ रन बनाए पनि जितका लागि पर्याप्त भएन। उनीबाहेक अन्य कुनै पनि ब्याटरले राम्रो प्रदर्शन नगरेपछि हङकङ पराजित भयो।
हङकङले खराब सुरुवात गरेको थियो। पहिलो ओभरको चौथो बलमा मजिद अब्बासीको बलमा ओपनर निजाकत खान ४ रनमा बोल्ड आउट भएका थिए। मजिद अब्बासीको बलमा उच्च लयमा रहेका मार्टिन कोट्जी २ रनमा क्याच आउट भए भने स्पिनर अली दाउदले बाबर हायतलाई ६ रनमा बोल्ड आउट गरेपछि हङकङ १३–३ को संकटको अवस्थामा पुगेको थियो।
चौथो विकेटका लागि अंशुमन रथ र एजिज खानले चौथो विकेटका लागि ५० रनको साझेदारी गरेका थिए। तीव्र गतिका बलर जावेद अनवारले ल्वो फुल टस बलमा एजिजलाई १९ रनमा एलबीडब्लू आउट गरेपछि हङकङ पराजिततिर पुग्यो।
बहराइनका रिजवान बटले ४ ओभरमा २६ रन खर्चेर २ विकेट लिए। अब्दुल मजिदले ३.१ ओभरमा ७ रन खर्चेर ३ विकेट लिए। अली दाउदले ४ ओभरमा २३ रन खर्चेर २ विकेट लिए।
त्यसअघि माथिल्लो मुलपानी क्रिकेट मैदानमा टस हारेर पहिला ब्याटिङको निम्तो पाएको बहराइन १९.३ ओभरमा १ सय ४६ रनमा अल आउट भएको थियो। बहराइनको जितमा इमरान अली बटले ४३ बलमा ५ चौका र ३ छक्कासहित सर्वाधिक ६२ रनको योगदान दिएका थिए। उनी बाहेक अन्य कुनै पनि बहराइनका खेलाडीले राम्रो प्रदर्शन गर्न सकेनन्।
इमरान जावेद १५, हैदर अली १४ र मोहम्मद रिजवान १३ रनमा आउट भए। अन्यले दोहोरो अंकमा रन जोड्न सकेनन्। हङकङले २१ रन अतिरिक्त दिएको थियो।
हङकङका तीव्र गतिका बलर नस्रुला रानाले ३.३ ओभरमा २१ रन खर्चेर ३ विकेट लिए। एहसान खानले ४ ओभरमा १ मेडनसहित १७ रन खर्चेर २ विकेट लिए। मोहम्मद अजिज खानले ४ ओभरमा १ मेडनसहित ३८ रन खर्चेर २ विकेट लिए। यासिम मुर्तजाले ४ ओभरमा ३१ रन खर्चेर २ विकेट लिए।
बहराइन पहिलो खेलमा यूएईसँग ५ विकेटले पराजित भएको थियो। हङकङले यसअघि जित निकालेको थियो। अब हङकङले बिहीबार यूएईसँग खेल्नेछ। अन्तिम दिनको नतिजाले सेमिफाइनल निर्धारण गर्ने देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
