काठमाडौं– त्रिकोणात्मक टी–२० आई क्रिकेट श्रृङ्खलाको तेस्रो खेलमा नेपालले हङकङलाई ७९ रनले पराजित गरेको छ।
नेपालले दिएको २१४ रनको विजयी लक्ष्य पछ्याएर जवाफी ब्याटिङ गरेको हङकङ २० ओभर खेल्दै ८ विकेट गुमाएर १३४ रनमा समेटियो।
हङकङका लागि अन्श्या रथले सर्वाधिक ४५ रन बनाए। ४२ बल खेल्दा ६ चौका हिर्काएका रथ दीपेन्द्रसिंह ऐरीको बलमा ललित राजबंशीबाट क्याचआउट भएका थिए।
हङकङका लागि एजाज खानले २५ तथा बाबर हयातले २० रन बनाए। हारून अर्शदले १२ रन बनाए।
हङकङलाई सस्तैमा समेट्ने क्रममा नेपालका करण केसी, सोमपाल कामी र ललित राजबंशीले २–२ विकेट लिए। प्रतिस जिसी र दीपेन्द्रसिंह ऐरीले समान १–१ विकेट लिए।
मुलपानी क्रिकेट मैदानमा टस जितेर पहिले ब्याटिङ गरेको नेपालले निर्धारित २० ओभरमा ६ विकेट गुमाएर २१३ रन बनाएको थियो।
हङकङविरुद्ध सुरुवातमा खराब प्रदर्शन गरेको नेपालको पारी सम्हाल्दै कुशल मल्ल र दीपेन्द्र सिंह ऐरीले कीर्तिमानी साझेदारी गरे। पाँचौं विकेटका लागि कुशल र दीपेन्द्रले १४५ रनको साझेदारी गरेका थिए।
नेपालका लागि कुशल मल्लले ९२ रनको योगदान गरे। पाँचौं नम्बरमा क्रिजमा आएका कुशलले ४१ बलको सामना गर्दै ९ छक्का र ३ चौका प्रहार गरे।
कुशलसँगै अर्धशतक पूरा गरेका दीपेन्द्रसिंह ऐरीले ५७ रन बनाए। ३४ बलको सामना गरेका उनले २ छक्का र ६ चौका प्रहार गरे।
नेपालका लागि आसिफ शेखले २० तथा कप्तान रोहित पौडेलले ११ रन बनाए। अन्य ब्याटरले भने दोहोरो अंक जोड्न सकेनन्।
नेपालविरुद्ध हङकङका हारून अर्शद र मोहम्मद गजानफरले समान २–२ विकेट लिए। यस्तै, आयुश शुक्ला र एजाज खानले समान १–१ विकेट लिए।
त्रिकोणात्मक टी–२० आई क्रिकेट श्रृङ्खलाको पहिलो खेलमा यूएईलाई ७ विकेटले पराजित गरेको थियो। यस्तै, दोस्रो खेलमा हङकङलाई ६ विकेटले गरेको थियो।
आजको खेलमा विजयी भएसँगै नेपालले १ खेल अगावै फाइनलमा स्थान बनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
