काठमाडौं– एकदिवसीय विश्वकप क्रिकेटअन्तर्गत शनिबार भारत र पाकिस्तानबीचको खेल थियो। छिमेकी यी दुई देश सीमानाका लागि जारी शत्रुताका कारण पनि एक-अर्काप्रति सहज हुँदैनन्।
त्यसैले भारत र पाकिस्तानबीचको खेल एउटा खेलमा मात्रै सीमित रहँदैन। खेलाडीहरुले खेल भावना प्रस्तुत गरे पनि दर्शकहरु त्यही रुपमा बुझ्दैनन्। त्यसैले क्रिकेटका अन्य प्रतिस्पर्धा भन्दा यी दुई देशबीचको खेल विशेष हुने गर्छ।
जारी विश्वकपका सुरुवाती दुवै खेलमा आफ्नो प्रभाव जमाएका भारत र पाकिस्तानले तेस्रो प्रतिस्पर्धा आपसमा गरे। भारतको घरेलु मैदानमा पाकिस्तानी खेलाडी फिका देखिए। भारतीय बलर कुलदीप यादवका अनुसार उनीहरुका ब्याटरले त प्रयास पनि गरेनन्।
स्टेडियममा खचाखच ‘१ लाखभन्दा बढी’ भारतीयको हुटिङका अघि पाकिस्तानी क्रिकेट खेलाडीको मनोबल कमजोर बनेको खेलले देखायो। यतिसम्म स्वभाविक हो। तर, उक्त खेलका क्रममा मैदानभित्र र बाहिर धार्मिक अन्धविश्वास र असहिष्णुता समेत प्रदर्शन भएको थियो, र जारी छ।
रिजवान आउट हुँदा जय श्रीराम
हिन्दुस्तान टाइम्सका अनुसार पाकिस्तानी विकेटकिपर ब्याटर मोहम्मद रिजवान आउट भएर पेभेलियन फर्किँदै गर्दा भारतीय दर्शकले उनलाई निकै तनाव दिएका थिए। उनी फर्किँदै गर्दा त्यहीँ वरीपरी रहेका दर्शकहरुले उठेर ‘जय श्रीराम’को नारा लगाएका थिए। जसले रिजवानलाई निकै असहज महसुस गराएको थियो।
इस्लाम धर्मावलम्बी रिजवानले यसअघि श्रीलंकाविरुद्ध शतक प्रहार गरेका थिए। ३४५ रनको लक्ष्य पछ्याएको पाकिस्तानलाई जित दिलाउन उनी घाइते अवस्थामा समेत डटे।
त्यसको अर्को दिन उनले उक्त शतक गाजामा इजरायली सेनाद्वारा मारिएकाहरुमा समर्पण गरे। जसको प्रतिक्रिया स्वरुप दर्शकले उक्त नारा लगाएको भारतीय सञ्चारमाध्यमले उल्लेख गरेका छन्।
हार्दिक पाण्ड्याको ‘काला जादु’
सामाजिक सञ्जालमा अहिले ट्रेन्ड गरिरहेको विषय हो हार्दिक पाण्ड्याको ‘काला जादु’। पाकिस्तानविरुद्ध बलिङकका क्रममा भारतीय अलराउन्डर पाण्ड्याले बललाई लक्षित गरेर केही बोल्दै फुकेका थिए।
उक्त क्लिप अहिले सामाजिक सञ्जालमा निकै शेयर भइरहेको छ। शेयर गर्दै सामाजिक सञ्जाल प्रयोगकर्ताहरुले लेख्ने गरेका छन्- पाण्ड्याका काला जादु। जसले अन्धविश्वासलाई फैलाउन प्रशस्त मद्दत गरिरहेको छ।
संयोग कस्तो परेको थियो भने जब पाण्ड्याले खेलका क्रममा त्यस्तो हर्कत गरे, त्यही बलले पाकिस्तानी ब्याटर इमाम-उल हकको विकेट झर्यो।
सामाजिक प्रयोगकर्ता भनिरहेका छन्, ‘हार्दिक पाण्ड्याका तर्फबाट बलमा मन्त्र, त्यसपछि इमाम आउट।’
असहिष्णु विज्ञापन
भारतीय ट्राभल कम्पनी मेक माय ट्रिपले भारत-पाकिस्तान खेलअघि जारी गरेको एक विज्ञापनको अहिले खुलेर विरोध भइरहेको छ। सामाजिक सञ्जालमा उक्त विषयमा निकै चर्चा भइरहेको छ।
खेलअघि उक्त कम्पनीले एक अंग्रेजी पत्रिकाको अहमावाद संस्करणमा पूरा पेज विज्ञापन गरेको छ। जहाँ पाकिस्तानी क्रिकेट प्रशंसकलाई पाकिस्तानी टिम हारेबाफत् विशेष छुट दिने भनिएको छ।
जुन खेल भावना विपरीत मात्र नभइ भद्दा र अपमानजनक रहेको सामाजिक सञ्जाल प्रयोगकर्ताले बताइरहेका छन्। कम्पनीको छविमा यसले उल्टै हानी पुर्याइरहेको देखिएको छ।
यो विज्ञापन सेयर गर्दै ज्योत्सना मोहन नामकी एक सामाजिक सञ्जाल प्रयोगकर्ता लेख्छिन्, ‘तपाईंको ट्राभल कम्पनीको सेवा यो विज्ञापनभन्दा राम्रो होला भन्ने अपेक्षा छ।’
केहीले यो विज्ञापन फिर्ता गर्नुपर्ने राय समेत राखिरहेका छन्। एकले भनेका छन्, ‘भारतीयका तर्फबाट म पाकिस्तानीसँग माफी चाहन्छु- यसले हाम्रो मूल्यमान्यताको प्रतिनिधित्व गर्दैन।’
पाकिस्तानी खेलाडीको स्वागतको विरोध
भारत र पाकिस्तानको खेलका क्रममा ‘सेम अन बीसीसीआई’ पनि ट्रेन्डिङमा छ। पाकिस्तानी खेलाडी एक होटेलमा प्रवेश गर्न क्रममा गरिएको भव्य स्वागतको विरोध गर्दै उक्त ट्रेन्ड चलाइएको हो।
शिव सेनाको उद्धव ठाकरे गुटले यसलाई चर्चामा ल्याएको हो। शिव सेनाको उद्धव गुटले गुजरातको एक होटेलमा पाकिस्तानी खेलाडी प्रवेश गरिरहँदा उनीहरुलाई गरिएको भव्य स्वागतको भिडियो पोस्ट गरेर उक्त ह्यासट्याग चलाएको छ।
उक्त पार्टीले लेखेको छ, ‘हाम्रा सिपाहीहरुमाथि गोली बर्साउने पाकिस्तानमाथि बीसीसीआई फूल बर्साइरहेको छ। तिनै सिपाहीहरुको तस्बिर र बलिदान प्रयोग गरेर चुनाव जित्ने भाजपा, के अब पाकिस्तानको स्वागतका तस्बिरलाई लिएर प्रचार गर्छ?’
थप उल्लेख छ- चुनावको बेला देशभक्ति र लडाइँको माहोल गरम बनाउनेहरु पाकिस्तानलाई रेड कार्पेट विछ्याउन लाज मान्दैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
