काठमाडौं– आईसीसी एकदिवसीय विश्वकप क्रिकेटमा पाकिस्तानले श्रीलंकाविरुद्ध ६ विकेटको जित निकालेको छ। ३४५ रनको कीर्तिमानी लक्ष्य पछ्याएर जवाफी ब्याटिङमा उत्रिएको पाकिस्तानले ४८.२ ओभरमा ४ विकेट गुमाएर लक्ष्य भेट्टायो।
एकदिवसीय विश्वकपको कीर्तिमानी लक्ष्य पछ्याउने क्रममा पाकिस्तानका मोहम्मद रिजवान नायक बने। १२१ बलको सामना गरेका रिजवानले नटआउट १३१ रन बनाए। एकदिवसीय क्रिकेटमा रिजवानको यो सबैभन्दा उच्च स्कोर हो। उनले ८ चौका र ३ छक्का प्रहार गरे।
ओपनर अब्दुल्लाह सफिकले ११३ रन बनाए। १०३ बलको सामना गरेका सफिकले ३ छक्का र १० चौका प्रहार गरे।
इमाम उल हकले १२ तथा बाबर आजमले १० रन बनाए। साउद शकिलले ३१ रन बनाए भने इफ्तिखार अहमद २२ रनमा नटआउट रहे।
टस जितेर पहिले ब्याटिङ गरेको श्रीलंकाले ५० ओभरमा ९ विकेट गुमाउँदै ३४४ रन बनाएको थियो।
कुशल मेन्डिस र सदिरा समाराविक्रमाको शतकको मद्दत श्रीलंकाले पाकिस्तानविरुद्ध विशाल स्कोर खडा गरेको थियो। श्रीलंकाका लागि मेन्डिसले सर्वाधिक १२२ रन बनाए। उनले ७७ बलमा १४ चौका र ६ छक्का प्रहार गरे।
समराविक्रमाले ८९ बलमा १०८ रन बनाए। उनले पनि २ छक्का र ११ चौका प्रहार गरे।
ओपनर पाथुम निशांकाले ५१ रन तथा धनञ्जय डी सिल्भाले २५ रन बनाए। श्रीलंकाका लागि हसन अलीले ४ तथा ह्यारिस राउफले २ विकेट लिए।
प्रतियोगितामा पाकिस्तानको यो दोस्रो जीत हो। पाकिस्तानले यसअघि नेदरल्याण्डस्विरुद्ध ८१ रनले जित निकालेको थियो।
श्रीलंकाको भने लगातार दोस्रो हार हो। श्रीलंका यसअघि साउथ अफ्रिकासँग १०२ रनले पराजित भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751533150.jpg)
-1749826086.png)
