काठमाडौं– राष्ट्रिय सभाका अध्यक्ष गणेशप्रसाद तिमिल्सिनाले शान्ति प्रक्रियाका बाँकी कामलाई टुंगोमा पुर्याउनका लागि सबै राजनीतिक दलहरुलाई एकै ठाउँमा उभिन आग्रह गरेका छन्।
त्रिभुवन विश्व विद्यालयको द्वन्द्व, शान्ति र विकास विभाग र रोटरी क्लब जाउलाखेलले बिहीबार काठमाडौंमा आयोजना गरेको ‘बृहत शान्ति सम्मेलन २०८०’ मा बोल्दै अध्यक्ष तिमिल्सिनाले राजनीतिक दलले दलीय स्वार्थ त्यागेर शान्ति प्रक्रियाका बाँकी काम पूरा गर्न आग्रह गरेका हुन्।
उनले दलहरुले आफ्ना मानिसलाई उन्मुक्ति दिने उद्देश्य राखेकै कारण शान्ति प्रक्रियाका बाँकी काम पूरा हुन नसकेको बताए। ‘सबै दलहरु पीडितलाई न्याय दिने र पीडकलाई सजाय दिन एकै ठाउँमा उभिनुपर्छ,’ अध्यक्ष तिमिल्सिनाले भने, ‘सबै दलले पीडित जो भए पनि मेरा हुन, र पीडक जो सुकै हुन मेरा होइनन् भनेर जाँदा समस्या समाधान हुन्छ।’
उनले सशस्त्र द्वन्द्वका पीडीतहरुका समस्या सुन्न र सम्बोधन गर्न तयार नभएकै कारण शान्ति सम्झौतामा हस्ताक्षर गर्ने राज्य र विद्रोही पक्ष अहिले सहकार्य गरिरहेको बेला पनि समस्या समाधान हुन नसकेको बताए।
अध्यक्ष तिमिल्सिनाले दलहरुले अन्तहीन दाउपेच छाडेर पीडीतहरुले उठाउँदै आएका माग सम्बोधन गर्न चरणबद्ध छलफल गर्न पनि आग्रह गरे। संसदीय समितिमा पीडीतका मुद्दाहरुमा चरणबद्ध रुपमा छलफल गर्ने र निकास निकाल्नु नै अहिलेको उत्तम विकल्प भएको उनको भनाइ थियो।
उनले सत्तामा पुग्न र सत्ताबाट गिराउनका लागि दलहरु बढी सक्रिय भएकाले शान्ति प्रक्रिया ओझेलमा पार्न गएकोतर्फ सचेत पनि गराए।
द्वन्द्वविद् डा विष्णुराज उप्रेतीले प्रस्तुत गरेको ‘शान्ति सम्झौता कार्यान्वयनका १७ वर्ष, उपलब्धि, चुनौती र अगाडिको बाटो’ विषयका कार्यपत्रमाथि शान्ति सम्झौताको समयमा मध्यस्तकर्ता र वार्ता समितिका सदस्यहरु लगायत राजनीतिशास्त्रीहरुले टिप्पणी गरेका थिए।
नेपाली कांग्रेसका नेता कृष्णप्रसाद सिटौलाले दलहरुकाबीचमा दृढ इच्छाशक्तिसहित शान्ति र न्यायको भावनालाई आत्मासाथ गर्न सके समस्या समाधान गर्न सहज रहेको धारणा व्यक्त गरे।
यस्तै नेकपा एमालेका उपमहासचिव प्रदीपकुमार ज्ञावलीले सहमतिका नाममा प्रधानमन्त्री हतारिएको र एउटै विषयमा मात्रै सहमति खोज्दा समस्या समाधान नभएको आरोप लगाए। उनले संक्रमणकालीन न्याय निरुपण गर्न आवश्यक रहेको चर्चा गर्दै विस्तृत शान्ति सम्झौताले हिंसा र द्वन्द्वलाई शान्तिमा बदल्न महत्त्वपूर्ण भूमिका निर्वाह गरेको उल्लेख गरे।
नेकपा माओवादी केन्द्रका महासचिव देव गुरुङले शान्ति प्रक्रियाको अन्तरवस्तुमा दलहरुकाबीचमा विमति नरहेको तर प्रक्रियामा मात्रै विमति रहेका कारण समस्या समाधान नभएको बताए।
पूर्वसभामुख दमननाथ ढुंगानाले शान्ति प्रक्रियालाई टुंगो लगाएर मात्रै प्रधानमन्त्री संयुक्त राष्ट्रसंघको महासभामा जानुपर्नेमा त्यसो नभएको भन्दै असन्तुष्टि व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
