राजनीति

दोस्रो दिन पनि शिक्षक आन्दोलन जारी, काठमाडौंको यातायात अस्तव्यस्त

निमेषजंग राई बिहीबार, असोज ४, २०८० १३:५१

काठमाडौं- विद्यालय शिक्षा विधेयकको विरोधमा देशभरबाट आएका शिक्षकहरूको आन्दोलन दोस्रो दिन बिहीबार पनि जारी छ। सरकारले संसद्‌मा दर्ता गरेको उक्त विधेयकका प्रावधानविरुद्ध शिक्षकहरूले बुधबारदेखि काठमाडौं केन्द्रित आन्दोलन सुरु गरेका हुन्।

आन्दोलनरत शिक्षकहरू माइतीघरदेखि प्रदर्शन गर्दै नयाँ बानेश्वरस्थित निषेधित क्षेत्र पुगेका छन्। शिक्षकहरूको आन्दोलनका कारण काठमाडौंको माइतीघर-बानेश्वर तथा आसपासका क्षेत्रमा यातायात अस्तव्यस्त बनेको छ। बागमती, धोबीखोला, मनोहरासहितका कोरिडर तथा भित्री बाटोमा पनि सवारीको अत्यधिक चाप देखिएको छ।

बुधबार काठमाडौंमा विशाल प्रदर्शन गरेका शिक्षकहरू बिहीबार बिहान सरकारसँग वार्तामा बसेका थिए। आन्दोलनरत शिक्षक र सरकारबीच बिहान ८ बजेदेखि वार्ता सुरु भएको छ। गृह मन्त्रालयमा भएको उक्त वार्ता निष्कर्षविहीन सकिएको थियो। मन्त्रालयमा भएको वार्तामा सकारात्मक छलफल भए पनि कुनै निष्कर्ष भने ननिस्किएको शिक्षक नेताहरुले जनाएका छन्।

वार्तामा सरकारको तर्फबाट उपप्रधान तथा गृहमन्त्री नारायणकाजी श्रेष्ठ, शिक्षा विज्ञान तथा प्रविधि मन्त्री अशोक कुमार राई र शिक्षा सचिव सुरेश अधिकारी लगायत सहभागी थिए। यस्तै, आन्दोलनरत शिक्षकका तर्फबाट शिक्षक महासंघकी अध्यक्ष कमला तुलाधर तथा नेपाल शिक्षक संघ, नेपाल राष्ट्रिय शिक्षक संगठन र अखिल नेपाल शिक्षक संगठनका प्रतिनिधिहरु सहभागी थिए।

विधेयक फिर्ता नभएसम्म आन्दोलनबाट फिर्ता नहुने अडान उनीहरूको छ।