काठमाडौं– यतिबेला वैज्ञानिक जगतमा मेक्सिकोको संसद्मा प्रस्तुत गरिएको एलियन शवका कारण खलबली मच्चिएको छ। कैयौंले यसलाई एक स्टन्ट मात्र भनेका छन् भने कैयौंले पृथ्वीमा एलियनको आवतजावतलाई पुष्टि गर्ने आधार मानेका छन्।
गतसाता मेक्सिकोको संसद्मै एलियन मानिएका जीवको दुईवटा शवलाई प्रस्तुत गरिएको थियो। संसद्ले यी शव एलियनको हो वा पृथ्वीमा रहेका कुनै अन्य जीवको हो भन्नेबारेमा जाँच गर्न निर्देशन दियो।
जाँचपछि जुन रिपोर्ट आएको छ त्यसले नासाजस्तो वैज्ञानिक संस्थासम्मलाई हैरानीमा पारेको छ। यद्यपि, नासाले भने यी शव एलियनको भएको दाबीलाई खारेज गर्दै आपराधिक स्टन्टको संज्ञा दिएको छ।
तर रिपोर्टमा भने यी शव कुनै अन्य कंकाल जोडतोड गरिएको नभइ पूरा कंकाल रहेको पाइएको छ। जाँचपछि शवलाई अलग–अलग कंकाल जोडेर नबनाइएको पाइएको हो।
एलियनको शवलाई मेक्सिकन नेवीका फरेन्सिक डाक्टर जोश बेनिटेजले परीक्षण गरेका हुन्। मेक्सिकन नेवीमा हेल्थ साइन्स एण्ड रिसर्च इन्टिट्यूटका डाइरेक्टरसमेत रहेका उनले कंकालको जाँचपछि कुनै समय एलियन जीवित भएको र शरीरमा अण्डासमेत पाइएको बताएका छन्।
मृत्युअघि उक्त जीव गर्भवतीसमेत रहेको अनुमान गरिएको छ। साथै उनले यी शवसँग मानिसको कुनै लेनादेना नभएको बताएका छन्।
मेक्सिकन पत्रकार तथा यूएफओलोजिष्ट जेम मोसानले यी कंकालसँग मानिसको इभोलुसनको कुनै सम्बन्ध नभएको दाबी गरेका थिए। मेक्सिकोको संसद्मा पहिलोपटक एलियनको शव पेस गर्दै मोसानले भनेका थिए, ‘यो शव पेरुको एक खानीमा भेटिएको थियो। जो करिब एक हजार वर्ष पुरानो हो।’ मोसानका अनुसार यो विश्व इतिहासको खोजमध्ये अहिलेसम्मकै महत्त्वपूर्ण खोज हो।
यद्यपि कैयौं वैज्ञानिकले विश्वभर भाइरल भइरहेको कथित एलियनको शवलाई खारेज गर्दै यसलाई एक आपराधिक गतिविधि बताएका छन्। नासाका वैज्ञानिक डा. डेभिड स्पर्गेलले मोसानले कथित एलियनको शवको तथ्यांक किन सार्वजनिक गर्दैनन् भनेर प्रश्न गरेका थिए।
रोयटर्सले मोसानको अफिसको एक स्टुडियो रुपमा राखिएका ती एलियन शवहरुको तस्बिर खिचेको थियो।
यी तस्बिरहरुमा एलियन मानिसको जस्तै दुई आँखा, एक मुख, दुई हात र दुई खुट्टा रहेको देख्न सकिन्छ। यद्यपि, यसको हातमा मात्र तीनवटा औंला देख्न सकिन्छ।
मोसानले यी शव पृथ्वीमा रहेका कुनै पनि जीवभन्दा भिन्न रहेको प्रमाणित गर्न सक्ने दाबी गरेका छन्। संसद्मा सुनुवाइका क्रममा मोसानले यी एलियन शव एक हजार वर्ष पुराना रहेको र यीनको पृथ्वीमा रहेका कुनै पनि जीवसँग सम्बन्ध नरहेको बताएका छन्।
दुई शव महिला एलियनको रहेकोसमेत मोसानले बताएका छन्। जसको शरीरमा अण्डासमेत भेटिएका छन्। रोयटर्सका अनुसार मोसानको कार्यस्थलमा एलियन र यूएफओसँग जोडिएका आर्टवक्ससमेत छन्।
मोसानले यी दुवै शवलाई क्लारा र मोरिशियो नामसमेत दिएका छन्। सामाजिक सञ्जाल र सुनुवाइका क्रममा मोसानले एलियन शवमा भएको डीएनए परीक्षण र कार्बन टेस्टिङसँग सम्बन्धित रिपोर्टसमेत साझा गरेका छन्।
मेक्सिकोको नेशनल अटोनमस यूनिभर्सिटीका इन्टिट्यूट अफ एष्ट्रोनोमीकी वैज्ञानिक जुलियता फिएरोका अनुसार यो पूरै घटना कुनै रहस्यमय होइन। उनले विश्वविद्यालयका तर्फबाट स्याम्पल जाँचमा कार्बन–१४ पाइएको जानकारी दिएकी छन्।
यी स्याम्पल अलग–अलग समयका शवको दिमाग र स्किन टिश्यूको हुनसक्ने उनले बताएकी छन्। पृथ्वीका जीवभन्दा भिन्न देखिने कुनै पनि प्रमाण तत्कालल नभेटिएको उनको दाबी छ। एजेन्सीहरुको सहयोगमा
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775812183.jpg)
-1764146706.png)
-1779545841.jpg)
