काठमाडौं- नेपाली कांग्रेसका केन्द्रीय सदस्य डा गोविन्द पोखरेलले लुम्बिनी प्रदेशमा मन्त्रीको संख्या बढाउन नहुने मत राखेका छन्। त्यसो गर्नु जनताप्रति गैरजिम्मेवार हुनु हो भन्ने उनको मत छ।
‘देशमा गरिखाने, उत्पादन र सेवा दिएर रोजगारी र स्वरोजगार सिर्जना गर्ने र कर तिर्ने वर्गका धेरैले दिनहुँ आत्महत्याको बाटो रोजेका खबरहरू आइरहेका छन्’, सामाजिक सञ्जालमा उनले लेखेका छन्, ‘तिनीहरूको समस्या समाधान गर्नु त कता हो कता, राजनीति गर्नेहरूले नैतिकता, देश र जनताप्रति आफ्नो जिम्मेवारी महसुस नगरी मन्त्री बाँड्ने र आफ्नो शक्ति र पद प्राप्त गर्न जे पनि गर्ने काम गर्न अग्रसर हुनु भनेको नैतिक रुपले पतित हुने साथै देश र जनताप्रति गैरजिम्मेवार हुनु हो।’
उनले लुम्बिनी प्रदेशका मुख्यमन्त्रीले मन्त्रीको संख्या नबढाउने आशा पनि व्यक्त गरेका छन्। तर उनले मन्त्रीको संख्या बढाए संसद्को उचित प्रक्रियाबाट रोक्न प्रदेश सांसदहरूलाई आग्रह गरेका छन्। उनले अन्य प्रदेशमा पनि त्यस्ता काम गरेर फजुल खर्च बढाउन दिन नहुने बताएका छन्।
लुम्बिनी प्रदेशमा मन्त्रालय र मन्त्रीको संख्या बढाएर भागबण्डा मिलाउने प्रयास केही महिनायता हुँदै आएको छ। त्यसप्रति विरोध पनि भइरहेको छ।
कांग्रेसको लुम्बिनी प्रदेशको कार्यसम्पादन समितिको केही दिनअघिको बैठकले प्रदेशमा मन्त्रालय थप्दा आर्थिक भार थप हुने र जनताको बीचमा नकारात्मक सन्देश जाने भन्दै मन्त्रालय नबढाई सरकारलाई पूर्णता दिन मुख्यमन्त्री डिल्ली चौधरीलाई निर्देशन गर्ने निर्णय गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
