काठमाडौं– शुक्रबार राति काठमाडौंको तीनकुनेस्थित गैह्रीगाउँमा भएको सामूहिक हत्या प्रकरणमा संलग्न सञ्जय भण्डारीलाई प्रहरीले पक्राउ गरी आइतबार साँझ सार्वजनिक गरेको छ।
सिन्धुपाल्चोकको बाह्रविषे नगरपालिका–९ स्थायी घर भइ हाल काठमाडौंको काँडाघारी वीरेन्द्र चोक बस्ने २३ वर्षीय भण्डारीलाई आइतबार पक्राउ गरेको थियो। मोटरसाइकलको ठक्करको निउमा चार जनाको सामूहिक हत्या गरेको उनले स्वीकारेका छन्।
शुक्रबार ९ बजेर ४५ मिनेटदेखि १० बजेर १५ मिनेटको बीचमा उक्त हत्या भएको प्रहरीले जनाएको छ। मृतकहरुमा दोलखाको कालिन्चोक गाउँपालिका ८ घर भइ हाल काठमाडौं–३२ स्थित दिव्य स:मिलमा सुरक्षा गार्डको रुपमा कार्यरत ५६ वर्षीय कुमार भुजेल, उनकी पत्नी ५० वर्षीया अम्बिका भुजेल, उनकी आमा ७६ वर्षीया सुभद्रा भुजेल र धनकुटाको भिरगाउँ–२ घर भइ उक्त स:मिलमा दाई नाता पर्ने दीपेन्द्र राईसँग बस्दै आएका २१ वर्षीय नवीन राई रहेका छन्।
भण्डारीलाई आइतबार झोला र हत्यामा प्रयोग गरेको खुकुरीका साथमा नियन्त्रणमा लिएको थियो। पक्राउ परेपछि उनले हत्या गरेको स्वीकार गरेका थिए। पक्राउ पर्दा हत्या गर्दा लगाएको कपडामा थिए उनी।
केही समयअघि मृतक नवीन भनिने विशाल राईले चलाएको मोटरसाइकलले भण्डारीलाई चाबहिलमा ठक्कर दिएको थियो। सोही विषयमा विवाद हुँदा भण्डारीलाई राईले कुटपिटसमेत गरेका थिए। सोही रिसीइबीका कारण हत्या भएको प्रहरीको प्रारम्भिक अनुसन्धानमा देखिएको छ।
उक्त घटनापछि आवतजावत गर्ने क्रममा भण्डारीले राईलाई उक्त स:मिलमा तीन/चार पटक देखेका थिए। शुक्रबार राईलाई भेट्न झोलामा खुकुरी बोकेर भण्डारी आफू बस्ने गरेको दिदी भिनाजुको डेराबाट निस्किएका थिए।
काँडाघारीबाट आएका भण्डारी बेलुका उक्त स:मिलको पछाडीपट्टीको बन्द गेटबाट माथि चढेर राईको कोठामा छिरे। प्रहरीका अनुसार राईलाई नदेखेपछि सोही कोठाको सोफामा बसिरहेको अवस्थामा केही क्षणपछि राई आए। अकस्मात भण्डारीलाई देखेपछि उनले कोठामा आएर किन बसेको भन्दै कुटपिट गरे।
कुटपिटपछि आवेगमा आएका भण्डारीले झोलाबाट खुकुरी निकालेर राईको टाउकोमा प्रहार गरी हत्या गरेको बयान प्रहरीसमक्ष उनले दिएका छन्। राईको हत्या गर्ने क्रममा कुमार भुजेलकी आमा सुभद्राले घटना देखेर कराएको जस्तो गरेपछि आफूलाई चिने घटना बाहिर आउने डरले सुभद्राको टाउकोमा खुकुरी प्रहार गरी हत्या गरेको प्रहरीले बताएको छ।
त्यतिनै बेला कुमार भुजेल घटनास्थलमा पुगेर फोन गर्न लागेकोजस्तो देखेपछि उनलाई पनि भण्डारीले टाउकोमा खुकुरी प्रहार गरी हत्या गरे। त्यसपछि कुमारकी पत्नी अम्बिका पनि सोही स्थानमा आएपछि घटना बाहिर नआओस भनी उनको पनि खुकुरी प्रहार गरी हत्या गरेको बयान भण्डारीले दिएका छन्।
प्रहरीले भण्डारीको बयान लिनका लागि सांकेतिक भाषाका विशेषज्ञ बोलाएको थियो। विज्ञको सहयोगमा भण्डारीको बयान लिइएको थियो। उनले सुरुमा कापीमा ‘आई किल्ड फोर पिपुल’ लेखेका थिए।
हत्यापछि भण्डारीले कुमारको शवलाई टहराको कुनामा रहेको शौचालय ढोका छेउमा फालेको तथा सुभद्राको शवलाई गोदाममा लगेर फालेको प्रहरीले बताएको छ। प्रहरीका अनुसार नवीनको हत्या रिसीइबीका कारण भए पनि अन्य तीन जनाको भने घटना बाहिर आउँछ भन्ने त्रासले हत्या गरेको खुलेको छ।
यसरी भागेका थिए भण्डारी
प्रहरीले भण्डारीलाई सीसीटीभी फुटेजका आधारमा पक्राउ गरेको हो। हत्यापछि खुकुरीसहित भागेका उनी सीसीटीभी फुटेजमा कैद भएका थिए। हत्यापछि बाहिर गेटमा केही आवाज आएको र बत्तिसमेत देखिएपछि उनी प्रवेश गरेकी पछाडीप्टीको गेटबाट हामफालेर भागेका थिए।
त्यहाँबाट निस्किएपछि कोटेश्वर चोक हुँदै वीरेन्द्रचोकस्थित दिदी भिनाजुको कोठामा सुतेका थिए। शनिबार बिहान उठेर खाना खाएपछि अघिल्लो दिनजस्तै उनी नक्सालस्थित विद्यालयमा साथीहरुसँग भेट्न पुगे। शनिबार उनी उतै बसे।
आइतबार बिहानै उठेर खाना खाइसकेपछि उनले आफूलाई प्रहरीले खोजिरहेको हुनसक्छ भन्ने आशंकाले सिन्धुपाल्चोक जाने तयारी गरे। काँडाघारी पुगेर सिन्धुपाल्चोकका लागि हिँडेका उनलाई प्रहरीले झोला र खुकुरीसहित पक्राउ गरेको हो। सीसीटीभीमा देखिएको हुलिया उनीसँग मिल्न गएपछि प्रहरीले नियन्त्रणमा लिएको थियो।
भण्डारी जन्मजात बोल्न नसक्ने रहेका छन्। सिन्धुपाल्चोकको बाह्रविषेमा कक्षा ८ सम्म अध्ययन गरेका उनले काठमाडौंमा सांकेतिक भाषामा कक्षा १२ पास गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
