काठमाडौं– एसिया कप सुरु हुनै लाग्दा धेरैको अनुमान थियो उपाधि भिडन्त भारत र पाकिस्तानबीच हुनेछ। उपाधिका लागि भारत र पाकिस्तान तेस्रोपटक आमुन्ने–सामुन्ने हुने आकलनका बीच दुई देशका क्रिकेट प्रशंसकले आ–आफ्नो टोलीको बलियो पक्षलाई देखाउँदै उपाधि जित्ने दाबी गर्न थालेका थिए। तर परिस्थिति पहिले आकलन गरेअनुसार बनेन।
केही दिन अगाडिसम्म एकदिवसीय क्रिकेटको विश्व वरीयतामा १ नम्बरमा रहेको टोली पाकिस्तान एसिया कपको सुपर फोरबाटै बाहिरिएपछि स्थिति फरक बनेको छ। र, अब एसिया कपको उपाधिका लागि भारत भर्सेस श्रीलंकाको स्थिति बनेको छ।
सुपर फोरसम्म पाकिस्तानको यात्रा जति सहज थियो, त्यति नै अनेपेक्षित उसको बहिर्गमन बन्यो। समूह चरणमा एउटा पनि हार नबेहोरी सुपर फोरमा पुगेको पाकिस्तानले त्यसपछिका खेलमा भने अनपेक्षित हार बेहोर्नुपर्यो।
पाकिस्तानपछि श्रीलंकालाई पनि हराउँदै भारतले १ खेल अगावै फाइनलमा आफ्नो स्थान सुरक्षित गरेको थियो। भारतसँग पराजित भएपछि सुपर फोरबाटै बाहिरिने चिन्तामा रहेको श्रीलंका अन्तिम खेलमा पाकिस्तानलाई २ विकेटले पराजित गर्दै फाइनलमा पुग्यो।
भारत भर्सेस श्रीलंका
सन् १९८४ देखि सुरु भएको एसिया कपको यसपटक १६औं श्रृङ्खला हो। हालसम्म भारतले सबैभन्दा धेरै ७ पटक एसिया कपको उपाधि जितेको छ। भारतपछि श्रीलंकाले ६ पटक एसिया कपको उपाधि जितेको छ।
उपाधिका लागि भारत र श्रीलंकाबीच ८ पटक भिडन्त भएको छ। उपाधिका लागि भएका ८ मध्ये ५ प्रतिस्पर्धामा भारत विजयी भएको छ। श्रीलंकाले भारतलाई हराएर ३ पटक उपाधि जितेको छ। एसिया कपको उपाधिका लागि भारत–श्रीलंका आइतबार नवौं पटक एक–अर्काविरुद्ध मैदान उत्रिँदैछन्।
श्रीलंकाले सन् १९९७, २००४ र २००८ मा भारतलाई हराएर उपाधि जितेको छ। यस्तै, भारतले सन् १९८४, १९८८, १९९०–९१, १९९५ र २०१० मा श्रीलंकालाई हराएर उपाधि जितेको छ।
एसिया कपमा भारत र श्रीलंका दुवै टोलीको इतिहास कमजोर छैन। तर वर्तमान भने भारतको बलियो छ। भारतले जारी एसिया कपको फाइनलसम्म पुग्दा एउटा पनि हार बेहोरेको छैन। समूह चरणमा पाकिस्तानसँग बराबरी खेल्नु बाहेक अन्य खेलमा भारतले जित हासिल गरेको छ। यद्यपि केही खेलमा भने भारतीय टोलीको कमजोरी पनि उदाङ्गिएको छ।
पहिलोपटक एसिया कप खेलेको नेपालसँग कमजोर फिल्डिङ गरेको भारत अहिले कमजोरी सच्याएर बलियो बनेको छ। पाकिस्तानसँग रोमाञ्चक जित हासिल गरेको श्रीलंकाको पनि बलिङ बलियो देखिएको छ। तर भारतीय बलरसामू आफ्ना ब्याटर नचल्दा सुपर–फोरको एउटा खेलमा २१४ रनको ‘सामान्य’ लक्ष्य पाउँदा पनि श्रीलंका १७२ रनमै अलआउट भएको थियो।
लामो ब्याटिङ लाइनअप रहेको श्रीलंकालाई भारतले कमजोर भने आकेको छैन होला। श्रीलंकासँग कुसल परेरा, समवीरा र असालंका जस्ता मध्यक्रमका भरपर्दा ब्याटरहरु छन्। विकेटकिपर कुसल मेन्डिस पनि राम्रा ब्याटर हुन्। यस पटकको एसिया कपमा उनले २९०को आँकडा बनाएका छन्। पछिल्ला ४ खेलमध्ये उनले ३ खेलमा अर्धशतक पार गरेका छन्।
श्रीलंकालाई ‘होम ग्राउण्ड’को अनुभवले पनि फाइदा पुग्नेछ। साथै समर्थकको पनि साथ हुनेछ। फाइनल खेल हुने कोलम्बोको खेल मैदानको ‘विशेषता’ पनि श्रीलंकाको पक्षमा छ। स्पिनरमैत्री पिच रहेको कोलम्बोमा श्रीलंकाका स्पिनरले भारतीय ब्याटरलाई अप्ठ्यारो पार्न सक्छन्। भारतीय ब्याटरले खुलेर खेल्न पाएनन् भने नतिजा श्रीलंकाको पक्षमा पनि जान सक्छ। सुपर फोरको म्याचमा श्रीलंका भारतलाई २१३ मै रोक्न सफल भएको थियो।
उपाधि दाबेदार भारत उच्च मनोवलका साथ फाइनल पुगेको छ। समूह चरणमा पाकिस्तासँग बराबरी खेलको भारतले नेपालसँग १० विकेटको जित निकालेको थियो। सुपर फोरमा श्रीलंका र पाकिस्तानलाई हराएर फाइनलमा स्थान पक्का गरेको थियो।
भारतका अधिकांश खेलाडीहरु अहिले उच्च फर्ममा रहेका छन्। ब्याटिङको नेतृत्च कप्तान रोहित शर्माले गरिरहेका छन्। कप्तान रोहितले ४ पारीमा औसतमा ६५ रन बनाएका छन्। उनले १९४ रन बनाएका छन् भने पछिल्ला ३ खेलमा अर्धशतक बनाएका छन्।
सुपर फोरमा पाकिस्तानको सामना गर्दा रोहितले शुभमन गिलसँग ओपनिङ गरेका थिए। आक्रामक ५० रन बनाउँदै रोहितले आफू टप फर्ममा फिर्ता आएको संकेत दिएका थिए। सोही खेलमा मध्यक्रमका ब्याटर विराट कोहली र केएल राहुलले शानदार शतक प्रहार गरेका थिए। हार्दिक पाण्ड्या र इशान किसनले पाकिस्तानविरुद्ध पहिलो खेलमै शानदार प्रदर्शन गरेका थिए। ब्याटिङमा भारतको ओपनिङसँगै मध्यक्रम पनि बलियो छ।
भारतको बलिङ पनि कमजोर छैन। श्रीलंकाविरुद्ध कुलदीप यादव भारी पर्ने देखिन्छ। किनकि सुपर फोरको म्याचमा श्रीलंकाका ४ जना महत्त्वपूर्ण ब्याटरलाई कुलदीप एक्लैले आउट गरेका थिए। कुलदीपले जारी एसिया कपका २ खेलमा ९ विकेट हात पारेका छन्। उनको सहयोगका लागि रविन्द्र जडेजा छन्, जसले किफायती बलिङ गर्दै महत्त्वपूर्ण विकेट लिने गरेका छन्।
भारतीय टिममा ‘धारिलो हतियार’ जसप्रित बुमराह छन्। चोटपछि खेलमा फर्किएका उनी अहिले फर्ममा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
