बालेन शाह (फाइल तस्बिर)
काठमाडौं– काठमाडौं महानगरपालिकाका मेयर बालेन्द्र शाह (बालेन)ले सरकारले १०० रोपनी जग्गा उपलब्ध गराए क्रिकेट रंगशाला बनाउनका लागि पहल गर्ने बताएका छन्। एसिया कप क्रिकेटमा नेपाल–भारतको खेल हेर्न श्रीलंका पुगेका बालेनले सामाजिक सञ्जालमा आफ्नो ‘अनुभूति’ साझा गर्दै सरकारले जग्गा उपलब्ध गराएको खण्डमा महानगरले क्रिकेट रंगशाला निर्माणका लागि पहल गर्ने बताएका हुन्।
सरकारले जग्गा उपलब्ध गराएको अवस्थामा ८०-९० करोड रुपैयाँमा नै रंगशाला बन्न सक्ने बालेनको भनाइ छ।
‘नेपाल सरकारले काठमाडौं महानगर वा आसपासमा आवश्यक १०० रोपनी जग्गा उपलब्ध गराउँछ भने काठमाडौं महानगरबाट रंगशाला बनाउन हामी पहल गर्नेछौँ। यस्तो मात्रै रंगशाला र केही ठुला खेलहरु हुने हो भने खेल विकास हुन सक्छ,’ बालेनले सामाजिक सञ्जालमा लेखेका छन्।
नेपाल र भारतबीचको खेल भएको पल्लेकेल स्टेडियम पनि काठमाडौंको कीर्तिपुरस्थित त्रिभुवन विश्वविद्यालयको क्रिकेट मैदानको स्तरकै रहेको उल्लेख गर्दै बालेनले त्यहाँ केही थप सुविधा भने उपलब्ध रहेको बताएका छन्।
क्रिकेट हेर्नका लागि आफू श्रीलंका जाँदा त्यहाँको अध्यागमनका कर्मचारीले ‘यति धेरै नेपालीहरु एक्कासी श्रीलंका किन आइरहेका छन्?’ भनेर सोधेको बालेनको भनाइ छ। रंगशालामा ४०–५० जनाको संख्यामा मात्रै भारतीय समर्थकहरु रहेकोमा नेपाली फ्यानहरु भने १ हजार ५०० देखि २ हजारको संख्यामा रंगशाला पुगेको बालेनले उल्लेख गरेका छन्।
‘नेपाली क्रिकेट फ्यानहरु विभिन्न देशबाट श्रीलंका पुगेका थिए। अनुमानित हिसाब गर्ने हो भने त्यहाँ पुगेका सबै नेपालीहरुको मात्रै खर्च ३० करोड पुग्यो होला,’ बालेनको भनाइ छ।
बालेनले सामाजिक सञ्जाल फेसबूकमा लेखेका छन्– ‘फ्यानको रुपमा क्रिकेट हेर्न श्रीलंका पुग्दा श्रीलंकाको अध्यागमन (Immigration) को कर्मचारीको प्रश्न थियो, "यति धेरै नेपालीहरु एक्कासी श्रीलंका किन आइरहेका छन् ?" श्रींलंकाको अध्यागमन चकित पर्ने गरिको संख्यामा नेपालीहरु त्यहाँ पुग्दै थिए।
त्यसपछि स्टेडियम पुग्दा देखियो, त्यहाँ ४०-५० जना जति भारतीय क्रिकेट समर्थक थिए भने नेपालीहरुको संख्या १५०० देखि २००० को बीचमा थियो। नेपाली क्रिकेट फ्यानहरु विभिन्न देशबाट श्रीलंका पुगेका थिए। अनुमानित हिसाब गर्ने हो भने त्यहाँ पुगेका सबै नेपालीहरुको मात्रै खर्च ३० करोड पुग्यो होला।
टिभीमा देखिने विराट, रोहितहरुलाई आँखा अगाडि मैदानमा देख्न पाएका थियौँ। उनीहरुको हाउभाउलाई प्रत्यक्ष अनुभव गर्न पाइन्थ्यो। खेलको सुरुमा उनीहरुको हाउभाउ नेपालीलाई सजिलै जितिनेमा ढुक्क भए जस्तो देखिन्थ्यो। विश्वकै उत्कृष्ट खेलाडीहरुमा नेपालसँग खेल्दा त्यस्तो हाउभाउ देखिनु अस्वभाविक पनि थिएन। तर जसै खेल बढ्यो, जसै नेपालको ब्याटिङ अगाडि बढ्दै गयो, तब त भारतीय खेलाडीहरुको हाउभाउ पुरै रक्षात्मक बनिसकेको थियो। ठिक त्यहि बेला हामीले क्रिकेट जित्यौँ। अन्तिम नतिजा जे आए पनि हामीले यसपटकको एसिया कपमा पाउने जति पाइसकेका थियौँ।
गजबको कुरा के थियो भने त्यहाँ खेल भइरहेको रंगशाला पनि हाम्रो त्रिविको क्रिकेट स्टेडियम जस्तै थियो, केही प्याराफिट र अलि बढी सुविधा। नेपालमा त्यही स्तरको रंगशाला जग्गा बाहेक ८०-९० करोडमा नै बन्छ सायद।
यसैले नेपाल सरकारले काठमाडौं महानगर वा आसपासमा आवश्यक १०० रोपनी जग्गा उपलब्ध गराउँछ भने काठमाडौं महानगरबाट रंगशाला बनाउन हामी पहल गर्नेछौँ। यस्तो मात्रै रंगशाला र केही ठुला खेलहरु हुने हो भने खेल विकास हुन सक्छ। र, एकै खेलबाटै करोडौँ रकम आर्जन हुन सक्छ। त्यो बाहेक खेलाडी र तल्लोतह (Grassroot) मा सिकाइ सुविधाका लागि अबको ३ बर्षमा सकेसम्म हरेक वडामा एक हुने गरी बलिङ नेट (Bowling Net) राख्ने प्रबन्ध पहिले नै गरि सकेको छौँ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771838848.png)
-1771837565.png)
-1764146706.png)
