काठमाडौं– मौसम बाधक नबनेको खण्डमा एसिय कप २०२३ अन्तर्गत सोमबार नेपाली क्रिकेट टिम र भारतीय क्रिकेट टिमको ऐतिहासिक भेट हुँदैछ। नेपालले अन्तर्राष्ट्रिय क्रिकेट खेल्न थालेको २७ वर्षपछि श्रीलंकाको क्यान्डीस्थित पल्लिकेले अन्तर्राष्ट्रिय क्रिकेट रङ्गशालामा नजिकको छिमेकीसँग पहिलो भेट जुरेको हो।
भूगोलले निकट भारतसँग क्रिकेटको खेलस्तरमा नेपाल हालसम्म निकै दूर रह्यो। नेपाली खेलाडीहरूले पछिल्ला दिनहरूमा गरिरहेको उत्कृष्ट प्रदर्शनको नतिजा यो ऐतिहासिक भेट हो। नेपाली क्रिकेट समर्थकले भारतसँगको खेलमा नतिजालाई लिएर कुनै तनाब लिएका छैनन्, किनभने उनीहरू क्रिकेटको बादशाह भारतसँगको खेललाई लिएर मात्रै उत्साहित छन्।
एसिया कप २०२३ को सुपर ४ मा जान नेपाललाई भारतसँग जित्नैपर्ने हुन्छ भने भारतलाई नेपालसँग हार्ने छुट छैन। पाकिस्तानसँग खेल वर्षाले रोकिएपछि अंक बाँडेको भारतलाई नेपालसँग बराबरी गर्दा मात्रै पुग्नेछ। पानीले खेल रद्द भएको अवस्थामा भारतलाई हाइसञ्चो छ। तर, पाकिस्तानसँग ब्याटिङ गर्दा जम्मा २६६ रन बनाएको भारतको टिमको प्रदर्शनलाई लिएर भारतीय क्रिकेटप्रेमी नै बेखुश छन्। एउटा पनि खेल नखेली सुपर ४ मा पुग्दा भारतको टिममाथि प्रश्नहरू हुने भारतीय सञ्चारमाध्यम आजतकले उल्लेख गरेको छ। आजतकले लेखेको छ,‘पाकिस्तानसँग पहिलो इनिङमा कमजोर प्रदर्शन गरेको भारतीय टिमसँग यसरी अर्को चरणमा पुग्दा उत्तर होइन, प्रश्न हुनेछ।’
त्यसैले नेपालसँग खेल खेलेर आफ्नो बिग्रिएको लय फिर्ता भएको सन्देश भारतीय टिमले दिन चाहेको भारतीय मिडियाले लेखेका छन्। तुलनात्मक रुपमा कमजोर नेपालविरुद्ध शानदार प्रदर्शन गरेर अर्को चरणमा पुग्नेगरी भारतीय टिमले तयारी गरिरहेको छ।
भारतसँग तुलना
भारतले र पाकिस्तानले नेपाललाई प्रतिद्वन्द्वीका रुपमा नहेरेको बीबीसी हिन्दीले उल्लेख गरेको छ। नेपाली खेलाडीसँग पाकिस्तानले जसरी प्रेम र प्रोत्साहन जताइरहेका थिए, त्यसरी नै भारतीय टिम पनि प्रस्तुत हुने उल्लेख छ।
क्रिकेटमा विश्व विजेता बनिसकेको भारतसँग भर्खरै एसिया कपका लागि योग्य बनेको नेपाल तुलनामा निकै कमजोर छ। मुख्यगरी टिमको अनुभवको कुरा गर्दा आकाश-पातल देखिन्छ।
तिव्र गतिको बलिङको कुरा गर्दा नेपालको सबैभन्दा उच्चतम् गति १३५ किलोमिटर प्रतिघण्टा हो, जबकि भारतीय खेलाडीका लागि यो सामान्य हो। भारतीय बलर औसतमा १५० किलोमिटर प्रतिघण्टाको रफ्तारमा बलिङ गर्छन्।
ब्याटिङमा झन् तुलना हुनसक्ने ठाउँ देखिदैन। भारतीय टिमका एक सदस्य विराट कोहलीले एकदिवसीय क्रिकेटमा अहिलेसम्म १२ हजार ९ सय रन बनाएका छन्। यसैगरी रोहित शर्मा १० हजारको आंकडा नजिक पुगेका छन्। नेपालका कप्तान रोहित पौडेलले जम्मा १ हजार ४ सय ६९ रन बनाएका छन्।
२४५ एकदिवसीय खेल खेलिसकेका कप्तान रोहित र ५३ एकदिवसीय खेल खेलेका रोहितको पनि तुलना गर्न मिल्दैन। भारतीय मुख्य बलर जसप्रित बुमराह श्रीमती सुत्केरी भएका कारण नेपालसँगको खेल खेल्ने छैनन्। यो राहतको विषय भए पनि अन्य स्टार बलरहरूले भरिएको भारतसँग नेपाली ब्याटर संघर्ष नै गर्नेछन्।
के हुन्छ रणनीति?
यति हुँदाहुँदै पनि एउटा गल्तीले खेल समाप्त पार्ने सम्भावना सँधै रहन्छ। त्यसैले भारतीय टिमले खेलका दौरान कुनै पनि कुरामा खेलबाड गर्नेछैन। उसले परिपक्व रणनीति बनाएर शानदार जित निकाल्ने कोशिस गर्नेछ।
एकदिवसीय विश्वकपको तयारीमा रहेको भारतले एसिया कपलाई त्यसको तयारीका रुपमा लिएको छ। मैदानमा उसले पहिलो रोजाइका खेलाडीीहरू नै नेपालबिरुद्ध उतार्नेछ।
दुई महिनापछि भारतमा हुने एकदिवसीय विश्वकपको तयारीको रूपमा हेरिएको एसिया कपमा भारत आफ्नो पहिलो रोजाइको टोली लिएर श्रीलङ्का पुगेको छ। त्यसैले नेपालविरुद्धको खेलमा पनि भारतले पहिलो टोलीलाई मैदानमा पठाउने छ।
भारतले नेपालसँगको खेललाई जतिसक्यो चाँडो टुंग्याउने रणनीति अख्तियार गर्ने खेल विश्लेषकहरूले बताइरहेका छन्। भारतले टस जितेमा फिल्डिङ रोज्ने सम्भावना बलियो रहेको छ।
टस जितेको अवस्थामा नेपालको पहिलो रोजाइ पनि फिल्डिङ नै हुनेछ। नतिजालाई तपसिलमा राखेर अनुभव हासिल गर्न मैदानमा उत्रिने नेपाली टोलीले भारतसँग धेरै भन्दा धेरै समय मैदानमा बिताउन यो उत्तर विकल्प हुन्छ।
भारतले नेपालसँगको खेलमा ब्याटिङ अर्डर परिवर्तन गर्ने संकेत पनि देखिएको छ। पाकिस्तानसँगको खेलमा भारतले तीन नम्बरमा इशान किसनलाई पठाउनेगरी घषणा गरेको थियो तर कप्तान रोहित शर्मा ११ रनमै आउट भएपछि विराट कोहली नै नम्बर ३ मा आए। जबकि घोषणा नम्बर ४ मा भएको थियो। उनी पनि सस्तैमा समेटिए र ६६ रन बनाउँदा भारतको मुख्य ४ ब्याटर पेभेलियन फर्किसकेका थिए। इशान किसनले हार्दिक पान्ड्यासँग १३८ रनको साझेदारी गर्दै पाकिस्तानबिरुद्ध भारतको इज्जत जोगाएका थिए। नेपालसँगको खेलमा किसन नम्बर ३ मै आउनसक्ने बताइएको छ।
सम्भावित–११
नेपाल– कुशल भुर्तेल, आशिफ शेख (विकेट किपर), रोहित पौडेल (कप्तान), आरिफ शेख, सोमपाल कामी, दीपेन्द्र सिंह ऐरी, गुलशन झा, कुशल मल्ल, करण केसी, सन्दीप लामिछाने, ललित राजवंशी।
भारत : रोहित शर्मा (कप्तान), शुभमन गिल, विराट कोहली, श्रेयश ऐयर, ईशान किशन (विकेट किपर), हार्दिक पान्ड्या, रवीन्द्र जडेजा, शार्दूल ठाकुर, कुलदीप यादव, मोहम्मद शमीर प्रसिद्ध कृष्णा, मोहम्मद सिराज।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766928868.png)
-1764146706.png)
-1766648928.png)
