सोमपाल कामी (फाइल तस्बिर)
काठमाडौं– नेपाली क्रिकेट टिमका अलराउन्डर सोमपाल कामीले भारतसँग खेल्न उत्साहित रहेको बताएका छन्। हाल श्रीलंकामा रहेका उनले क्रिकेट एसोसिएसन नेपालको अफिसियल भिडियोमार्फत् उक्त कुरा बताएका हुन्।
सोमपाल भन्छन्, ‘भारतसँग निकै खेल्नका लागि म निकै सकारात्मक छु। हामी राम्रो गर्न सक्छौं। सबै उत्साहित छन्। म पनि उत्साहित छु।’
उनले पाकिस्तानसँगको खेलमा नतिजा जस्तो आए पनि अनुभव राम्रो रहेको बताए। उनले भने, ‘पाकिस्तानसँग खेल्नु हाम्रा लागि फरक अनुभव थियो। नतिजा हाम्रो हातमा थिएन। विशेषगरी दोस्रो इनिङ बिग्रियो। जति तयारी गरेका थियौं, त्यति पनि गर्न सकेनौं। तर यो अनुभवले भविष्यमा राम्रो गर्न सकिन्छ।’ पाकिस्तानको बलिङ अट्याक अनुभव गरेको उल्लेख गर्दै विकेट नखसेको अवस्थामा अझै राम्रो गर्न सकिने आफूलाई लागेको बताए।
विश्वकै उत्कृष्ट बलरलाई फेस गरेको उल्लेख गर्दै सोमपालले बल सोचेको भन्दा तीव्र गतिमा आउँदा खेलाडीहरु केही हडबडाएको सुनाए। ‘हामीले ४० ओभरसम्म राम्रो गरेका थियौं। फिल्डिङमा मिस्टेक गर्यौँ। किनकि हामीले सोचेभन्दा तेज बल आयो। बलिङमा मेरो एउटा ओभर बिग्रियो।’
सोमपालले पाकिस्तानी कप्तान बाबर आजमको विकेट लिएका थिए। तर, उनले विकेट लिने समयसम्म आजमले व्यक्तिगत रुपमै १५० को आंकडा पार गरिसकेका थिए। त्यसैले आफूले विकेट लिँदा पनि उनी खुसी हुन नसकेको उनले संकेत गरेका छन्।
अनुभव सुनाउँदै उनले थपे, ‘बाबर विश्वकै नम्बर वान ब्याटर हुन्। उनको विकेट लिँदा एकदमै ढिलो भइसकेको थियो। ऊ स्मार्ट प्लेयर हो। उसले खेल अन्तिमसम्म लिएर गयो। उसले बेसिक सट र राम्रो तार्गेटसम्म लग्यो। त्यसबाट हाम्रा खेलाडीले सिक्नेछन्।’
आफूहरुलाई पाकिस्तानले ३०० रन सम्मको तार्गेट देला भन्ने लागेको भए पनि फिनिसिङ राम्रो गरेर ३४२ रन बनाएको सोमपालको भनाइ छ। अहिले नेपाली क्रिकैट टिममा एकले अर्कोलाई हौस्याउने र सहयोग गर्ने वातावरण रहेकाले आफूहरु अझै राम्रो गर्ने उनको विश्वास छ।
यहाँसम्म पुग्न धेरै प्रतियोगिता जितेको बताउँदै उनले टिभीमा हेर्ने गरेका टिमसँग खेल्ने अवसरले अझै अघि जाने सघाउने बताए। उनले थपे, ‘इन्डिया र पाकिस्तानको खेल हामीले सधैं टिभीमा हेरेका थियौं। अहिले हामीले उनीहरुसँग खेलिरहेको विश्वले हेरिरहेको छ। हामीसँग सम्भावना छ। हामीले नेपाललाई सधैं प्राउड फिल गराएका छौं। यसपल्ट पनि गराउनेछौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
