काठमाडौं– नेपालले पहिलोपटक एसिया कप क्रिकेट खेल्दै छ। बुधबारको डेब्यू खेलमा नेपालले बलियो टोली पाकिस्तानको सामना गर्दैछ।
विश्वविजेता टिमसँग खेल्ने वर्षौंदेखिको ‘सपना’ साकार हुन गइरहेका बेला क्रिकेटप्रेमीसँगै विभिन्न दलका नेताले समेत नेपाली टिमलाई जितको शुभकामना दिइरहेका छन्। संघीय संसद्का सभामुखदेखि काठमाडौं महानगरपालिका मेयर सम्मले नेपाली टोलीलाई जितको शुभकामना दिएका छन्।
‘आज (बुधबार)देखि सुरू हुने एसिया कप क्रिकेट प्रतियोगितामा पाकिस्तानविरुद्धको खेलमा रोहित पौडेलको नेतृत्वमा रहेको नेपाल टोलीलाई जीतका लागि हार्दिक शुभकामना व्यक्त गर्दछु,’ सभामुख देवराज घिमिरेले एक सन्देश जारी गर्दै भनेका छन्।
काठमाडौं महानगरपालिका मेयर बालेन शाहले पाकिस्तानसँग नेपाली खेलाडीले खेलेको अविश्वासिलो जस्तो लाग्न कौतुहलता मेटिने अवस्थामा पुगेको टिप्पणी गरेका छन्। उनले खेलका लागि सबै नेपालीलाई शुभकामना दिएका छन्।
बालेनले सामाजिक सञ्जालमा लेखेका छन्– ‘टीभीमा सोएब अख्तर, शाहीद अफ्रिदी, बाबर आजम, शाहीन अफ्रिदीहरुको खेल हेरेर रमाइन्थ्यो। विश्वकप विजेताहरुको देश र वरीयतामा उपल्लो क्रममा रहेका खेलाडी भएको टिमले सधैं रोमाञ्चकता दिन्थ्यो।
सोचिन्थ्यो, नेपाली टोलीले पनि यिनै खेलाडीहरुसँग खेल्दा कस्तो हुन्थ्यो! अफ्रिदीको योर्करलाई भुर्तेलले कसरी सामना गर्थे होलान्! सोमपालको बलिङमा बाबर आजमले कसरी कभर ड्राइभ हान्छन् होला! सन्दीपले रिजवानलाइ कसरी स्पिनमा नचाउँछ होलान्! यस्ता अविश्वासिला जस्ता लाग्ने कौतुहलता सधैं मनमा रहन्थ्यो। यो सपना आज केही समयमा पूरा हुँदै छ। नेपाली सबैलाई गर्व गर्ने ठाउमा पुर्याउने सम्पूर्ण टोलीलाई हार्दिक बधाई अनि खेलको लागि सम्पुर्ण नेपालीलाई शुभकामना। जय नेपाल।’
संघीय संसद्को प्रमुख प्रतिपक्ष दल नेकपा एमालेका अध्यक्ष एवम् पूर्व प्रधानमन्त्री केपी शर्मा ओलीले पनि नेपाली क्रिकेट टिमलाई शुभकामना दिएका छन्। उनले लेखेका छन, ‘र, प्रतीक्षाको घडी समाप्त भएको छ। नेपाली टीमले आज पहिलोपटक एसिया कप खेल्दै छ। यसका लागि हामी सबै नेपालीले लामो समयदेखि सपना देखेका थियौं। विश्वको नम्बर वान क्रिकेट टीम पाकिस्तानसँगको म्याचमा जितका लागि शुभकामना।’
नेपाली कांग्रेसका महामन्त्री गगन थापाले क्रिकेटका क्षेत्रमा नेपालले देख्दै आएको सपनाको पहिलो यात्रा सुरु हुन लागेको बताएका छन्। थापाले नेपाली टिमलाई शुभकामना दिँदै सामाजिक सञ्जालमा लेखेका छन्, ‘नेपाली राष्ट्रिय क्रिकेट टिमले आज पाकिस्तानको खेल सँगै एसिया कप २०२३ को यात्रा प्रारम्भ गर्नेछ। आजको खेल हाम्रा लागि यो संस्करणको मात्र नभएर लामो समयदेखि हामीले सपना देखेको ‘एसिया कप’को यात्राकै पहिलो खेल हो। म हाम्रो टिम विश्व क्रिकेटका महारथीहरूविरुद्ध मैदानमा उत्रेको हेर्न उत्साहित छु।’
परराष्ट्रमन्त्री एनपी साउदले पनि पनि नेपाली क्रिकेट टिमलाई बधाई दिएका छन्। ‘नेपाली राष्ट्रिय क्रिकेट टिम आज पाकिस्तानी टिमसँगको खेलसँगै एसिया कप २०२३ को यात्रा प्रारम्भ गर्दैछ। एसिया कपमा प्रथमपटक सहभागिता जनाइरहेको नेपाली क्रिकेट टिमलाई हार्दिक बधाई तथा उत्कृष्ट खेल प्रदर्शनका लागि शुभकामना।’
नेपाल र पाकिस्तानको खेल पाकिस्तानको मुल्तान क्रिकेट रंगशालामा नेपाली समयानुसार दिउँसो ३:१५ बजेदेखि सुरु हुँदैछ। एकदिवसीय वरीयतामा पहिलो नम्बरमा रहेको पाकिस्तानसँग १५औं वरीयताको नेपाल सुखद सुरुवात गर्ने लक्ष्यसहित मैदान उत्रिनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770352723.png)
-1764146706.png)
