काठमाडौं- ‘गुमनाम’ जस्तै रहेको अमेरिकन क्लब इन्टर मियामी अहिले चर्चा र सफलताको पर्याय बनेको छ। आफ्नो क्लब इतिहासमा यति धेरै चर्चा र सफलता मियामीले यसअघि कहिल्यै पाएको थिएन।
अझ क्लब इतिहासमै पहिलो पटक मियामीले उपाधि उचालेको छ। मेसी प्रेरित खेलमा नासभिललाई हराउँदै मियामीले लिग्स कपको उपाधि उचाल्यो।
उक्त प्रतियोगिताकै सर्वोत्कृष्ट खेलाडी बन्दै मेसीले गोल्डेन बल र सर्वाधिक गोलकर्ता बन्दै गोल्डेन बुट समेत जिते। अमेरिकाको मेजर लिग सकर (एमएलएस) क्लब मियामी यसअघि कहिल्यै उपाधि जित्ने हैसियतसम्म देखाउन सकेको थिएन। मेसी जानुपूर्व करिब १ दर्जन खेलमा जितविहीन भएको मियामीले मेसी आबद्ध भएपछिका ७ खेलमा ७ वटैमा जित निकाल्यो।
उपाधि दाबेदार हैसियतसम्म बनाउन नसकेको मियामीले मेसी आबद्ध भएपछि लिग्स कपको उपाधि जित्दै इतिहास कोर्यो। जहाँ मेसीले ७ खेलमा १० गोल १ असिस्ट गरे। मियामीका लागि आफूले खेलेका हरेक गोलमा मेसीले गोल गरे। जसले मियामीलाई उपाधिको हकदार मात्रै बनाएन क्लब इतिहासमै पहिलो पटक उपाधि जित्यो।
लिग्स कप, एमएलएस क्लब र मेक्सिकोको प्रिमियर लिग क्लबहरु सबैले प्रतिस्पर्धा गर्न पाउने प्रतियोगिता हो। यसअघि बुधबार भएको सेमिफाइनल जितेर फाइनल प्रवेश गरेसँगै मियामीले युरोपको युरोपियन च्याम्पियन्स लिग जस्तै मानिने उत्तर अमेरिका, मध्य अमेरिका तथा क्यारेबियन (कन्काफ) च्याम्पियन्स कपमा स्थान पक्का गरिसकेको थियो।
यसअघि उपाधि मात्रै होइन, कन्काफमा आफ्नो ठाउँ समेत सुरक्षित गर्न मियामीले सकेको थिएन।
लिग्स कपमा मेक्सिकोका १८ र एमएलएसका २९ गरी कुल ४७ क्बलले प्रतिस्पर्धा गरेका थिए। पहिलो पटक सबै क्लबलाई सहभागी गराइएकाले मात्रै मियामीले यो प्रतियोगिता खेल्ने अवसर पाएको हो। नत्र यस प्रतियोगिताका लागि मियामी छनोट समेत हुने अवस्था थिएन।
यो प्रतियोगिताबाट ३ टोली कन्काफ च्याम्पियन्स लिगका लागि छनोट हुन्छन्। कन्काफ च्याम्पियन्स लिगको विजेताले क्लब विश्वकप खेल्ने मौका पाएँछ। जहाँ महादेशीय च्याम्पियन्स लिग विजेताहरुको भेट हुने छ। जसमा युरोपदेखि अमेरिका, एसिया, अफ्रिकालगायत महादेशका च्याम्पियनहरुको भिडन्त हुन्छ। सन् २०१८ मा स्थापना भएको इन्टर मियामीले सन् २०२० देखि एमएलएस खेल्न थालेको हो।
आइतबार सम्पन्न निकै रोमान्चक खेलमा मियामीले बाजी मार्यो। खेलको २३औं मिनेटमा मियामीले गोल गर्दै अग्रता बनाएको थियो। डि-बक्स बाहिरबाट मेसीले गरेको प्रहारले जाली चुमेपछि मियामीले अग्रता बनायो।
पहिलो हाफमा १-० को अग्रता बनाएको मियामी दोस्रो हाफमा भने बराबरीमा आयो। भासभिलका लागि दोस्रो हाफको ५७औं मिनेटमा फाफा पिकल्टले गोल गरेपछि खेल १-१ को बराबरीमा आएको थियो। बाँकी समय दुवैतर्फबाट गोल नभएपछि खेल पेनाल्टी सुटआउटमा धकेलिएको थियो। जहाँ मियामीले बाजी मार्यो।
सुरुवाती पाँच पेनाल्टीमा दुवै टिमले ४-४ गोल गरेपछि थप पेनाल्टीमा खेल धकेलिएको थियो। जहाँ दुवैतर्फबाट २२ पेनाल्टी प्रहार भएका थिए।
पेनाल्टीको अन्तिम निर्णयक गोल मियामीको गोलरक्षकले गरे। ११ जनाले पेनाल्टी गर्दै मियामीले १० गोल गरेको थियो। अन्तिममा नासभिलका गोलरक्षकले गरेको पेनाल्टी प्रहार मियामीका गोलरक्षकले रोकेपछि पेनाल्टीमा १०-९ गोलको नतिजा निकाल्दै मियामीले उपाधि उचाल्यो।
यो उपाधिसँगै मियामीले ऐतिहासिक उपाधि त जित्यो नै मेसीले समेत आफ्नो नाममा रेकर्ड राखे। फुटबल इतिहासमा सबैभन्दा बढी ४४ उपाधि जित्ने खेलाडीको सूचीमा आफ्नो नाम लेखाए। यसअघि मेसी र ब्राजिलका लिजेन्ड डानी अल्भेसको नाममा समान ४३ उपाधि थियो। सन् २००४ देखि २०२३ सम्म गरी मेसीले ४४ टाइटल उपाधि उचाले।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791107799.jpeg)
-1786602170.png)
