काठमाडौं- शनिबार राति लोरिन्टेसँग खेल्दै लिग वान च्याम्पियन पेरिस सेन्ट जर्मेन (पीएसजी) ले सिजन २०२३/२४ को खेल सुरु गर्यो। लोरिन्टेसँगको खेलका क्रममा टोली घोषणा गर्दा पीएसजीले आफ्ना स्टार केलियन एमबाप्पेलाई समेटेको थिएन।
एमबाप्पेलाई टोलीबाट बाहिर राख्दै खेलेको खेलमा पीएसजी बराबरीमा रोकियो। च्याम्पियन पीएसजीले सोचेअनुसार राम्रो सुरुवात गर्न सकेन। लगत्तै त्यसको भोलिपल्ट आइतबार पीएसजी र एमबाप्पेबीच वार्ता भएको छ।
उक्त वार्ता तथा छलफलपछि पीएसजीले एमबाप्पेलाई टोलीमा समावेश गराएको आधिकारिक रुपमा पुष्टि गरिसकेको छ भने एमबाप्पे पनि प्रशिक्षणमा फर्किएका छन्।
यसअघि टोली बाहिर राखिएका र स्टेडियम (रंगशाला) बाट पोस्टरसमेत हटाइएका एमबाप्पे आइतबारदेखि भने प्रशिक्षणमा फर्किएका छन्। पानी बाराबर जस्तो अवस्थामा रहेका पीएसजी र एमबाप्पेबीच भने अहिले केही समझदारी भएको बुझिएको छ।
क्लबले सकारात्मक छलफल भएको र एमबाप्पे प्रशिक्षणमा फर्किएको बाहेक अन्य कुरा खुलाएको छैन। उनीहरुबीच के–के कुरामा सहमति भयो र एमबाप्पे टोलीमा फर्किए भन्ने अहिलेसम्म गोप्य राखिएको छ। पीएसजीले आउँदो आइतबार टुलुजसँग लिगको दोस्रो खेल खेल्दैछ। एमबाप्पे उक्त खेल खेल्न बताइएको छ।
यसअघि प्रि–सिजन टुरदेखि प्रशिक्षणबाट समेत एमबाप्पे आउटको घटनापछि पीएसजीले थप कठोर कदम चाल्दै उनको पोस्टर हटाउनुका साथै आफ्नो आधिकारिक स्टलबाट जर्सी बेच्न समेत प्रतिबन्ध लगाएको थियो।
एमबाप्पेलाई अहिले नै बेच्न चाहेको पीएसजीले कुनै पनि हालतमा उनलाई क्लबमा राख्ने मुडमा थिएन। जसअनुसार एमबाप्पेको ठाउँमा भन्दै पीएसजीले थप खेलाडी समेत अनुबन्धन गरिसकेको छ।
पीएसजीले बार्सिलोनाबाट उसमान डेम्बेले र बेनफिकाबाट अर्का पोर्चुगिज स्ट्राइकर रामोसलाई लोनमा भित्र्याएको छ। एमबाप्पेलाई अहिले नै बेचेर मोटो रकम लिने दाउमा पीएसजी छ भने एमबाप्पे भने १ वर्ष पीएसजीमै बस्दै फ्रि ट्रान्सफरमा अन्य क्लबमा जान चाहेका छन्। यही द्वन्द्व पीएसजीमा उत्कर्षमा पुगेको थियो। जसअनुसार पीएसजीले एमबाप्पेको पोस्टर हटाउनेदेखि आधिकारिक स्टलबाट जर्सी बेच्न र प्रशिक्षणमा समेत सहभागी गराएको थिएन। त्यसो त एमबाप्पे यसअघि पीएसजीको प्रि–सिजनको एसिया टुरमा समेत सहभागी भएका थिएनन्।
पीएसजीका मुख्य गोलकर्ता एमबाप्पेको सम्झौता अबको एक वर्षमा सकिँदैछ। उनी पीएसजीसँग सम्झौता नलम्ब्याउने पक्षमा छन्। जसकारण पीएसजी र एमबाप्पेबीच अहिले ठूलो विवाद छ।
पीएसजी एमबाप्पेलाई अहिले नै बेचेर मोटो रकम लिने दाउमा छ। जसअनुसार पीएसजीले एमबाप्पेलाई साउदी क्लब अल हिलाललाई बेच्ने तयारी गरेको थियो। तर त्यसलाई एम्बाप्पेले ठाडै अस्वीकार गरेका थिए।
एम्बाप्पेका लागि अल हिलालले विश्व कीर्तिमानी रकम २५९ मिलियन पाउन्डको मेगा प्रस्ताव गरेको थियो। अल हिलालको उक्त प्रस्तावमा सहमति जनाउँदै पीएसजीले एमबाप्पेसँग थप वार्ता गर्न स्वीकृति दिएको थियो। पीएसजीको उक्त स्वीकृतीसँगै एमबाप्पेका एजेन्टलाई अल हिलालसँग कुराकानी गर्ने बाटो खुलेको थियो। तर एमबाप्पेले अहिले नै युरोप छाडेर साउदीको प्रो–लिगमा नजाने भन्दै ठाडै अस्वीकार गरेपछि हिलालको मेगा प्रस्तावमा थप कुराकानी अघि बढ्न सकेन।
एक वर्षपछि सम्झौता सकिने भएकाले त्यतिबेला सित्तैमा स्टार खेलाडी एमबाप्पेलाई छाड्नुपर्ने भएकाले पीएसजी अहिले नै कुनै पनि हालतमा उनलाई बेच्ने रणनीतिमा छ। एमबाप्पेले अहिले क्लब नछाडे एक वर्षसम्म बेन्चमै थन्क्यिाइदिने भन्दै पीएसजीले धम्की समेत दिएको थियो।
अर्को सिजनको अन्त्यमा पीएसजी छाड्ने र रियल म्याड्रिड जाने इच्छा स्वयं एमबाप्पेले व्यक्त गरेका थिए।
सन् २०१७ मा १६५.७ मिलियन पाउन्डमा मोनाकोबाट पीएसजीले एमबाप्पेलाई अनुबन्धन गरेको थियो।
एमबाप्पे विगत ६ वर्षदेखि पीएसजीको मुख्य खेलाडीको रुपमा रहँदै आएका छन्। यो समयमा उनले २६० खेल खेल्दै २१२ गोल गरेका छन्। पाँच लिग वान र गोल्डेन बुट समेत एमबाप्पेले जितेका छन्।
उनले फ्रान्सलाई सन् २०१८ को विश्वकप जिताए भने २०२२ को फाइनलमा अर्जेन्टिनासँग पराजित हुँदा ह्याट्रिक गरेका थिए। २०२२ मा आफ्नो अन्तिम सम्झौताको अन्त्यमा उनी रियल म्याड्रिडमा नि:शुल्क सामेल हुने अपेक्षा गरिएको थियो, तर पीएसजीमा २ वर्षको नयाँ सम्झौतामा हस्ताक्षर गरेर सबैलाई चकित पारेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
