ज्ञानेन्द्र मल्ल (फाइल तस्बिर)
काठमाडौं– नेपाली क्रिकेट टोलीका पूर्व कप्तान तथा ब्याट्सम्यान ज्ञानेन्द्र मल्लले अन्तर्राष्ट्रिय क्रिकेटबाट सन्यासको घोषण गरेका छन्। शुक्रबार काठमाडौंमा पत्रकार सम्मेलन गर्दै मल्लले अन्तर्राष्ट्रिय क्रिकेटबाट सन्यास लिएको घोषणा गरेका हुन्।
सन् २००६ देखि नेपाली क्रिकेट टोलीबाट खेल्दै आएका मल्लले राष्ट्रिय टोलीका लागि अन्तिम अन्तर्राष्ट्रिय खेल खेल २०२३ जुलाई ४ मा आयरल्यान्डविरुद्ध खेलेका थिए।
नेपालबाट ३७ एक दिवसीय खेलमा भाग लिएका ज्ञानेन्द्रले ७ अर्धशतकसहित ८७६ रन बनाएका छन्। उनले २०१८ मा नेदरल्यान्ड्सविरुद्ध ऐतिहासिक एक दिवसीय खेलमा डेब्यू गर्दै ५१ रन बनाएका थिए। एक दिवसीय खेलमा ज्ञानेन्द्र अर्धशतक प्रहार गर्ने पहिलो नेपाली ब्याटर हुन्। ज्ञानेन्द्रले ४५ टी २० अन्तर्राष्ट्रियमा नेपालबाट १ शतक र २ अर्धशतकसहित कुल ८८३ रन बनाएका छन्।
उनले १३औं सागमा २०१९ मा भुटानविरुद्ध १०७ रनको शतकीय इनिङ खेलेका थिए। ज्ञानेन्द्रले पछिल्लो समय राष्ट्रिय टोलीमा कम मात्रै मौका पाउँदै आएका थिए। गत फागुनमा उनको स्थानमा भीम सार्कीले राम्रो प्रदर्शन गरेपछि ज्ञानेन्द्रले कम अवसर पाउँदै आएका थिए। लगातार कमजोर प्रदर्शनपछि ज्ञानेन्द्रले सन्यास लिने निर्णय लिएका हुन्।
पूर्व कप्तान पारस खड्काले सन्यास लिएको २ वर्षपछि ज्ञानेन्द्रले पनि नेपाली क्रिकेट टोलीबाट विस्राम लिने निर्णय लिएका हुन्। पारसले कप्तानी छाडेपछि ज्ञानेन्द्रले २०१९ देखि २०२१ सम्म नेपाली क्रिकेट टोलीको नेतृत्व गरेका थिए।
ज्ञानेन्द्रले १२ टी २० आईमा कप्तानी गर्दा ९ मा जित र ३ खेलमा हार बेहोरेका थिए। १० ओडीआई खेलमा कप्तानी गर्दा ६ मा जित र ४ मा हार बेहोरेका थिए।
ज्ञानेन्द्रले सन् २०१२ मा एसिसी ट्रफी इलिटमा साउदी अरेवियाविरुद्ध एकै ओभरमा लगातार ६ चौका प्रहार गरेका थिए।
२०१४ को डिभिजन थ्रीमा उनले सिंगापुरविरुद्ध ११४ रनको शतकीय इनिङ खेलेका थिए। २०१९ को १३औं सागमा ज्ञानेन्द्र प्रतियोगिताका उत्कृष्ट ब्याटर चुनिएका थिए। नेपालले डिभिजन फाइभदेखि थ्री, २०१४ मा टी २० विश्वकप खेल्दा र २०१८ मा ओडीआई मान्यता पाउँदा ज्ञानेन्द्र टोलीका महत्त्वपूर्ण सदस्य थिए।
उनले आफू अलग रुपमा अघि बढ्न चाहेको पनि बताए। पत्रकार सम्मेलनमा बोल्दै आफूले हालसम्म पाएको मायालाई सम्मान गर्दै मैदानमा पाएको सर्मथन भोलिका दिनमा पनि पाउने आस राखेको उनले बताए। उनले अन्तराष्ट्रिय खेलमा सक्रिय नभए पनि क्रिकेटको वरिपरी नै रहने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
