काठमाडौं– आईसीसी एकदिवसीय विश्वकप छनोट अन्तर्गत बिहीबार भभएको खेलमा नेपाल वेस्टइन्डिजसँग पराजित भएको छ।
३४० रनको चुनौतीपूर्ण लक्ष्य पछ्याउने क्रममा नेपालले ४९.४ ओभरमा २३८ रनमै समेटियो। वेस्टइन्डिज १०१ रनले विजयी भएको हो।
जिम्बावेमा जारी प्रतियोगितामा यो नेपालको दोस्रो हार हो। यसअघि पहिलो खेलमा घरेलु टोली जिम्बावेसँग पराजित भएको नेपाल दोस्रो खेलमा भने अमेरिकाविरुद्ध विजयी भएको थियो।
टस जितेर फिल्डिङ रोजेको नेपालले सुरुवातमा वेस्टइन्डिजका ब्याटरलाई दबाबमा राखे पनि मध्यतिर पुग्दा लय समात्न सकेन। ब्याटिङका क्रममा पनि वेस्टइन्डिजका बलरसामु नेपालका कुनै ब्याटर टिक्न सकेनन्।
नेपालका लागि आरिफ शेखले ९३ बलमा ४ चौका र १ छक्काको सहयोगमा ६३ रनको अर्धशतकीय ईनिङ खेले। नेपालका ओपनर आसिफ शेख र भीम सार्कीले दोस्रो विकेटका लागि १६ बलमा १८ रनको साझदारी गरे पनि सार्की सात बलमा २ रन बनाउनै आउट भए।
यस्तै नेपालका गुलसन झा ५८ बलमा ५ चौका र १ छक्काको सहयोगमा ४२ रन बनाउँदै आउट भए। कप्तान रोहित पौडेलले ४३ बलमा ३ चौकाको सहयोगमा ३० रन बनाए। ओपनर आसिफ शेखले ३६ बलमा २८ रन बनाए। करण केसीले २७ बलमा ४ चौका र १ छक्काको सहयोगमा २८ रन बनाए।
यता वेस्टइन्डिजका लागि जेसन होल्डरले ३ तथा अल्जारी जोसेफ, किमो पल र अकिल होसेनले समान २/२ विकेट लिए। कायल मेयर्स सन्दीप लामिछानेको विकेट लिए।
त्यसअघि टस हारेर पहिले ब्याटिङ गरेको वेस्ट इन्डिजले निर्धारित ५० ओभरमा ७ विकेट गुमाएर ३ सय ३९ रन बनाएको थियो। वेस्ट इन्डिजका लागि शाई होप र निकोलस पुरनले शतकीय ईनिङ खेले। कप्तान शाई होपले १ सय २९ बलमा १० चौका र ३ छक्काको सहयोगमा १ सय ३२ रन बनाए। उनलाई नेपालका ललित नारायण राजवंशीले आउट गरेका थिए।
नेपालका लागि ललितनारायण राजवंशीले ३ तथा करण केसी, दीपेन्द्रसिंह ऐरी, सन्दीप लामिछाने र गुलसन झाले समान १/१ विकेट लिए ।
दुई खेलमा अपराजित वेस्ट इन्डिज ४ अंकका साथ समूह ए को शीर्ष स्थानमा उक्लिएको छ। हारसँगै २ अंक रहेको नेपाल चौथो स्थानमा झरेको छ।
नेपालले समूह चरणको अन्तिम खेलमा शनिबार नेदरल्यान्ड्ससँग खेल्नेछ। सुपर सिक्समा स्थान बनाउन नेदरल्यान्ड्सविरुद्धको खेल जित्नै पर्ने हुन्छ भने सोमबारको खेलमा नेदरल्यान्ड्स वेस्ट इन्डिजसँग पराजित हुनुपर्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
