काठमाडौं– आईसीसी विश्वकप छनोट प्रतियोगितामा बिहीबार नेपाल र वेस्टइन्डिजबीच खेल हुँदैछ। विश्वकप छनोटमा नेपालको यो तेस्रो खेल हो।
तर टेस्ट मान्यता प्राप्त वेस्टइन्डिजसँग भने नेपालको यो पहिलो खेल हो। जिम्बावेमा जारी आईसीसी विश्वकप छनोटका क्रममा बिहीबार नेपाली समयअनुसार १२:४५ देखि नेपाल र वेस्टइन्डिजबीच खेल हुँदैछ।
यसअघि नेपालले टी–२० तथा एक दिवसीय फर्म्याटमा वेस्टइन्डिजसँग नेपालले खेलेको थिएन। वेस्टइन्डिज एक दिवसीय विश्वकपको पहिलो तथा दोस्रो संस्करणको विजेता पनि हो।
१९७५ मा इंग्ल्यान्डमा आयोजना भएको पहिलो संस्करणको विश्वकपमा अष्ट्रेलियालाई पराजित गरि वेस्टइन्डिजले उपाधि जितेको थियो। इंग्ल्यान्डमै १९७९ आयोजना भएको दोस्रो संस्करणमा घरेलु टोलीलाई पराजित गरि वेस्टइन्डिज च्याम्पियन बनेको थियो।
यतिबेला विश्वकप छनोटमा वेस्टइन्डिज नेपालसँगै समूह ‘ए’ मा रहेको छ। यो समूहमा घरेलु टोली जिम्बावे, अमेरिका, नेपाल, वेस्ट इन्डिज तथा नेदरल्यान्ड्स रहेका छन्।
जारी प्रतियोगितामा नेपाल घरेलु टोली जिम्बावेसँग भिडेको थियो। असार ३ गते भएको खेलमा नेपाल पराजित भयो। नेपालले दोस्रो खेलमा मंगलबार अमेरिकालाई ६ विकेटले पराजित गर्यो।
समूह चरणको अन्तिम खेल नेपालले असार ९ गते नेदरल्यान्डसँग खेल्नेछ। प्रतियोगितामा पहिलो खेलमा वेस्टइन्डिजले अमेरिकालाई नै पराजित गरेको छ। १० राष्ट्रको सहभागिता रहेको प्रतियोगितामा नेपालको सु्पर सिक्समा पुग्ने सम्भावना भने जीवितै छ। उता, समूह 'बी' मा श्रीलंका, आयरल्यान्ड, स्कटल्याण्ड,ओमान र युएई रहेका छन्।
समूह चरणमा प्रत्येक राष्ट्रले चार खेल खेल्नेछन्। आ–आफ्नो समूहका शीर्ष ३ टोलीहरु सुपर सिक्समा प्रवेश गर्नेछन्। सुपर सिक्समा एक समूहका टोलीले अर्को समूहका टोलीसँग प्रतिस्पर्धा गर्ने छन्।
सुपर सिक्सको शीर्ष दुईमा रहने टोली अक्टोबरमा भारतमा आयोजना हुने आइसीसी एकदिवसीय विश्वकपमा छनोट हुनेछन्। १३ राष्ट्र सहभागी विश्वकप सुपर लिगको शीर्ष ८ मा रहि विश्वकप आयोजक भारत, पाकिस्तान, अस्ट्रेलिया, न्युजिल्यान्ड, बंगलादेश, इंग्ल्यान्ड, दक्षिण अफ्रिका र अफगानिस्तान सिधा विश्वकपका लागि छनोट भइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
