काठमाडौं– मनसुन भित्रिएसँगै सुरु भएको वर्षासँग आएको बाढी र पहिरोका कारण कोशी प्रदेशका पहाडी जिल्लाको जनजीवन प्रभावित भएको छ। बाढी र पहिरोका कारण भौतिक पूर्वाधारमा पनि ठूलो क्षति पुगेको छ।
सरकारले बाढी र पहिरोका कारण पाँचथर, ताप्लेजुङ र संखुवासभामा गरी भौतिक पूर्वाधारमा ५० करोड रुपैयाँ बराबरको क्षति पुर्याएको प्रारम्भिक मूल्याङ्कन गरेको छ।
बाढीले सडक (मोटरेबल) पुलहरु बगाएको छ। यस्तै, केही ठाउँमा झोलुङ्गे पुलहरु पनि बगाएको छ। केही ठाउँमा निजी र सार्वजनिक घर पनि बाढी तथा पहिरोले बगाएको छ।
भौतिक पूर्वाधार तथा यातायातमन्त्री प्रकाश ज्वालाले पूर्वी पहाडी जिल्लामा आएको बाढी र पहिरोमा अहिलेसम्म ५० करोड बराबर भौतिक पूर्वाधारमा क्षति पुगेको जानकारी दिए। प्रारम्भिक सूचना तथा जानकारीअनुसार उक्त रकम बराबर क्षति भएको अनुमान गरिएको मन्त्री ज्वालाको भनाइ छ।
बाढी र पहिरोको प्रकोपपछि सो क्षेत्रमा खोजी, उद्धार, राहत र पुननिर्माणको काम तीव्रताका साथ अगाडि बढाइएको मन्त्री ज्वालाको भनाइ छ। प्रतिनिधि सभाको आइतबारको बैठकमा सार्वजनिक महत्वको विषयमा जवाफ दिँदै मन्त्री ज्वालाले उक्त कुरा बताएका हुन्।
‘त्यहाँ भएको क्षतिको प्रराम्भिक रुपमा अनुमान गर्दा भौतिक पूर्वाधार मन्त्रालयकै सडक र पुलको क्षति करिब ५० करोड भएको अनुमान गरिएको छ,’ मन्त्री ज्वालाले भने।
ताप्लेजुङ, पाँचथर र संखुवासभामा आएको बाढी र पहिरोले सो क्षेत्रका विभिन्न राजमार्ग तथा सहायक मार्गहरुमा क्षति पुगेको छ। पाँचथरमा बाढीले बगाउँदा ६ जना बेपत्ता भएका छन्। ताप्लेजुङमा पहिरोले घर बगाउँदा एकै परिवारका ३ सहित ४ जना बेपत्ता भएका छन्।
संखुवासभामा बाढीले बगाउँदा १ जनाको मृत्यु भएको छ। बाढीले २० जना सम्पर्कविहीन भएकामा अहिलेसम्म ५ जना सम्पर्कमा आइसकेका जिल्ला प्रहरी कार्यालय संखुवासभाले जानकारी दिएको छ।
ताप्लेजुङ जोड्ने मेची राजमार्ग र तमोर करिडोर अवरुद्ध भएपछि जिल्ला यातायातको सम्पर्कबाट छुटिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
