काठमाडौं- प्रधानमन्त्री पुष्पकमल दाहाल प्रचण्डले आफू सबै धर्मालम्वीको कार्यक्रममा सहभागी हुने गरेको र सोही अनुसार महाकालेश्वर मन्दिर पुगेको बताएका छन्।
भारत भ्रमणका क्रममा शुक्रबार भारत उज्जैनको महाकालेश्वर मन्दिरमा उनले पूजा गरेको घटनाको आलोचना भइरहँदा उनले प्रष्टीकरण दिएका हुन्।
‘म अहिले कम्युनिस्ट मात्रै होइन नि, प्रधानमन्त्री पनि हो नि। प्रधानमन्त्रीले त सबैलाई समेटेर लैजानुपर्ने हुन्छ’, उनले भने।
आफ्नो सेक्युरिटीले गेरुवस्त्र नलगाउनका प्रयत्न गरेको तर त्यहाँको प्रोटोकलका कारण लगाउनुपरेको प्ररधानमन्त्री प्रचण्डको भनाइ छ। ‘मुख्य अथितिले गेरुवस्त्र लगाउनै पर्ने प्रोटोकल रहेछ। प्रोटोकल मिचेर नलगाउने भन्दा त भारतका करोडौं जनताको मनमा चिसो पस्ने भयो’, उनले भने।
यहाँ कतिपयलाई आफूले गेरुवस्त्रु लगाएर जिन्दगीभर कमन्डलु बोकेर हिँडिदिए हुन्थ्यो भन्ने लागेको भए पनि आफूले त्यसो नगर्ने उनको भनाइ छ।
‘यसलाई त हामीले सांस्कृतिक कूटनीतिको रुपमा किन नबुझ्ने? प्रधानमन्त्रीले नेपालको बृहत्तर हितमा यसलाई सदुपयोग गर्न खोजेको र एउटा नयाँ पहल लियो भनेर पो बुझिदिनुपर्छ। तर कतिपयले उल्टो बुझेका छन्’, उनले भने।
उनले त्यहाँ चढाइएको रुद्राक्ष पनि नेपालबाट परराष्ट्रमन्त्रीले अग्रसरता लिएर लगेको बताए। उनले भने, ‘उहाँले म लैजान्छु भन्नुभयो। मैले ‘हुन्छ, लैजानुहुन्छ भने राम्रै हुन्छ’ भनेको हो। अनि परराष्ट्रमन्त्रीले लगेको रुद्राक्षलाई मैले नछुने भन्न त मिल्दैनथ्यो नि त।’
आफूले श्रीमतीको स्वास्थ्य ठीक हुन्छ भनेर पूजा नगरेको उनको भनाइ छ। पूजाका बेलामा त्यो विषय आफ्नो दिमागमा नभएको उनले दाबी गरे। ‘मेरो पत्नीको बिमार सन्चो हुने खालको होइन। म कस्तो विचार र चरित्र प्रवृत्तिको मान्छे हुँ भन्ने पनि तपाईंहरुलाई राम्रोसँग थाहा छ। अनि म उहाँ महाकालेश्वर गएर, यत्रो दुई पक्षीय सम्बन्धको कुरा छ। पत्नी बचाइ पाऊँ भन्छु त? त्यसको केही अर्थ हुन्छ त?’, उनको प्रश्न छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
