काठमाडौं– प्रतिनिधि सभाको बैठक आज (शुक्रबार) बस्दै छ। आजको बैठककको सुरुमा नीति तथा कार्यक्रममाथि जारी छलफलले निरन्तरता पाउनेछ।
सांसदहरुले नीति तथा कार्यक्रममाथि धारणा राख्ने क्रम सकिएपछि प्रधानमन्त्री पुष्पकमल दाहाल प्रचण्डले जवाफ दिने सम्भावित कार्यसूची छ। नीति तथा कार्यक्रममाथि सांसदहरुले उठाएका प्रश्नको जवाफ प्रधानमन्त्रीले दिनेछन्।
यस्तै, नीति तथा कार्यक्रममाथि प्रतिनिधि सभा सदस्यहरुले दर्ता गराएका संशोधन प्रस्तावहरुलाई निर्णयार्थ पेस गरिने संघीय संसद्का महासचिव भरतराज गौतले जनाएका छन्।
त्यसपछि सभामुख देवराज घिमिरेले नीति तथा कार्यक्रमलाई निर्णयार्थ पेस गर्नेछन्। सत्ता पक्षका बहुमत सांसदहरुको समर्थनमा नीति तथा कार्यक्रम शुक्रबार नै पारित हुने सम्भावना छ।
राष्ट्रपति रामचन्द्र पौडेलले गत शुक्रबार (जेठ ५ गते) संघीय संसद् (प्रतिनिधि सभा र राष्ट्रिय सभा)को संयुक्त बैठकमा सरकारले आगामी आर्थिक वर्ष २०८०/८१ का लागि ल्याएको नीति तथा कार्यक्रम प्रस्तुत गरेका थिए।
राष्ट्रपतिले प्रस्तुत गरेको सरकारको नीति तथा कार्यक्रममाथि आइतबार (जेठ ७ गते)देखि दुवै संघीय संसद्का दुवै सदन (प्रतिनिधि सभा र राष्ट्रिय सभा)मा छलफल सुरु भएको थियो।
राष्ट्रिय सभाबाट भने नीति तथा कार्यक्रम पारित भइसकेको छ। शुक्रबार प्रधानमन्त्रीले सांसदका प्रश्नको जवाफ दिएपछि प्रतिनिधि सभाबाट पनि पारित गर्ने तयारी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791562069.png)
