मंगलबारसम्म पानी पर्ने प्रक्षेपण, खेल हुनै नसके नेपाल स्वत: विजेता

क्रिकेट

नेपाल लाइभ आइतबार, वैशाख १७, २०८० १८:०४

काठमाडौं– मौसम पूर्वानुमान महाशाखाले तीन दिनको मौसम पूर्वानुमान सार्वजनिक गरेको छ। आइतबारदेखि मंगलवारसम्मको मौसम बुलेटिनमा मंगलवारसम्म वर्षा हुने प्रक्षेपण गरिएको छ।

पूर्वानुमान अनुसार नै मौसम रहे नेपालमा जारी एसीसी प्रिमियम कप प्रभावित हुने सम्भावना बलियो छ। सोमबार नेपाल र यूएई बीच फाइलन खेल हुँदैछ। एसियन क्रिकेट काउन्सिल अन्तर्गतको खेलमा अपराजित नेपालले फाइलनमा परिचित प्रतिद्वन्द्वी यूएई पाएको हो।

शनिबार वर्षाका कारण खेल अबरुद्ध हुँदा नेपाल समूह विजेतका आधारमा फाइनलमा पुगेको हो। यूएई भने डिएल मेथडबाट ओमानसँग जम्मा २ रनले जित हात पारेर फाइनलमा पुगेको हो। शनिबार सेमिफाइनलमा पराजित दुई टोली ओमान र कुवेतको खेल तालिका थियो। उक्त खेल पनि वर्षाका कारण प्रभावित बनेको छ।

मौसम पूर्वानुमान महाशाखाका अनुसार हाल देशमा पश्चिमी वायुको साथै स्थानीय वायुको प्रभाव रहेको छ। देशभर आंशिकदेखि सामान्य बदली रहेको र लुम्बिनी, कर्णाली र गण्डकी प्रदेशका थोरै स्थानहरूमा साथै कोशी र बागमती प्रदेशका केही स्थानमा मेघ गर्जन/चट्याङसहित हल्का वर्षा भइरहेको छ। यो क्रम तीन दिनसम्म जारी रहने र मंगलबार सामान्य सुधार हुने भनिएको छ। विभागले मंगलबार हल्का वा क्षणिक वर्षाको सम्भावना रहेको पनि उल्लेख गरेको छ।

वर्षाका कारण खेल हुन नसके नेपाल स्वत: विजयी
नेपाल क्रिकेट संघका अनुसार सोमबार फाइनल खेल टियु क्रिकेट मैदानमा हुने तय भएको छ। भोलि नेपाल र यूएईबीचको खेल हुन नसकेको अवस्थामा खेल मंगलबार खेलाइनेछ। मंगलबार पनि मौसम पूर्ण रुपमा सफा हुने सम्भावना कम देखिएको छ।

मंगलबारको खेलमा पनि खेलको नतिजा आउन नसके दुई ओभरको सुपर ओभरमा खेल हुने छ। मौसमका कारण सुपर ओभर पनि सम्भव नभएको अवस्थामा वरियताका आधारमा टिम च्याम्पियन घोषणा हुने नेपाल क्रिकेट संघले जनाएको छ।

एसीसी प्रिमियर कपको अपराजित नेपाल वरियताका आधारमा प्रतियोगिताको च्याम्पियन बन्दै एसिया कपका लागि छनोट हुनेछ। नेपाल आईसीसीको ओडीआई वरियतामा १४ औं स्थानमा छ । यूएई भने १९ औं स्थानमा छ। यसरी हेर्दा नेपाल यूएई भन्दा पाँच वरियता माथि छ।

एसीसी प्रिमियर कपको विजेताले भारत र पाकिस्तानसँग एसिया कप क्रिकेट खेल्नेछ। एसिया कप आगामी सेप्टेम्बरमा पाकिस्तानमा हुने तय गरिएको छ।

यस्तो छ आगामी ३ दिनको मौसम पूर्वानुमान

२०८० वैशाख १७ गते (आइतबार)

दिउँसोː देशभर आंशिकदेखि सामान्य बदली रहने छ। पहाडी भू–भागका केही स्थानहरुमा मेघ गर्जन/चट्याङसहित हल्कादेखि मध्यम वर्षाको सम्भावना रहेको तथा तराईका थोरै स्थानहरुमा मेघ गर्जन/चट्याङसहित हल्का वा क्षणिक वर्षाको सम्भावना रहेको छ।

रातिː देशभर आंशिकदेखि सामान्य बदली रहने छ। सुदूरपश्चिम र लुम्बिनी प्रदेशलगायत अन्य प्रदेशका पहाडी भू–भागका केही स्थानहरूमा मेघ गर्जन/चट्याङसहित हल्का वा क्षणिक वर्षाको सम्भावना रहेको छ।

२०८० वैशाख १८ गते (सोमबार)

दिउँसोː देशभर आंशिकदेखि सामान्य बदली रहने छ। देशका केही स्थानहरुमा मेघ गर्जन/चट्याङसहित हल्कादेखि मध्यम वर्षाको सम्भावना रहेको छ। मधेश प्रदेशका एक–दुई स्थानमा हावाहुरीको सम्भावना रहेको छ।

रातिː देशभर आंशिकदेखि सामान्य बदली रहने छ। देशका थोरै स्थानहरूमा मेघ गर्जन/चट्याङसहित हल्का वा क्षणिक वर्षाको सम्भावना रहेको छ।

२०८० वैशाख १९ गते (मंगलबार)

दिउँसोː देशभर आंशिकदेखि सामान्य बदली रहने छ। पहाडी भू–भागका केही स्थानहरुमा मेघ गर्जन/चट्याङसहित हल्कादेखि मध्यम वर्षाको सम्भावना रहेको तथा तराईका थोरै स्थानहरुमा मेघ गर्जन÷चट्याङसहित हल्का वा क्षणिक वर्षाको सम्भावना रहेको छ।

रातिː कोशी, गण्डकी, कर्णाली र सुदूरपश्चिम प्रदेशका पहाडी भू-भागमा आंशिकदेखि सामान्यतया बदली रही बाँकी भू–भागमा आंशिक बदलीदेखि मौसम सामान्यतया सफा रहने छ। कोशी, गण्डकी, कर्णाली र सुदूरपश्चिम प्रदेशका पहाडी भूभागका एक–दुई स्थानमा मेघ गर्जन/चट्याङसहित हल्का वा क्षणिक वर्षाको सम्भावना रहेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

नीति तथा कार्यक्रमको पक्षमा मतदान गर्न सांसदलाई एमालेको ह्विप

महाकाली सिँचाइ तेस्रो चरणले गति लिँदै

लोकतन्त्रको संरक्षण एवं न्यायपूर्ण समाज निर्माणमा न्याय र कानुन जगतको दायित्व : राष्ट्रपति पौडेल