काठमाडौं- उपप्रधान तथा रक्षामन्त्री पूर्णबहादुर खड्काले आफूले कहिले पनि उपप्रधानमन्त्री बन्दिनँ भनेर नभनेको बताएका छन्। उनले मन्त्री मात्रै बन्दिनँ भनेको र त्यो वचनबाट दायाँबायाँ नगरेको बताए।
कांग्रेसबाट सरकारको नेतृत्व गर्दै शपथ लिएको भोलिपल्ट शनिबार बिहान बाडेगाउँस्थित कृष्णप्रसाद भट्टराईको आश्रम पुगेका उनले सञ्चारकर्मीसँगको कुराकानीमा मन्त्री बन्ने आफ्नो कदमको बचाउ गरेका हुन्।
बहुदलकालमा पटक–पटक मन्त्री बनेका खड्काले २०७२ मा अब मन्त्री नबन्ने बरु बनाउन लाग्ने बताएका थिए। पछिल्लो पटक मन्त्री बनेपछि उनले आफ्नै वचन उल्लंघन गरेको भन्दै टिप्पणी हुन थालेपछि उनले बचाउ गरेका हुन्।
‘अहिले सामाजिक सञ्जालमा मन्त्री खान्न, मन्त्री बन्दिनँ भन्नुहुन्थ्यो तर अहिले फेरि मन्त्री बन्नुभयो भनेर आइरहेको छ’, उनले भने, ‘मैले उपप्रधानमन्त्री बन्दिनँ भनेर कहिले भनेँ? मैले मन्त्री बन्दिनँ भनेको हो। अहिले पनि म त्यो कुरामा अडिग नै छु। यदि उपप्रधान बिनाको ‘प्लेन’ मन्त्री भएको भए म हुन्थिनँ।’
सात वर्षको अन्तरालमा आफूलाई पार्टीका आदरणीय नेताले विभिन्न चरणमा मन्त्री बन्न भन्दा आफूले त्यही कुरा (मन्त्री नबन्ने) भनेको उनले बताए। ‘त्यसैले अहिले म मन्त्री मात्रै बनिरहेको छैन। अहिले म मुलुकको उपप्रधानमन्त्री छु’, उनले भने।
सात वर्षअघि आफूलाई आफ्नो चेतनाले पटक–पटक मन्त्री भइसकेपछि फेरि मन्त्री बन्ने र लालसा देखाउनुहुँदैन भन्ने निष्कर्षमा पुर्याएको मन्त्री खड्काको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772271039.png)
