पोखरा– पर्यटकीय सहर पोखरामा भोलिदेखि सुरु हुने एसियन कप तथा दक्षिण एसियन ट्रायथलन च्याम्पियनसीपको सम्पूर्ण तयारी पूरा भएको छ। प्रतियोगितामा प्रतिस्पर्धा गर्न नेपालसहित विदेशबाट खेलाडी तथा प्राविधिक पोखरा आइपुगेका छन्।
नेपाल ट्रायथलन संघको आयोजनामा हुने च्याम्पियनसीपमा लेकसाइडमा ट्रायथलनको ‘स्प्रिन्ट’ विधामा प्रतिस्पर्धा हुनेछ। फेवा तालमा सात सय ५० मिटर पौडी, २० किलोमिटर साईक्लिङ र पाँच किलोमिटर दौड हुनेछ।
पौडी फेवा तालमा गराइने छ। दौड आम्बोट–सहिद चोक, ड्यामसाईड राष्ट्र बैंक चोक हुँदै–आम्बोटमा पुगेर टुंगिने रुट तय गरिएको छ। महिला तथा पुरुष दुवै स्पर्धामा प्रतिस्पर्धा हुने छ। दुवाथोलनमा पाँच किलोमिटर दौड, २० किलोमिटर साइक्लिङ र साढे दुई किलोमिटर दौडको दुवाथलन हुनेछ।
च्याम्पियनसीपमा पुरुषतर्फ नेपालसहित लक्जम्बर्ग, उज्वेकिस्तान, जापान, उरुग्वे, अष्ट्रिया, अष्ट्रेलिया, कजाकिस्तान, स्लोभाकिया, युएई, प्यालेस्टाइन, न्यूजिल्याण्ड र भारतका गरी १२ देशका ४७ खेलाडीले उपाधिका लागि प्रतिस्पर्धा गर्ने सङ्घका अध्यक्ष निलेन्द्रराज श्रेष्ठले जानकारी दिए।
महिलातर्फ जापान, रोमानिया, स्लोभाकिया, उज्वेकिस्तान, मरिसस, अल्जेरिया, भारत र नेपालका गरी आठ देशका १६ खेलाडीले प्रतिस्पर्धा गर्नेछन्। शनिबार पहिलो दिन ट्राइयाथलन र दोस्रो दिन १९ गते दुवाथलनको प्रतिस्पर्धा हुनेछ।
ट्रायथलनमा महिला/पुरुष उपाधि विजेताले मेडल, प्रमाणपत्रका साथ छ सय ३० डलर प्राप्त गर्नेछन्। यसैगरी द्वितीय हुनेले पाँच सय २५ डलर, तृतीयले चार सय २० डलर, सान्त्वनाले तीन सय १५ डलर र पाँचौँ हुनेले दुई सय १० डलरका साथ मेडल र प्रमाणपत्र प्राप्त गर्ने आयोजकले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791703930-1791704860.jpg)
-1786602170.png)
