काठमाडौं- अतिरिक्त महानिरीक्षक (एआईजी) हरुको पदस्थापन गरिएको छ। मंगलबारको मन्त्रिपरिषद बैठकले बढुवा भएका चार एआईजीहरुको पदस्थापन गरेको हो।
जसअनुसार चुनौतीपूर्ण ठानिएको काठमाडौं उपत्यका प्रहरी कार्यालय रानिपोखरीमा एआईजी श्यामलाल ज्ञवालीको पदस्थापन भएको छ। रानिपोखरी मातहत उपत्यकाका तीन जिल्लाको कमाण्ड कन्ट्रोल हुने गर्छ।
त्यसैगरी केन्द्रीय अनुसन्धान ब्यूरो (सीआईबी)मा किरण बज्राचार्यलाई पठाइएको छ। देशभर हुने ठूला तथा जघन्य अपराध, संगठित अपराध र ठूला आर्थिक अपराधको अनुसन्धान सीआईबीले गर्दै आएको छ। प्रहरी महानिरीक्षक (आईजी)को प्रत्यक्ष मातहतमा रहने सीआईबी अपराध अनुसन्धानको सर्वोच्च निकाय मानिन्छ।
त्यसैगरी राष्ट्रिय प्रहरी प्रशिक्षण प्रतिष्ठान (एकेडेमी)मा टेकप्रसाद राईको पदस्थापन गरिएको छ। प्रहरी कर्मचारीका वृत्ति विकास, तथा तालिम र प्रहरी कर्मचारी उत्पादनका लागि एकेडेमीको मुख्य भूमिका रहन्छ।
प्रहरी हेडक्वाटरमै रहेको प्रशासन विभागमा भने एआईजी दीपक थापालाई पदस्थापन गरिएको छ। प्रशासनिक काम तथा सम्पूर्ण खरिदका प्रक्रियाहरु यही विभाग मातहत रहन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
