काठमाडौं– अहिले बक्स अफिसमा हेमराज बिसी निर्देशित ‘छक्का पञ्जा–४’ले उत्साहजनक व्यापार गरिरहेको छ।
‘दीपक–दीपा’ ब्यानरका प्रत्येक फिल्मले एकपछि अर्को गर्दै झन् राम्रो व्यापार गरेको दृष्टान्त छन्।
उसो त ०७९ सालको सुरुवात नै नेपाली फिल्म उद्योगमा सकारात्मक आशा सञ्चार भयो। १४ जेठमा प्रदर्शन भएको रामबाबु गुरुङ निर्देशित ‘कबड्डी ४ : द फाइनल म्याच’ले करिब २५ करोडमाथिको व्यापार गरेर यसअघिको रेकर्ड तोड्यो। त्यसपछि एकाध बाहेक अधिकांश फिल्मले कमजोर व्यापार गरे।
वर्षको अन्तिम महिनातिर ‘छक्का पञ्जा ४’ले भने उद्योगभित्रको निराशामा पुन: आशाको सञ्चार गरिदिएको छ। तर ‘छक्का पञ्जा ४’ नै वर्षको अन्तिम फिल्म हैन।
चैत्रमा प्रतिक्षित ३ फिल्मबारे कुरा गरौँ। गोविन्दसिंह भण्डारी निर्देशित ‘प्रेमा’ १७ चैत्र र प्रमोद कँडेल निर्देशित फिल्मि ‘बहाब’ २४बाट प्रदर्शनमा आउनेछन्। चैत २४ गतेलाई फिल्म ‘प्रसाद २’ले पनि रिलिज मिति तय गरेको छ।
सुदर्शन थापाको निर्देशनमा बनेको यो फिल्मले राजनीतिक र सामाजिक कथालाई उठान गरेको छ। यसअघि दिनेश राउतले निर्देशन गरेका थिए ‘प्रसाद’लाई। सुशील पौडेलको लेखन रहेको फिल्मलाई लिएर दर्शको अपेक्षा छ।
फिल्ममा विपिन कार्की र केकी अधिकारी मुख्य भूमिकामा छन्। त्यसैगरी अर्पण थापा, महेश त्रिपाठी, कमलमणि नेपाल लगायतका कलाकारको पनि अभिनय देख्न सकिन्छ।
वर्षको अन्तिममा रिलिज हुने यी तीन फिल्मले उद्योगलाई कतिको उत्साहित पार्छन् त्यो भने हेर्न बाँकी छ।
वर्षको सुरुवात : दयाहाङको आफ्नै फिल्मसँग प्रतिष्पर्धा
नयाँ वर्षको सुरुवात यसपटक अभिनेता दयाहाङ राईको परीक्षाबाट सुरु हुन्छ।
उनको मुख्य अभिनय रहेका दुई फिल्म एकै दिन प्रदर्शन हुनेछन्। उपेन्द्र सुब्बा निर्देशित फिल्म ‘जारी’ वैशाख १ मा प्रदर्शन हुनेछ।
किँरात समुदायमा आधारित ‘जारी’ प्रथामा आधारित कथामाथि फिल्म निर्माण भएको छ। सुब्बाको यो पहिलो निर्देशन हो।
फिल्ममा दयाहाङ र मिरुना ‘कबड्डी ४’ पछि पुनः एकसाथ देखिँदै छन्। फिल्ममा विजय बराल, कमलमणि नेपाल, पुष्कर गुरुङ, प्रेम सुब्बा, रेखा लिम्बुलगायतको पनि अभिनय छ।
सोही दिन दयाहाङ अभिनित अर्को फिल्म ‘बिहे पास’ पनि आउँदैछ। प्रवेश पौडेल निर्देशित फिल्ममा दयाहाङ र प्रकृतिसँगै श्याम राई, विशाल पहाडी, सुवास गजुरेल, हिउँवाला गौतम, रुषा न्यौपाने, नविन शेरचन, उमा बानियाँ र प्रकाश भुजेलले अभिनय गरेका छन्।
सुरक्षाका पनि दुई फिल्म
अभिनेत्री सुरक्षा पन्त स्टारर फिल्म ‘बहाब’ चैत्र २४ बाट रिलिज हुँदैछ। त्यसैगरी उनी स्टारर फिल्म ‘बुलाकी’ पनि आगामी वैशाख १ गते प्रदर्शन हुने तयारीमा छ।
यी दुवै फिल्म सुरक्षा र उनका दर्शकका निम्ति उतिकै महत्वपूर्ण छन्।
लक्ष्मण सुनारको निर्देशनमा बनेको फिल्मलाई टोपेन्द्र विष्टले निर्माण गरेका छन्। फिल्ममा सुरक्षासँगै नरेन खड्का र बिराज विष्ट मुख्य भूमिकामा देख्न सकिन्छ। ‘बहाब’को लेखन तथा निर्देशन भने प्रमोद कँडेले गरेका छन्।
आशलाग्दो ‘हल्कारा’
वैशाशमा प्रदर्शन हुने अर्को फिल्म ‘हल्कारा’ आशलाग्दो फिल्म हो। २९ वैशाखमा प्रदर्शन हुने यो फिल्म अमेरिकामा भएको अन्तर्राष्ट्रिय ‘ह्युस्टन फिल्म फेस्टिभल’मा उत्कृष्ट विदेशीभाषी फिल्म घोषित भएको थियो।
साथै प्लाटिनम रेमी अवार्ड समेत फिल्मले हात पारेको थियो। फिल्मका अभिनेता महेश त्रिपाठीले उत्कृष्ट अभिनेताको अवार्ड समेत जितेका थिए। त्यस्तै, फिल्म खिचेका छायाँकार चिन्तन राजभण्डारीले महोत्सवमा सर्वोत्कृष्ट छायाँकारको अवार्ड पनि पाएका थिए।
फिल्मलाई विक्रम सापकोटाले निर्देशन गरेका छन्। गाउँमा खबर पुर्याजउने पात्रको कथालाई लिएर निर्माण भएको यो फिल्ममा अभिनेता महेश त्रिपाठी मुख्य भूमिकामा देखिएका छन्।
फिल्ममा अभिनेता त्रिपाठीसँगै बिनिता थापामगर मुख्य भूमिकामा देखिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
