काठमाडौं– नेपालले १६ औं एसियाली क्रस कन्ट्रीमा २ स्वर्ण, ४ रजत र १ कास्य पदक जितेको छ। नेपाल एथ्लेटिक्स संघको आयोजनामा गोकर्ण गल्फ रिसोर्टमा भएको प्रतियोगितामा मंगलबार नेपालले पुरुष सिनियरको व्यक्तिगत र टिम दुवैमा स्वर्ण पदक जितेको हो।
सिनियर पुरुष १० किलोमिटर दौडमा दीपक अधिकारीले स्वर्ण पदक जिते। सोही प्रतियोगितामा मुकुशबहादुर पालले कास्य र जापानका डाइची कामिनोले रजत पदक जिते।
दीपक, मुकेश र दीपक सुहानले १ घन्टा ४३ मिनेट १९ सेकेन्डमा दौड पूरा गरेर स्वर्ण पदक दिलाएका हुन्। इरानले रजत र भारतले कास्य पदक जितेको छ।
सिनियर महिला र जुनियर महिलामा नेपालले दुई-दुई रजत पदक जितेको छ। जुनियर पुरुषतर्फ नेपालले टिम स्पर्धामा कास्य पदक जित्यो। सिनियर महिला १० किमी दौडमा नेपालका लागि राजपुरा पछाईले रजत पदक जितिन्। यसमा टिमबाट पनि नेपालले रजत पदक जितेको हो।
यो स्पर्धामा जापानकी युवा सरुमिदाले स्वर्ण पदक जितिन्। भारतकी सोनीकाले कास्य पदक जितिन्। यही स्पर्धाको टिम इभेन्टमा नेपालले रजत पदक जितेको हो। राजपुरा, पुष्पा भण्डारी र वृन्द्रा श्रेष्ठले १० किमी दौडको दूरी २ घण्टा ७ मिनेट ५७सेकेन्डमा पार गर्दै रजत पदक जितेका हुन्।
यो स्पर्धामा भारतते स्वर्ण पदक जितेको छ। भारतका सोनिका, छवि यादव र मुन्नी देवीले निर्धारित दुरी २ घण्टा ४ मिनेट र ३८सेकेन्डमा पार गर्दै स्वर्ण पदक जितेको हो। थाइल्याण्डका लिन्दा जन्थाचित, नथाया थनारोनावत र सुनिका प्रिचापोंगले २ घण्टा १३ मिनेट र १६सेकेन्डमा दूरी पार गर्दै कास्य पदक जितेका छन्।
जुनियर पुरुष (यू २०) ८ किलोमिटर दौडमा नेपाली टोलीले कास्य पदक जितेको छ। च्याम्पियनसिपमा भारतले स्वर्ण र इरानले रजत पदक जितेको छ।
नेपालका शेरबहादुर अधिकारी, सञ्जय दमाई र विकेश घिमिरेले १ घन्टा ३१ मिनेट ५० सेकेन्डमा दौड पूरा गर्दै कास्य पदक जिते। ८ किलोमिटरको जुनियर पुरुषको व्यक्तिगत स्पर्धामा इरानले स्वर्ण, भारतले रजत र इरानले नै कास्य पदक जिते।
नेपालकी राममाया बुढाले महिला जुनियर ६ किलोमिटर दौडमा रजत पदक जितिन्। राममाया र भारतकी श्रुती श्रीधर रेडाकर दुवैले २४ मिनेट १५ सेकेन्डमा दूरी तय गरेपछि फोटो फिनिसमा भारतकी श्रुतीले स्वर्ण जितेकी हुन्। ११ खेलाडीको सहभागिता रहेको प्रतिस्पर्धामा भारतकी बेबीले कास्य पदक प्राप्त गरिन्।
त्यस्तै टिम इभेन्ट्समा पनि भारतले स्वर्ण पदक जित्यो। नेपालले रजत पदक जित्यो। नेपालका राममाया बुढा, राज्यलक्ष्मी रावल र विमला कार्कीले १ घण्टा १८ मिनेट २२ सेकेन्डमा दूरी तय गरेर रजत पदक दिलाए।
च्याम्पियनसिपमा सिनियर महिला र पुरुषतर्फ १० किलोमिटर, २० वर्ष मुनिका जुनियर महिलातर्फ ६ किलोमिटर र २० वर्ष मुनिका जुनियर पुरुषतर्फ ८ किलोमिटर गरि ४ विधामा व्यक्तिगत र टिम इभेन्ट्समा प्रतिस्पर्धा भएको थियो। प्रतियोगितामा ११ राष्ट्रका ६५ खेलाडीको सहभागिता रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
